Egon Poulsen Tasiilami ajornartorsiutit pillugit:
– Imerajuttuunerput nassuerutiginiartigu!

40-nik ukiulik Egon Poulsen kommunalbestyrelsemut upernaaq qinersisoqarmat tunuliaqutserneqangaatsiarpoq. 379-inimmi taaneqarnermigut Kommuneqarfik Sermersuumi kommunalbestyrelsemut ilaasortanngorami. Ukiuni 20-ni kingullerni qinersinerni kisitsisaatigineqartut qinersineq.gl-imi qiviaraanni Tasiilameersumik aatsaat taama qinersiseqartigisoqarpoq. 

Egon Københavnimi 1985-imi inunngorpoq, arfinilinnik ukioqarluni Isertumut nuupput, qulinillu ukioqarluni Tasiilarmiunngorlutik.

- Taamanikkulli Tasiilamiilerpunga, aamma naatsorsuutiginngilara Tasiilaq qimakkumaassallugu, Egon qungujulluni taama oqarpoq.

Egon Poulsenip oqaloqatigineqarnera Podcastimi uani tusarnaaruk. Tasiilami unammillernartut qanoq anigorniarneqarsinnaaneri tassani ilaatigut eqqartorpaa.

Egon kommunalbestyrelsemi ilaasortaanermi saniatigut kommunimi inuusuttunut siunnersortitut atorfeqarpoq, Susse Poulsen katisimallugu pingasunillu meeraqarlutik.

Suliassarpassuaqarnera ajunngitsortaqarpoq

Egon atuarfiup eqqaani naapikkatsigu meeqqat qiimaqalutik anitsiarnerminni pinnguarput. Naak meeqqat nippaarillutik nuannisarpalukkaluaqisut kommunip kisitsisaatai allarluinnarmik takutitsipput. Tasiilamimi meeqqat 560-iusut affangajaat kommunip ataani ukioq manna aggustimi suliassaqarfigineqarput.

- Ajorlunilu ajunngitsortaqarpoq.

- Uanga isumanni ajunngitsortarivaa una, ukiut qulit 20-llu kingumut qiviarutta meeqqat takuneqarnikuunngitsut takuneqalersimapput massakkut. Taanna ajunngitsortarivaa. Siornatigut taamaattussaannartut isigineqarnikoq taanna tammariartuaalersimavoq, Egon taama oqarpoq.

Meeqqallu taama amerlatigisut suliassaqarfigineqarnerat peqqutigalugu inuuniarnikkut ajornartorsiutit qanittukkut aaqqissinnaanissaat qularaa.

- Naatsorsuutigaara ukiut qulit 20-lluunniit taamaakkallassasoq, Egon qularpasigani taama oqarpoq.

Imerajuttuunerput nassuerutiginiartigu!

Illoqarfimmi inuuniarnikkut ajornartorsiuterpassuit imigassamik atuinermeersuusut Egonip oqaatigaa.

- Ajoraluartumik illoqarfitsinni imigassaq atugaasorujussuugami. Taamaattumik isumaqarpunga aamma pingaartuusoq uagut tunumiut nassuerutigissallugu imerajuttuusugut, Egon oqarpoq.

Imigassamik ajornartorsiuteqarneq meeqqanut sunniuteqarnerluttartoq taassuma oqaluttuaraa.

- Meeqqerivik silataaniippoq, meeqqat meeqqerivimmiittut akissarsiffinni silatiminni aneertissinnaasarsimanngilaat ernguttut amerlangaarmata. Immaqaluunniit meerartatta aamma taamaattussaannartut isigilertarpaat imigassartortut takussaangaarmata.

Egonip Tasiilami pisiniarfissuup eqqaani akissarsiffinni ernguttoqartarnera eqqaallugulu tungaanut qiviarpoq.

- Illoqarfinni allaniikkaangama maanitulli ernguttunik takuneq ajorpunga.

Imerajuttuuneq nassuerutigissagaanni imminermini naammanngilaq. Allanngortoqassappallu imigassaq pillugu politikkeqalertoqartariaqartoq Egon isumaqarpoq.

- Isumaqarpunga alkoholpolitikkiliortariaqartugut Kommuneqarfik Sermersooq tamaat ataatsimut isigalugu.

Imigassaq pillugu politikki qanorpiaq isikkulik takorloornerlugu oqaatigisinnaanngilaa.

- Siammasippoq, naluara qanoq oqaatigissanerlugu. Ima isumaqanngilaq pointit utertinneqaqqittariaqarput, imaluunniit imigassaq matusariaqarpoq. Taamaanngilaq. Kisianni imigassaq aqunneqarsinnaasumik ingerlasariaqarpoq nunatsinni. Killeqanngitsorsuarmik nunatsinni imigassartortoqarami. Meeqqat 15-it missaannik ukioqalerlutik ilaat aallartittarput imigassartorlutik.

Suliffissaaleqiffiusumi sulisussaaleqineq

Illoqarfimmi 1.800-t ataallugit inulimmi suliffissaaleqineq ukioq manna nikerarpoq. Tasiilami suliffissarsiortut ukioq manna amerlanerpaagamik maajimi 210-upput, Naatsorsueqqissaartarfiup kisitsisaatai kingulliit ukioq manna septembarimeersut malillugit suliffissarsiortut 136-usut.

- Fabrikkitaarput sulisussaarulluni matoqqaqattaarpoq, ulloq unnuarlu angerlarsimaffiit børnehjemmit sulisussameerput, utoqqaat illuat sulisussameerpoq, pisiniarfiit sulisussameerput. Taamaattumik taanna oqaaseq atorusuppallaanngikkaluarpara illoqarfipput suliffissaaleqiffiusoq, Egon oqarpoq.

Imigassartorpallaarneq matumani peqqutaaqataasoraa.

- Inuit sulisinnaasut, kisianni imigassamik ajornartorsiutillit amerlagamik. Taava aamma suliffeqarfiit amerlasuut inuit ilikkaramikkit, kikkut sulisinnaappat kikkut sulisinnaanngillat.

Meeqqat allannguisinnaapput

Inuuniarnikkut ajornartorsiutit aaqqinneqassappata iliuuseqarnerit arlaannit aallartinneqartariaqarput.

- Kommunip kisimi kivissinnaanngilaa. Pineqartut aamma suleqataasariaqarput. Kisianni inuk piumanngitsoq pinngitsaalisinnaanngilarput aamma. Taamaattumik ajornartorsiut ingerlaannaq aaqqinneqarnissaanut takorlooruminaatsippara.

Aallartiffissalli kikkuussanersut qularinngilaa.

- Allamiissinnaasorinnginnakku taakkuugamik meeqqat aallartiffissagut. Aamma massakkut isumaqarpunga suliniut pitsammik ingerlasoq, siusissukkut iliuuseqartarneq, aallartinneqarnikuuvoq kommuniminngaanniit. Naartuuneraninngaanniit sullissisoqalertarput massakkut ilaqutariit isumannartumik inissisimasut. Tamakkuupput aallartiffiit ilamininngui, Egon oqarpoq.

Illoqarfik pillugu neriuuteqarneq

Egonip qaqqarsuit Tasiilap ilisarnaatai saallugit pisorusaarpoq, illoqarfini ungageqigaa qularisassaanngilaq. Naallu kisitsisit illoqarfimmi ajornartorsiuteqartoqarneranik ersersitsisut takugaangamigit nakeriallattaraluarluni neriuutaarutivissimanngilaq.

- Uanga upperilluinnarpara Tasiilaq illoqarfittut ineriartoqqikkumaartoq. Aamma imigassaq eqqaaginnarluguluunniit ilorraap tungaanut saakkumaartoq, Egon oqarpoq.

Illoqarfik siuariartulissappat suliniutit ataasiakkaat suliffissanik ataatsimoornermillu pilersitsisut pisariaqartinneqarsorai.

- Una fabrikkitaarput Royal Greenland, taannaannarluunniit takullugu nuannerpoq piniartut aalisarnermut ikaarsaarrapput. Taavalu aalisarusuttut inuusuttut amerlallutik. Taannaannarlunniit takullugu nuannerpoq, aamma illoqarfitsinni aningaasamik kaaviaartitsilernera malunnareerpoq, Egon neriuuteqarpasilluni taama oqarpoq.