- Pileqqaarnissinni atugassiassinnik arsaarpaasi. Avaqqutaaralusi pulaffigaasi. Ikkussiffigineqarlusi ilisimanngilarsi.
Maalia Naasunnguaq R. Skiftep 18-inik ukiullip 60-ikkunni 70-ikkunnilu danskit kalaallit arnartaannut spiralilersuisimanerat pillugu Københavnimi Operami maajip 22-ani oqalugiarami arnat akuersiseqqaarnagit spiralilersorneqarsimasut eqqartorpai.
Inuusuttut qulingiluat missaaniittut peqatigalugit Nuummi GUX-imi oqalugiaatissanik allaaserinninnermi novembarimi pikkorissarnermi peqataareerlunilu oqalugiarsinnaanerluni aperineqarpoq.
Tassani allanneq oqalugiartarnerlu ilinniarpaat.
- Oqalugiarnermi aappersarissat ukkatarinissai piffissarlu eqqortoq unillatsiartarnissaq ilikkarpakka, Maalia Skifte oqarpoq.
Ilinniartut allat marluk ataatsimeersuarnermi Future Greenlandimi Nuummi qaammammi kingullermi ingerlanneqartumi oqalugiarput. Inuussutissarsiorneq pillugu ataatsimeersuarneq Trumpip immikkut aallartitaa Jeff Landry peqataanera pissutigalugu ukioq manna immikkut malunginiarneqarluarpoq.
Maalia Skifte inuusuttut allat Danmarkimeersut Ukrainemeersullu ataasiakkaat oqalugiartartut peqatigalugit Københavnimi oqalugiarnissamut toqqarneqarpoq. Tassani inersuarmi 1700-nik tusarnaartulerlutik oqalugiarput.
- Ingasappoq, Sermitsiamit Nuummi angerlarsimaffimmini naapinneqarnermi oqarpoq.
Oqalugiaasiornermi ukiarmi ilinniarnini sioqqullugu kingullermik apersortinnermini oqalugiarpoq. Tamatumuuna apersortinnermini tunissutit ilaquttaminillu nersualaarinninneq oqalugiaatiginngilai.
Arnaq 1968-imi spiralimik ikkussiffigineqarpoq, ikkunneqarsimasorlu nalaatsornerinnakkut 1970-imi uffarnerani katappoq. Taamatut pisoqarsimanngikkaluarpat maanna saassinni nikorfasimassanngikkaluarpunga.
Maalia Nuummi ilinniarnertuunngorniarfimmi ilinniartut saavanni perngaamik oqalugiarpoq, Københavnimili oqalugiarnerani misigisaq allaanerulluinnarpoq.
Assi: Mathias Eis
Oqaluttuarisaanermi kapitaliinnaanngitsoq
Mette Frederiksen siorna ministeriunertut Katuami arnat hundredellit saavanni spiralilersuisimaneq pillugu Danmark sinnerlugu utoqqatsermat Maalia Skifte Nuummi neriniartarfimmi Kylling & Co-mi issialluni oqarasuaatiminit toqqaannartumik malinnaavoq.
Oqarasuaatimini isiginnaagaa pingaaruteqarpoq. Oqaluttuarisaaneq.
- Utoqqaat attortisimasut takullugit attortinnartoq isumaqarpunga, nassuerutiginninnermi taakkununnga isumalerujussuuvoq. Tamanna naapertuuttoq isumaqarpunga, Maalia Skifte oqarpoq.
Qanigisani 60-kkunni arnat 4.500 missaaniittut spiralilersorneqarneranni eqqugaasimasoq ukioq manna siusinnerusukkut paasivaa. Malia Skiftelu taamaalinerani suliamut annertunerusumik soqutiginninnerulerpoq.
Taarsiissutissat talimut napisimasumut nipinnertuuliinertut misinnarput. Tassa tamanna pillugu taama misigisimavunga. Annerusumilli iliuuseqarfigisinnaanngilarput.
- Maalia Naasunnguaq R. Skifte, Nuummi GUX-imi ilinniarnertuunngorniartoq.
Spiralilersuisimanermi suliaq oqaluttuarisaanermi immikkoortut taartut tamatuma siorna ilaanniiginnarsimavoq.
- Tassunga tunngasut atuartalerakkit, ikinngutikkalu oqaloqatigisalerlugit, aallaqqaammut kamaammerlungalu akuersaarneqarsinnaanngitsutut isigaara, taanna oqaluttuarpoq.
- Spiralilersuisimaneq pisimasunut tamanut attuumassuteqalersimavoq. Annerusumillu iliuuseqarfigisinnaanngilarput, taanna oqarpoq nangillunilu:
- Arnaq ilisarisimasara taamatut pineqarnikoq paasigakku tamanna initunerulerpoq.
Oqalugiarnermut ilinniarfik siorna novembarimi aallartimmat Maalia Skiftelu oqalugiaatissaminik allaaserinnittussanngorami affarmik Europamiuuneq affarmillu kalaaliuneq oqalugiaatiginiarlugu aallaqqaammut eqqarsarsimagaluarpoq.
- Pikkunaappallaarsorivarali, eqqaarsarluaqqeriaramalu spiralilersuinermik suliaq oqalugiaatiginiarlugu aalajangerpunga, taanna oqarpoq.
Operami aaqqissuussami assigiinngitsorpassuit oqalugiaatigineqarput, soorlu ammip qalipaataa aallavigalugu immikkoortitsineq Ruslandillu Ukrainemik tiguaanera.
Assi: Benjamin Nørskov
Arnaq nalunngisani, akusereqqaartinnagu spiralilersissimasoq sianerfigalugu oqaluttuaa oqalugiaammini eqqartorsinnaanerlugu aperaa.
- Aallaqqaammut naaggaarpoq, naggataatigulli akuersivoq, Maalia Skifte oqaluttuarpoq.
Oqalugiaatissani allappaa, sungiusarpoq, aappersarissallu iluamik taasarnissai sungiusarpai. Oqalugiarninilu siulleq Nuummi ilinniarnertuunngorniaqatimi saani ingerlappaa.
Decemberip qaammataagaa oqaluttuarisaaneq pillugu atuartillugu mailianut takkuttoqarpoq.
Operami 2026-mi maajip 22-ani oqalugiarnermut RØST-imut peqataarusuppit?, allassimavoq.
- Arpaannaq atuartitsiffimmiit anillungalu anaanannut sianerpunga. Tigummagu Operami oqalugiartussanngorlunga nilliallunga oqarfigaara, Maalia Skifte oqaluttuarpoq.
Misigisaq killitsinnartoq
- Nammineerlunga tassaniinngilanga, nakorsarli qallunaaq oqaatsit ilisimanngisakka atorlugit oqaluttoq tusaasinnaavara, qullernik inngianartunik tappingerneqarpunga, malugisinnaavaralu nalikkaannut atortorissaarutit nillertut mangunneqartut, annaasaqarnera malugaara.
Maalia Skiftep nipilersoqatigisartakkani peqatigalugit tusarnaartitsisarnertik sungiusimalluinnarpaa, taamaammallu tusarnaariat saavanni sassarnissaq sungiusimavaa.
Operalli inersuani kisimiilluni oqaluttarfimmi pappiaqqanik tigumiarluni nikorfaneq allaanerulluinnarpoq. Maalia Skifte balkonnginik qullernillu inngianaqisunik ungaluneqarsimavoq, tusarnaariallu issiavii saarliit sisamat taamaallaat isigisinnaasimavai.
- Opera angisoorujussuuvoq. Tusarnaarialli saarliit kisiisa isigisinnaaneri toqqissiallannarpoq, oqarpoq.
Maalia Skiftep siunissami amerlanernik oqalugiartassalluni neriuutigaa. Tusarnaarneqarneq nuannersuusoq taanna isumaqarpoq.
Assi: Benjamin Nørskov
Oqalugiaammi tusarnaarianit qanoq tiguneqarnissaa pissanngatigaa.
- Oqalugiaat oqimaatsumik imaqarpoq, tusarnaariallu nunatsinni oqalugiaqqaarninnit allaanerusut malugisinnaavakka. Soorunalimi amerlanerit spiralilersuineq tusareersimavaat, tamannali taakkuninnga kaasarfimmiorineqanngilaq, taanna oqarpoq.
Maalia Skiftep oqaatsit oqalugiaatissamini allassimasut kingulliit atuareerlugillu anaanani inersuarmi issiasoq toqqarlugu qiviarpaa.
Maalia Skiftelu tupippoq.
Oqaluttarfimmiit oqaluttarfiup tunuanut pigami anertikkarluni aallartippoq. Oqalugiaatit inuusuttunit allanit oqalugiaatigineqareersut, aaqqissuussarlu naammassimmat, anaanani – ilisarisimasanilu allat oqalugiarnissaanut tusarnaariarsimasut pakkutaarpai.
- Efterskolerninni ikinngutiginerpaasara oqalugiarnissannut Skivemiit Københavnimut tusarnaariarpoq, Maalia Skifte oqaluttuarpoq.
Oqalugiartut allat arlallit takkullutik Maalia Skifte tuiisigut pattalaarpaat.
- Nuanneqaaq. Oqalugiartut allat pitsaasumik oqalugiarput, taakkuninngalu nersualaarneqarneq isumaqaqaaq, qungujulalluni oqarpoq.
- Oqalugiaatigisara tulluusimaarutigeqaara. Nuanneqaaq.
- Naapertuilluartoqarnissaa naatsorsuutigaara
- Annaasaqarsimanermi oqaaseq kannguttaatsuliorneq atussallugu annikippallaarpoq. Kingunipilui assigiinngillat, kinguaariinnullu tulliuttunut, uagutsitut pinngortussaasimanngikkaluartunut, amerlasuunut sunniuteqartussaavoq.
Maalia Skifte 2008-mi, spiralilersuinerup aallartinneraniit ukiut 61-it qaangiuttut, inunngorpoq. Taassumalu kinguaariit arlallit 60-kkunni 70-kkunnilu arnat danskit nakorsaanit spiralilersorneqarsimasut, eqqartortuassagaat neriuutigaa.
- Taama neriuppunga, tamannami oqaluuserineqartariaqarpoq, taanna oqarpoq.
Spiralilersuinermimi eqqugaasut, Maalia Skiftep oqalugiaammini eqqaasai, apeqqutinik akissutissarsinissaminnik suli pisariaqartitsipput.
Ilaatigut spiralilersorneqarsimasut 300.000 koruuninik danskit naalagaaffiannit taarsiiffigineqarnissaanik decemberimi suaaruteqarneq eqqugaasunut suli piviusunngortinneqanngilaq.
Angalasartut immikkuullarissut ukiaru arnat taarsiivigineqarnissamik qinnuteqarnissaannut ikiuuttussat angalatinneqassasut Patientertatningen Danmarks Radiomut qanittukkut nalunaaruteqarpoq.
Aammattaaq immikkut ilisimasallit 2024-mi misissuinerat, spiralilersuinermut atatillugu inuit pisinnaatitaaffiinut tunngasunik misissueqqissaariffiusoq, nutserineq pissutigalugu kinguaattoorfiuvoq.
Nalunaarusiat maajimi saqqummersinneqartussaagaluarput, maannakkulli aggustimut kinguartinneqarput.
- Spiralilersuineq pillugu suliaq — utoqqatserneq, taarsiissuteqarnissaq immikkullu ilisimasallit misissuinerat — qanoq misigisimavigit?
- Taarsiissutissat talimut napisimasumut nipinnertuuliinertut misinnarput, Maalia Skifte taama akissuteqarpoq, Operamilu oqalugiaammini oqaatigisani uteqqippai.
- Tassa tamanna pillugu taama misigisimavunga. Annerusumilli iliuuseqarfigisinnaanngilarput. Naammanngilaq, annerusumilli iliuuseqarfigisinnaanngilarput.
- Immikkut ilisimasallit misissuinerat naatsorsuuteqarfigaajuk?
- Arnat kalaallit naapertuilluartumik pineqarnissaat naatsorsuutigaara, sumiiffimmimi sumiluunniit tamanna akuerineqarsinnaanngilaq.
