Sulitilluni ajutoortoqarneratigut ajunaartoqartoq

Ilulissani mittarfiliornermi napparussuarmik ikkussuisoqarnerani sulinermi ajutoortoqartoq Greenland Airports pingasunngornermi nal. 13.20 nalunaarpoq.

Napparussuarmi inuk suliaqartillugu napparussuaq uppissimasoq suliffeqarfik nassuiaavoq. Greenland Airports naapertorlugu annaassiniartartut ingerlaannaq kalerrinneqarlutillu ikiueqqaarneq ingerlanneqarpoq.

Ajutoortorli peruluttoq, kingusinnerusukkullu toqukkut qimaguttoq Greenland Airports nalunaarpoq, inunnullu sumiiffimmi najuuttunut tarnip pissusaanik ilisimasalinnit ikiuigasuartoqarnissaa sulissutigineqarpoq.

"Pisoq alianartorujussuuvoq aammalu toqusup ilaqutaannut qanigisaannullu misiginneqataangaarnera oqaatigerusuppara,“ Greenland Airportsimi suliniutinut pisortaq Christian Andersen oqarpoq nangillunilu:

"Pisup ingerlasimaneranik sukumiisumik misissuinissaq maannakkut aallartissavarput, taamaalilluni suut ajutoorfiusimanersut eqqortumik paasinarsisinneqassalluni,” taanna oqarpoq.