KL

DK

Martha Abelsen kommunalbestyrelsimi ilaasortaajunnaassasoq

Martha Abelsen Kommune Kujallermi isumaginninnermut pisortanngorsimanerminut atatillugu Kommuneqarfik Sermersuumiit nuussaaq.

Martha Abelsen Kommuneqarfik Sermersuumi kommunalbestyrelsimi ilaasortaajunnaarnissaminik qinnuteqarsimavoq.
Thomas Munk Veirum Tusagassiortoq
Saqqummersinneqarpoq

Kommuneqarfik Sermersuumi kommunalbestyrelsip pingasunngornermi ataatsimiinnerani politikeri Martha Abelsen (S), kommuni qimallugu nuunnissani pissutigalugu kommunalbestyrelsimut ilaasortaajunnaarnissaminik qinnuteqarsimasoq, inuulluaqqussavaat.

Martha Abelsen misilittagaqarluartoq isumaginninnermut pisortatut atorfinitsinneqartoq Kommune Kujallermi maajip naanerani nalunaarutigineqarpoq.

Martha Abelsen siornatigut isumaginninnermut naalakkersuisuullunilu naalakkersuisoqarfimmut tamatumunnga pisortaasimavoq.

Martha Abelsen siorna kommunimut qinersinermi borgmesteriusumut Avaaraq S. Olsenimut (IA) unammillertaavoq.

Martha Abelsen Kommuneqarfik Sermersuumi taaguunneqarnerpaalluni 713-inik taaneqarpoq. IA-li partiitut Siumumit amerlanerusunik taaneqartoq naggataatigut borgmesterinngortitsivoq.

Martha Abelsenip tunuarnera illoqarfiit pingaarnersaata kommunalbestyrelsiata pisortatigoortumik akuerisussaavaa, tamannalu aqutsisoqarfiup innersuussutigaa.

Taarsiullugu kommunalbestyrelsimi ilaasortaq Angutimmarik Hansen (S) Abelsen sinnerlugu ilaasortanngussaaq.

Martha Abelsen atorfittaamini juulip aallaqqaataani sulilissaaq.

inuiaqatigiit martha abelsen kommunalbestyrelse isumaginninneq kommune kujalleq kommuneqarfik sermersooq

Atorfiit tamaasa takukkit

PODCASTI

Powered by Labrador CMS