Assit takukkit: Nuna suli ikummarissisarmat qamisarneqaqattaarpoq

Sisimiut avannaatuginnguani Kangerluarsuk Ungallermi nuna ikuallareersimalluni massakkut innertaarussimavoq, aamaarnernillu ikummarissisoqaraangat qamisaaneq ingerlanneqartarpoq.

- Suli nuna ikuallaffiusoq nakkutigineqarpoq, qatserisartut aamaartunik takugaangamik qatserisarlutik, ulluni tulliuttuni taamatut ingerlagallassaagut, Inunnguaq Lundblad, Qeqqata Kommuniani upalungaarsimanermut pisortaq nassuiaavoq.

Sisimiut avataaniit qatserisartunik ikiuukkiartortussanik tikisitsinissaq unitsikkallarneqarsimavoq, sulili Nuummi Maniitsumilu qatserisartut piareersimatitat aallariataarnissaminnut sillimaqquneqarput.

Qatserisartut arfineq-marluk nunami ikuallassimasumiitinneqartut

Kangerluarsuk Ungallermi qatserisartut arfineq marlukkaarlutik sumiiffimmi suliaqarput. Qatserisartut paarlagiiaallutik sulisarput, paarlaannissalli aalajangersimasumik piffissalerneqarsimanatik, ataasiakkaanik nikerartumik paarlaasoqartarluni.

AAMMA ATUARUK

Sisimiut avannaatunginnguani nuna ikuallattoq aqunneqarsinnaalersimavoq

- Qatserisartut ilaqarput Kangerluarsuk Ungallermi ulluni pingasuni sulisunik, sivisunerpaamillu ulluni pingasuni nunami ikuallaffiusumi suleqataasoqartarpoq, Inunnguaq Lundblad oqarpoq.

Nunap sivinganera unammillernarnerpaasoq

Kangerluarsuk Ungallermi nunap sivinganera ikuallannermik qamisaaniarnermi ajornakusoortitsinerpaavoq.

- Nunap ilusaa, tassa sivinganera aqqutilunneralu qatseriniarnermi unammillernarnerpaavoq, kangerluullu iluaniikkami qatserisartunut kialluni, Inunnguaq Lundblad oqarpoq.

Inunnguaq Lundbladip oqarnera naapertorlugu Sisimiut eqqaa pujorpoq isugutalluni.

- Kangerluarsuk Ungalleq putsup angumanngilaa, neriuppunga siallilaassasoq, Inunnguaq Lundblad oqarpoq.