EQQAAMIUTIGINEQARTUNIK ISUMAGINNEQ
Eqqakkat 60 tons ullormut ikuallanneqartalissapput
Nuup illoqarfiani eqqakkanut ikuallaavissuaq nutaaq maannakkut iluarsaanneqarpoq, sapaatip akunnerata tulliani tamakkersoqqilernissaa naatsorsuutigineqarluni, taamak ilisimatitsivoq ESANI-mi pisortaq Frank Rasmussen. Ukioq ataatsip qaangiunnerani ikuallaavik taamaattoq Sisimiuni aamma piareerneqassaaq.
Eqqagassalerineq nunatsinni ukiorpassuarni annertuumik ajornartorsiutaanikuuvoq. Ukiut taakku ingerlanerini eqqakkat qanoq peerneqartassanersut pillugu aaqqiissutissarsiortoqartaraluarluni ajornartorsiut aniguinneqarsinnaasimanngilaq, tamatuma malitsigisaanik allaat illoqarfinni arfinilinni eqqakkanut ikuallaavittaartortitsisoqarnikuuvoq nunaqarfinnilu ikuallaaveeqqat 30-it ikkussuunneqarnikuullutik.
Taamaattorli ikuallaavippassuit tamakku ingerlanneqarnissaannik ajornartorsiuteqarsimaneq immini immikkut oqaluttuassartanut ilaavoq, tassami ikuallaavippassuit tamakku amerlanersaat iluamik atorneqarnikuunnginnamik.
Kisianni maanna ajornartorsiut anigorneqarsinnaalerpasippoq, kommuninut ESANI-mut, Kalaallit Nunaata ataatsimoortumik eqqagassaleriffianut, ilaasortaasunut aaqqiissutissat timitalersorneqarput maannakkut. Kommunit tamarmik Avannaata Kommunia eqqaassanngikkaanni ESANI aqqutigalugu eqqagassalerisitsipput.
Nuuk piareerpoq Sisimiullu ukiup ataaseq qaangiuppat piareersimassaaq
Maanna Nuummi ikuallaavik aaqqissuunneqarpoq sapaatillu akunnerata kingorna eqqakkanik ikuallanneq aallarteqqissalluni, Frank Rasmussen oqaluttuarpoq.
Maajip qiteqqunnerani ikuallaavik Nuummiittoq qaammat ataaseq misilerarneqareerluni aniguivoq tamakkiisumillu atulerneqarluni.
- Kisianni ikuallaavik nutaajuvoq, taamaammallu aallarnisarnermi naleqqussarneqarnissaa mikisualuillu iluarsaanneqarnissaat piffissartorfigeqqaalaarpagut, taamaattumik aallartisaanermi iluarsaassinerit pisariaqartinneqartarnerat aamma maani atuuppoq, Rasmussen nassuiaavoq.
Nuummi eqqakkanik ikuallaavik maannakkumuugallartoq illoqarfippassuarnit nunaqarfippassuarnillu ikuallatassanik nassissorneqarpoq, Frank Rasmussenillu ilisimatitsissutigaa misileraanermi qaammatip ingerlanerani eqqakkat 1.400 tonsit missaat ikuallanneqareersimasut.
- Nuuk maannakkorpiaq sinerissap sinneranit eqqakkanik ikuallatassanik tigusisarpoq, kisianni Sisimiut eqqagassanik ikuallatassanik tigusinissamut piareersimappat, Nuummi ikuallaavik eqqakkanik ikuallatassanik Nuummeersuinnarnik ingerlarsulissaaq, Sisimiuniittorlu sinerissap sinneranit eqqakkanik ikuallaavinngortinneqassalluni, naatsorsuutigaarpullu ukiup ataatsip ingerlanerani taanna piareerumaartoq, pisortaq Frank Rasmussen nassuiaavoq.
Ullormut eqqakkat 60 tonsit ikuallanneqartassapput
Nuummi Sisimiunilu ikuallaavissuit assigiipput avataaniillu aqunneqarsinnaallutik, taamaattumillu pitsaasumik tatiginartumillu ingerlanneqarsinnaallutik. Sisimiuni ikuallaavissuaq ukioq ataaseq qaangiuppat atorneqarsinnaalernissaa naatsorsuutigineqarpoq.
Ikuallaavissuit immikkut ullup unnuallu ingerlaneranni 60 tonsinik ikuallaasinnaapput tamannalu Nuummi ikuallaavitoqqamut ullormut 38 tonsit missaannik ikuallaasartumut sanilliullugu pitsanngoriaataavoq ersarissoq.
ESANI A/S Nunatsinni assigiinngitsutigut eqqagassalerinermi aaqqiissutinik avatangiisimik piujuartitsisussanik nassaarniarluni sulissuteqarpoq. Ikuallaavissuit nutaat saniatigut Qaqortumi Maniitsumilu uuliakumik tigooraavimmik pilersitsinissaminnik kiisalu illoqarfinni nunaqarfinnilu tamani eqqagassanik ikuallanneqarsinnaasunik aallernissamut aaqqissuussinissamik qulakkeerinninnissamik pilersaaruteqarput.
Suliniut taanna siunissami Nunatsinni avatangiisip asseqanngitsup illersornerani teknologiit nutaaliaasut ikiuuteqataanerisigut piujuartitsinerulernissamut alloriarneruvoq pingaarutilik.
