Eqqartuussissuserisoq arfernik illersuisup tunniunnissaanut akerliulluni arlalinnik tunngavilersuivoq
Killiligaanani oqaaseqarsinnaaneq eqqartuussinermilu naapertuilluartumik pineqarsinnaatitaaneq tunniussinissamut akerliusut ilagaat.
Avatangiisinik illersuisoq Paul Watson Kalaallit Nunaanni tigusarineqarpoq, Japanillu tunniunneqaqquaa. Toqqorsivimmit.
Assiliisoq: Howard Burditt/Reuters/Ritzau Scanpix
Naak eqqartuussissuserisoq Jonas Christoffersen suli sullitami, avatangiisinik illersuisut ilaata Paul Watsonip, tunniunneqarnissaata qinnutigineqarnerata uppernarsaataanik tunineqarsimanngikkaluarluni, Watsonip tigummigallarneqarnissaa tunniunnissaaluunniit tunngavissaqanngitsoq qularutiginngilaa.
- Paul Watsonip Japanimut tunniunneqarsinnaannginnera tunngaviusumik isiginnittariaaseraarput, tamatumunngalu assigiinngitsunik pissutissaqarpoq, Jonas Christoffersen Ritzauimut oqarpoq.
Ilaatigut innersuussutigaa Watsonip 2010-mi Japanimiunut arfanniummut saassussinermi peqataanera illersuisup allap pinerloqqinngikkaanni naammassineqartussaanngitsumik eqqartuunneqarneranik kinguneqartumit iliuusai ajornerunngitsut.
Taannali, Watsonitut pinnani, tigusarineqarpoq kingusinnerusukkullu Japanimi eqqartuussivimmi unnerluutigineqarluni.
Taamaattumik Paul Watsonip tigusatut tigusaanissaa eqqartuussutip ilimagineqarsinnaasup nalinganut naleqquttuunngilaq.
- Uagut isumaqarpugut ukiut 14-it matuma pisimasoq pissutigalugu angut malersorneqarsinnaanngitsoq, aappaa pinerloqqinngikkaanni naammassineqartussaanngitsumik eqqartuunneqarsimatillugu. Tamassumami takutippaa allaat Japanimi eqqartuussisut taamanikkut tamanna annertuutut isiginngikkaat, Jonas Christoffersen oqarpoq.
Aammattaaq Christoffersen naapertorlugu Japanip Qalasersuarmi kujallermi arfanniarnerata inerteqqutaanera pingaaruteqarpoq. 2014-imi Nunat Tamalaat Eqqartuussiviata tamanna aalajangerpaa. 1986-imi nunat tamalaat isumaqatigiissutaat, inuussutissarsiutigalugu arfanniarnerup inerteqqutaalerneranik isumaqatigiissut, aamma Danmarkip atsiorsimasaa, eqqartuussiviup innersuussutigaa.
Watsonip suliniuteqarnera killiligaanngitsumik oqaaseqarnissamut tunngatillugu isigineqassaaq, 2012-imiilli Japanip Interpol aqqutigalugu Watson nunani tamalaani ujaarilermagu, maannalu Kalaallit Nunaanni tigusarineqarnerata kingorna, pisut tamarmik taassuma killiligaanngitsumik oqaaseqarsinnaaneranut taamalu inuit pisinnaatitaaffiinut innarliinerupput.
- Japanimiut assigalugit tigusatut Danmarkimi sivisuumik parnaarussaaqqatitsiniarnermut ilanngukkaanni, taava akerliuniat taakkua piumasaatut iliortoqassaaq. Taamaappat ingerlaannaq pillarneqarsinnaaginnarnavianngilatit, aammali ukiuni 15-ini Interpolimit ujaarineqarsinnaavutit, Jonas Christoffersen oqarpoq.
Jonas Christoffersen naapertorlugu inuit pisinnaatitaaffii tassaaginnanngillat killiligaanngitsumik oqaaseqarsinnaaneq, aammali eqqartuussivimmi naapertuilluartumik pineqarsinnaatitaaneq ataqqinninngitsumillu pineqannginnissaq pisinnaatitaaffiupput.
/ritzau/
