Eqqartuussissuserisunngorniartoq

Ida-Marie Rasmussen Ilisimatusarfimmi inatsisilerinermik bacheloritut kandidatitullu ilinniagaqarsimasuni siullersaalluni, Nuna Law aqqutigalugu Nuummi ukiuni pingasuni eqqartuussissuserisunngorniarluni ilinniarnissani maanna aallartippaa.

Tamanna 2025-mi aqqutissiuunneqarpoq, Danmarkimi inatsiseqarnermut ministereqarfiup taamani aalajangermagu, Ilisimatusarfimmi inatsisilerinermut kandidatinngorniarnerup Qallunaat Savalimmiormiullu kandidatitut ilinniartitaanerannut naligitinneqalernissaa. Taamaalilluni assersuutigalugu inatsisilerinermik ilinniagaqarneq, Nunatsinni eqqartuussissuserisunngorniarluni ilinniaqqinnissamut atorneqarsinnaalluni. Ilinniartut eqqartuussissuserisunngorusuttut inatsisilerinermik ilinniarniarlutik siornatigut Danmarkiliartariaqartarput.

Tulluusimaarlunilu maniguuttoq

– Ukiut pingasut ingerlaneranni eqqartuussisutigut suliamik misilitsissaanga aamma allattariarsornermi eqqartuussissuserisutut soraarummiissallunga. Siunissami takorluugara suliakkut ineriartortuarnissara eqqartuussissuserisutullu pikkorissunngornissara, taamaalillungalu Nunatsinni inatsisinik atuutsitsinerup ineriartortinnissaanut tapersiisinnaajumallunga. Uannut pingaaruteqarami ilikkakkama sulilu ilinniartuarnerma allanut iluaqutaanissaat, aamma inatsisilerituutut kingusinnerusukkullu eqqartuussissuserisunngorlunga Nunatsinni sulinikkut naleqarnerulersitsisinnaanissara, Ida-Marie Rasmussen oqarpoq.

– Uannut pingaaruteqartorujussuuvoq aamma tulluusimaarutigaara maniguullungalu siullersaallunga (kingusinnerusukkut amerlanerujussuussasut neriuppunga) Nunatsinni bacheloritut kandidatitullu ilinniagaqarsimasutut eqqartuussissuserisunngorniarlunga aallartikkama. Aamma uannut pingaaruteqartorujussuuvoq illoqarfigisanni ilaquttakka najorlugit ilinniarnissamut akuerineqarama. Tamanna nalunaaquttap akunnerpassuinik

ilungersorluni sulinermik piumasaqarfiuvoq ilaannikkullu ajornakusoortarlunilu qasunartarpoq. Kisianni iluaqutaavoq imminut akilersinnaallunilu, maannami maaniippunga, Ida-Marie Rasmussen oqarpoq immikkut ilisimatusarluni allaaserisani juunip arfineq-pingajuanni illersoriartoramiuk.

Akiliisinnaajunnaarnermut inatsit soqutigigaa

Ida-Marie Rasmussenip akiliisinnaajunnaarnermut inatsit sivisuumik soqutigisimavaa, tamatumunngalu ilaalluni akiliisinnaajunnaartoqartillugu mattusimatinneqarnermut malittarisassat, Nunatsinni suli atuutilersinneqarsimanngitsut.

– Danmarkimi suliffeqarfinnik akiliisinnaajunnaartitsisarnikkut inuiaqatigiit iluanaarniartunut illersorneqarnissaannut malittarisassat maani amigaataanerat allaaseraara. Malittarisassat taamaattut Nunatsinni atuutilersinneqartariaqarput.

– Akiliisinnaajunnaarnermut atatillugu sulianik mattussisarneq, akiliisinnaajunnaartup pigisaanik isumaginnittup akiliisinnaajunnaartup akiitsoqarfiinit atornerluisoqannginnissaanut illersuutigisussaavaa, tassa akiitsoqarfigineqartut akiitsoqarnerulersitsinermikkut akiitsoqartup aningaasatigut annaasaqarneranik kinguneqartussanut. Piginneqatigiiffinni aktiaatileqatigiiffinnilu akiitsullit inuttut akisussaaffeqanngillat. Taamaattumik suliffeqarfimmik aaqqissuussinerit atornerlunneqarsinnaapput, akiitsoqarnerujartuinnartillugit pilersitsinikkut, akiliisinnaajunnaarneq pillugu suliamik aallartitsisoqarneratigut akiitsoqartut aniguisitaasinnaallutik. Immikkut allaaserisanni Danmarkimi malittarisassanut assingusunik akiliisinnaajunnaarnermut atatillugu mattussisarneq pillugu maleruagassat Nunatsinni assingusumik atuutilersinneqarsinnaanerisa pitsaaqutaat misissuiffigivakka.

Atuagarsornermit piviusunut

Ida-Marie Rasmussen ilinniarnermini piffissap annersaani Nuna Law-imi suliffeqarpoq, naak ulloq naallugu suliffiup ilinniakkallu ataqatigiissaarnissaat sapernartaraluartoq, tamanna imminut akilersinnaasoq oqaatigaa.

– Inatsisinut tunngasunik assigiinngitsorpassuarnik suliaqarsinnaanera iluatsitsissutigeqaara, taamaalillungalu inatsisilerinermut tunngatillugu soqutigisannik paasinnissinnaalerpunga.

– Ilinniarninni atuagarsornikkut ilinniarninni ilikkakkakka Nuna Law-imi piviusumi atorsinnaanerisigut, inatsisilerinermi tunuliaqutaasunut paasinnilluarneruvunga. Ilinniarfimmilu ilikkakkakka sulininni atorluarsinnaavakka, taakkulu pitsaasumik imminnut tapertariipput.

Eqqartuussissuserisunit pikkorissunit ilinniartinneqarneq

Ida-Marie Rasmussenip inatsisilerinermik ilinniarfimmi ilinniartitsisut aamma eqqartuussissuserisut sulisitsisorisani, suliaminnut ilisimasaminnik tunniussaqartartut nersualaaginnarsinnaavai.

– Suliakkut ineriartornera pingaartumik eqqartuussissuserisunit pikkorissorpassuarnit, misilittakkaminnik ilisimasaminnillu avitseqatiginnittartunit, ilinniartinneqarsimanera pissutaavoq. Ilinniarninni unammillernartoqartillugu aamma oqaloqatigilluartarpaannga. Inatsisinik suliaqarnissamut akuerineqarnera aamma suliakkut imminut tatiginerulersitsivoq, Nuna Law-illu eqqartuussissuserisumut fuldmægtigitut atorfinitsitsinermigut ilinniarnermik aallartitsinissannut piareersarluarmanga, eqqartuussissuserisunngorniarnissannut ingerlaqqinnera pissusissamisuuginnarpoq.

Inatsisilerinermik soqutigisaqaqatigiinneq

Aallaqqaammut aqqaneq-marluullutik inatsisilerinermi kandidatinngorniarlutik aallartipput, taakkunanngalu qulit, Ida-Marie Rasmussen ilanngullugu, ilinniakkaminnik maanna naammassinnissimallutik.

– Peqatigiittarnerput nuanneqaaq, tamatta inatsisilerinermik soqutigisaqarnerput ataatsimoornerulersitsisarpoq, tamattami ilinniagaqarnissarput aallussimagatsigu tamannalu ilinniartitsinermi pissarsinarnerusarluni. Arlalissuulluta ilinniarnitta saniatigut suliffeqareeratta, taamaalillutalu ilinniaqatitta piginnaasamikkut suliffimminnilu qaffakkiartornerat malinnaaffigalugit nuannertarluni.

Nunatsinni eqqartuussissuserisut amerlanerusut pisariaqartinneqarput, Ida-Marie Rasmussenillu inatsisilerituunngorniarneq eqqartuussissunngorniarnerluni allanut inassutigerusunnissaat qularutiginngilaa.

– Inatsisilerinermik suliaqalernissamik eqqarsaateqartunut tamanut aamma Ilisimatusarfimmi inatsisilerinermi bacheloritut ilinniagaqarsimasunut, taamaattorli kandidatinngorniassanerlutik nalornisunut tamanut. Inatsisilerituunik Nunatsinni inuiaqatigiinni pissutsinik ilisimasalinnik pisariaqartitsisorujussuuvugut, ilinniakkallu naammassineratigut soqutiginartunik periarfissarpassuaqarlunilu suliffimmi qaffakkiartornissamut periarfissarpassuaqarluni.