64-inik ukiulik P Danmarkimi ukiuni 22-ni maannamut parnaarussaaqqasumut suliaq Nunatta Eqqartuussisuuneqarfiani tallimanngornermi suliarineqarpoq.
P piffissaligaanngitsumik parnaarussanit allanit allaaneruvoq, taannami pillugu suliaq Eqqartuussiviit Qullersaanni suliarineqarnikuuvoq. Tamanna 2023-mi Nunatta Eqqartuussisuuneqarfiata P-p iperagaanissaanut aalajangiinialermat pivoq. Eqqartuussiviilli Qullersaannit itigartitsissutigineqarpoq.
64-inik ukiulik P Danmarkimi ukiuni 22-ni maannamut parnaarussaaqqasumut suliaq Nunatta Eqqartuussisuuneqarfiani tallimanngornermi suliarineqarpoq.
P piffissaligaanngitsumik parnaarussanit allanit allaaneruvoq, taannami pillugu suliaq Eqqartuussiviit Qullersaanni suliarineqarnikuuvoq. Tamanna 2023-mi Nunatta Eqqartuussisuuneqarfiata P-p iperagaanissaanut aalajangiinialermat pivoq. Eqqartuussiviilli Qullersaannit itigartitsissutigineqarpoq.
Taamaattumik maanna ukiut marluk qaangiuttut Nunatta Eqqartuussisuuneqarfiani qanoq aalajangiiffigineqassanersoq pissanganarpoq. P-p taassumalu illersuisuata Herstedvesterimiit internetsikkut isiginnaarut atorlugu peqataaneranni tallimanngormat aalajangiiffigineqarpoq.
P sisamariarluni nakuusersimasutut pisuutinneqarluni 2003-mi piffissaligaanngitsumik parnaarussassanngorlugu eqqartuunneqarpoq. Siusinnerusukkulli pinerluuteqartareersimavoq. P piffissap ingerlanerani immikkut pisinnaatitaaffeqalernikuuvoq, soorlu ilaquttani Jyllandip avannaaniittut tikeraarsinnaanngornikuullugit.
Nakorsaaneq iperagaanissaanut akerliusoq
Unnerluussisussaatitaasup Aprilia Jespersenip P-p siuariartornera allaqqaasiutigaa. Iperagaanissaali siusippallaartoq unnerluussisussaatitaasoq isumaqarpoq.
Piffissaq sivisooq atorlugu inuiaqatigiinnut akuleruteqqinniarnissaa pisariaqartoq, tassa akisussaaffimmik tigusisinnaanersoq takuniarlugu periarfissai amerlisikkiartuaarnerisigut, oqarpoq. P iperagaanissaminut suli piareersimanngitsoq nakorsaanerup uppernarsaataa unnerluussisussaatitaasup aamma tunngavilersuutigaa.
Illersuisorli Vilhelm Dickmeiss akerliuvoq. P pinerluutigisaata sakkortussusaanut sanilliullugu sivisuallaamik parnaarussivimmiissimasoq taanna isumaqarpoq. Nakuusernermut eqqartuunneqarnerit sisamat ukiuni 22-ni parnaarussaaqqanermik kinguneqartut.
Ajorsarneq neriuummik nassatalik
P anisinnaatitaagaagami periarfissaqaraluarluni imigassartorneq ajortoq illersuisup aamma erseqqissaatigaa. 2018-imiilli quuanik misissukkat aalakoornartumik akoqarneq ajortut, Dickmeissip naqissuserpaa. P-mi aalakoorluni nakuusertarsimavoq. Taamaattumik taassuma navianarunnaarsimanera eqqartuussivimmut uppernarsineqassappat aalakuunnginnissaq pingaaruteqarpoq.
P iperagaaguni Jyllandip avannaani nutaamik inuuneqalerusunnini nammineq oqaluttuaraa.
Tamannali qanittukkut pisinnaanngitsoq nunap eqqartuussisuata Kirsten Thomassenip eqqartuusseqataasullu marluk unnerluussisussaatitaasoq isumaqatigaat: P-p iperagaanissaanut suli piffissaanngilaq. Iliuuseqarnerusariaqarpoq.
Eqqartuussisulli pissutsit paasisinnaavai. P-p inuiaqatigiinnut akuleruteqqinnissaanut pilersaarusiorluarnerunissaq pisariaqarnerarpaa, taamaaliornikkummi misiligummik iperagaasinnaanissaanut aqqutissiuunneqassammat.
P-mut suliaq pilersaarutit malillugit ukiut marluk qaangiuppata eqqartuussivimmi suliareqqinneqassaaq. Piumasaqarnikkulli siusinnerusukkut pisinnaasoq eqqartuussisup eqqaasitsissutigaa.
Taamaattumik P pissuserissaartuaruni iperagaanissaa qanilliartorunarpoq.
