Inuit Ataqatigiit Siumullu 2022-mi apriilimi naalakkersuisooqatigiinnissamut isumaqatigiissuteqarput, isumaqatigiissullu taanna Siumup nalilersortuarpaa.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Inuit Ataqatigiit Siumullu 2022-mi apriilimi naalakkersuisooqatigiinnissamut isumaqatigiissuteqarput, isumaqatigiissullu taanna Siumup nalilersortuarpaa.
– Naalakkersuisooqatigiinneq suleqatigiinnerlu nalilersortuaannarpagut, Siumup siulittaasua Erik Jensen Inuit Ataqatigiit ataatsimeersuarnissaannut, partiip siulittaasuata naalakkersuisullu siulittaasuata Múte Bourup Egedep politikkikkut sulinerup inissisimaffia partiillu pingaarnertut suliassai pillugit oqalugiarfissaanut, piareersarnermi oqarpoq.
Naalakkersuisoqatigiit assigiinngitsunik isumaqarsinnaasaraluarlutik imminnut tatigisut aqutsinerlu aalajaatsuusoq Siumup siulittaasua oqarpoq.
– Suleqatigiinnerup qanoq ineriartortinneqarsinnaanera oqaluuserisarparput, akornuteqaleraangatta qanoq iliuuseqarfigisinnaanerlugit aamma oqaluuserisarparput ingerlariaqqillutalu. Naak arlaannut assigiinngitsunik isumaqaraluarluta, siulittaasutut aalajangiisartutullu pitsaasumik qanoq iliuuseqarfigisinnaanerlugit oqaluuserisarparput. Tamanna aalajaatsumik tunngaviliisarpoq nunallu aqunneqarnerani ersilluni. Taamaattumik naalakkersuisooqatigiinni suleqatigiinneq pitsaasutut nalilerpara, kisianni suli nalilersorneqassaaq qanoq pitsaanerulersinneqarsinnaanersoq, Erik Jensen oqarpoq, erseqqissarlugulu Siumut siulersuisuunerit, inatsisartut gruppiata partiillu ataatsimeersuarneranni anguniagaat aallaavigalugit naalakkersuisooqatigiinni sulisoqartoq.
Inernerit anguniagassallu pissanngatigigai
Siumup siulittaasuata Inuit Ataqatigiit ataatsimeersuarnerat pillugu oqaaseqarusunngilaq akuliukkusunnanilu, pissanngatigaluguli qilanaaraa ataatsimeersuarnermi sunik angusaqartoqassanersoq, sunik aalajangiisoqassanersoq nutaanillu anguniagaqartoqalissanersoq.
– Partiip ataatsimeersuarnera taavalu politikkikkut isummaminnik namminneq oqaluuserinninnissaat ataqqivara. Ataatsimeersuarnermili Inuit Ataqatigiit oqallinneranni oqariartuutaannilu tusarnaartussanik malinnaasussanillu peqataatitsissaagut, ataatsimeersuarnermilu qanoq aalajangiisoqassanersoq pissanngatigaarput. Naalakkersuisut Inuit Ataqatigiit Siumullu naalakkersuisooqatigiinnissamut isumaqatigiissutaat tunngavigalugu sulipput, isumagalu naapertorlugu ingerlalluarpoq, Erik Jensen oqarpoq.
Aalisarnermut inatsimmut akisussaaqataalerneq akeqarpoq
Inatsisartut aalisarnermut inatsit nutaaq ukiuni 20-ni oqallisigisaareersorlu upernaakkut ataatsimiinnerminni kingullermi akuersissutigivaat. - Aalisarnermut inatsisissamik nutaamik suliaqarniarnermi Inatsisartunut qinersinermik imaluunniit naalakkersuisoqatigiit suleqatigiikkunnaarnerannik kinguneqartarsimavoq, kisianni aalisarnermut inatsisip suliarineqarnerata naammassinissaa manngertitarluta suliarisimavarput. Inuiaqatigiit iluaqutissaannik sulisimavugut akisussaaffitsinnillu tigusilluta, Erik Jensen oqarpoq.
Aalisarnermut inatsisip akuersissutigineqarneranut atatillugu Siumumi ilaasortat ilaat akerliullutik partiimit anipput, Siumumili avissaartuuttoqarluni allanngorartoqarnissaa pissutissaqanngitsoq Siumup siulittaasua isumaqarpoq.
– Ilaasortatta partiimit aniniarlutik oqariartuutaat tunngavilersuutaallu tusarnaarsimavavut, tamannali avissaartuunnissamik, allanngorartoqarnissaanut akisussaaqataanermillu tigusinnginnissamut naammanngilaq. Tusarnaarpavut.
– Suliassani angisuuni tatigineqarsinnaanitsinnik suleqataasinnaanitsinnillu takutitsisariaqarpugut. Aamma qinersisartunut takutittariaqarparput neriorsuutivut eqquutsissinnaanerat, nunalu tamakkerlugu ataatsimeersuarnermi partiip anguniagai naammassigivut, Erik Jensen oqarpoq.
Suliniutit arlallit ingerlasut
Naalakkersuisut akileraartarnermut aaqqissuusseqqinnermikkut isertitakinnerit aningaasaqarnerat pitsanngorsaaviginiarlugit maannakkut suliniuteqartut, suliniutillu allat arlallit aallartinneqassasut Erik Jensen oqarpoq. Aamma naalakkersuisoqatigiit qinigaaffik tamaat suleqatigiissasut qulakkeerpaa.
– Naalakkersuisooqatigiinni suleqatigiinneq pitsaasuuvoq, pitsaanerulersinnaajuaannarporli. Nutaanik aningaasarsiorfinnik ujaasisariaqarpugut aningaasartuuteqarnerulinnginnissarpullu qulakkeerlugu. Naalakkersuisuni immitsinnut tusarnaarpugut, Erik Jensen oqarpoq.
