Erik Jensen (S): Aningaasat amerlanerusut pissakinnerusunut atorneqassapput naligiinnginnerlu annikillisinneqassaaq

- Mianersortumik isumatusaartumillu isumaqatigiissusiorpugut, nalunngilarpullu kikkut tamaasa ataatsikkut nuannaartissinnaanatigit, kissaataammi tamaasa tunniussinnaannginnatsigit. Taamaattorli naliliivunga siunissamut attassiinnarnissaq eqqanaajutigalugu maanna innuttaasut malugilluagassaannik oqilisaanernik qulakkeerinnippugut, aningaasaqarnermut akileraartarnermullu naalakkersuisoq Erik Jensen (S) oqarpoq.

Innuttaasut ikiliartornerat mumisinniarneqassaaq

Erik Jensenip erseqqissaatigaa siunissami innuttaasut nunatsinni katitigaanerisa allanngoriartornera mianersornerminnut pissutaasut annersaannut ilaanerarpaa:

- Innuttaasut utoqqalisartut amerliartorput, meerartaartartut taamaaginnarput, siulittuutigineqarnikuuvorlu 2050-mi innuttaasut 39.000-nnanngorsimassasut, nunatsinnilu ikiliartornissaq ingalassimaniarlugu pisariaqarluinnarpoq aaqqissuusseqqinnerit ingerlanneqarnissaat, taakkulu aaqqissuusseqqinnerit aqqutigalugit atugarissaarneq, taamaalillunilu nunatta inuuffigiuminarnerulernissaa kivinneqarluarpat ikiliartornerput unitsillugu amerliartornissatsinnut periarfissaqarnerussaagut, Jensen Sermitsiamut oqarpoq.

Akileraartarnikkut aaqqissuusseqqinneq aqqutigalugu inuit kaasarfimmioqarnerulissapput

Naalakkersuisooqatigiit maanna atuuttut atuutilermatali akileraartarneq pillugu aaqqissuusseqqinneq piareersarneqarlunilu oqallisigineqartuartartoq, akitsuutitigut oqilisaanerit saniatigut maanna innuttaasut kaasarfimminni malugisinnaasaat timitalerneqartussanngorpoq.

- Akileraartarnerneq pillugu aaqqissuusseqqinneq inituvoq, tassami 366 millioner koruuninik naleqarpoq, sulisartut 24.000-nit ikinnerunngitsut pissarseqataaffigisassaannik maanna iliuuseqartussanngorpugut, Erik Jensen erseqqissaavoq.

Inuunerissaarnerunissaq aningaasaliiffigineqassaaq

Taakku aningaasarpassuit inuit aningaasaateqarnerulissutigisassaattut siunnerfigineqartut saniatigut aamma nunatsinni ataatsimoortumik inuunerissaarnerunissaq annertuumik aningaasaliiffigineqarpoq.

- Pinaveersaartitsineq annertusarneqassaaq, tassani kattuffiit assigiinngitsut timersortartullu suleqatigineqassapput, pingaartumik pinaveersaartitsinermik suliaqarnermi kivitseqataanerunissaat aqqutissiuunneqarpoq, taamaalillutik suliareriikkamik saniatigut pinaveersaartitsinermik suliaqarnissaminnut aningaasaliiffigineqarput.

Kommunit suleqatigalugit sineriak tamaat inerisaaffigineqassaaq

Pingaartumik inissialiornermut tunngatillugu nammineq angerlarsimaffigiligassanik sineriak tamakkerlugu sanaartornermut aningaasaliisoqassasoq isumaqatigiissummi aamma siunnerfigineqarpoq.

- Assersuutigiinnarlugu inissiat inuusuttunut naleqquttut, utoqqarnut piginnaasaqarnerusunut angerlarsimaffiit aammalu nammineq illuutit (95/5 il.il.) ineqarneq pillugu aaqqissuusseqqinneq aqqutigalugu siuarsaaffigineqartussanut ilaapput.

Kommunit eqqartorneqartillugit aningaasaqarnermut naalakkersuisup ilanngullugu erseqqissaatigaa Kommunit Namminersorlutillu Oqartussat suleqatigiinnerat annertusarneqassasoq, aammalu kommunit kissaataat tamaasa tunniussinnaanngikkaluarlugit taamaattoq kommuninut ataatsimoortumik tapiissutit maanna 2 milliard koruunit qaangertussanngoraat Jensen nassuiaavoq.

Tamatuma saniatigut aamma kommunit ataasiakkaat pisariaqartitsineq naapertorlugu suliassaminnik inatsisitigut pituttugaasunik naammassinninniarnerminnik artorsartut oqilisaanneqartassasut, soorlu maanna Kommune Kujallermi isumaginninnikkut suliassat meeqqanut inuusuttunullu aammalu innarluutilinnut sullissinermut tunngasut naalakkersuisunit aqunneqarallalersimasut.

Aningaasaqarnermut inatsit tallimanngornermi 22. novemberimi pingajussaaneerlugu Inatsisartuni oqaluuserineqassaaq inaarutaasumillu taasissutigineqarluni.