“Ernumassutaaqaaq”

Isumaginninnermut aningaasaliineq peqqinnissaqarfimmut sipaaruteqarnerusuusoq oqariartaaserineqartarpoq. Inuimmi toqqissisimasumik inuusaasillit napparsimakulannginnerusarmatagooq.

Nunatsinnili pissutsit allaapput.

Isumaginninnermi pissutsit pitsanngorsarnissaannut peqqinnissaqarfimmullu aningaasat pisariaqartinneqartut nalilerneqarpoq.

Assersuutigalugu nunatsinni napparsimmavinnik peqqissaavinnillu ingerlatsineq 1 milliardit koruunit tungaannut akisunerulerataannaasoq misissuinerit takutikkaat, Folketingimi ilaasortap Aaja Chemnitzip (IA) tamatuma ajornartorsiutaanera naalagaaffeqatigiinneq pillugu Folketingimi ukiumoortumik oqallinnermi saqqummiummagu oqaatigaa.

Peqqinnissaq pillugu Ataatsimiititaliarsuup isumaliutissiissutaa atuaqqissaaritsik tamatumanilu ajornartorsiutip qanoq ilungersunartigisoq paasigitsik, Danmarkimi partiit annersaata, tassa Socialdemokratit Kalaallit Nunaat pillugu oqaaseqartartuata Flemming Møller Mortensenip erseqqissaatigaa.

- Siunissarmi qanoq isikkoqassanersoq misissueqqissaarinerup taassumarpiap takutippaa. Tamannarpiarlu iliuuseqarfigisariaqarparput. Taamaammat Danmarkimi aningaasanut inatsimmi 140 millionit koruunit Kalaallit Nunaata Peqqinnissaqarfiata ukiuni tulliuttuni ikiorserneqarnissaanut immikkoortinneqarmata nuannaarutigaara. Pisariaqarluinnarpormi, taanna Folketingimi oqalugiarami oqarpoq.

“Ilungersunarluinnartoq”

Kalaallit Nunaata sineriaani pissutsit suli ajornerusut, Flemming Møller Mortensenip Folketingimi oqalugiarami politikereqatiminut eqqaasitsissutigaa.

- Allaat Peqqinnissaqarfimmi ulluinnarni suliassat naammassiniarnissaat sulisussarsiorniarneq pissutigalugu ajornakusoortupilussuuvoq, taanna oqarpoq.

Naalagaaffeqatigiinni peqqinnissaqarfiit assigiikannersunik neqoroortarnissaat nunani taakkunani naalagaaffeqatigiiusuni inuiaqatigiinnit naatsorsuutaasoq, Socialdemokratit Kalaallit Nunaat pillugu oqaaseqartartuata oqaatigaa. Peqqinnissamilli oqartussaaffik Kalaallit Nunaata 1992-imi tigunikuummagu, Namminersorlutik Oqartussat Naalagaaffillu tamanna oqaloqatigiissutigeqqissaartariaqaraat, taassuma aamma erseqqissaatigaa. Kalaallit Nunaannili Peqqinnissaqarfiup Danmarkimilu Peqqinnissaqarfiup assigiinngitsunik sullisseriaaseqartarnerisa “isumaqatigiinngissutaasaqinera” AJORNARTORSIUTAAVOQ.

- Taamaannera ilungersunarluinnartoq erseqqissaqqissaarusuppara, Flemming Møller Mortensen oqarpoq.

Danmarkip nunatsinnut aningaasatigut oqilisaanissi isumaliutigiumaaraa, Aaja Chemnitzip neriuutigaa.

- Nunarput Danmarkip ikiorsiisarneranut 180 millionit koruuninik akiliisarpoq. Tamanna – tassa akiliinikinnerusalersinnaanersugut - Danmarkimit nalilersorneqaqqeqqunarpoq. Peqqinnissaqarfipput ernumassutaaqisoq, taanna oqarpoq.

Kræftertunik katsorsaaneq

Naalakkersuisut kissaatigippassuk, Kalaallit Nunaata Peqqinnissaqarfianut ikiorsiinerunissaq taperseritsik, SF-ip oqaaseqartartuata oqaatigaa.

- Kalaallit Nunaannut aningaasaliinerunissaq pisariaqarpoq, ingammik peqqinnissaqarfianut isumaginnittoqarfianullu, taanna oqarpoq.

Folketingimi ilaasortat Atlantikup Avannaaneersut sisamaasuni pingasut naalagaaffeqatigiinneq pillugu Folketingimi oqallinnermi peqataapput. Aki-Matilda Høegh-Dam (N) peqataanngilaq. Peqqinnissaqarfipput nunattalu inuisa nunanut allanut nussornerat Aaja Chemnitzip oqalugiarnermi ilarujussuani sammivai. Taakkua marluk imminnut attuumassuteqartut, taanna isumaqarpoq:

- Nunatsinni najugaqaannarusuttut amerlinissaat inuiaqatigiit ineriartornissaannut pingaaruteqarpoq. Kalaallit Danmarkimut sooq nuuttarnersut ungasippallaanngitsukkut misissorpara, peqqinnissaqarfittalu neqeroorutai pissutaakkajuttut misissuininni akissutit takutippaat. Assersuutigalugu angajoqqaajusarput innarluutilimmik nappaatilimmilluunniit meerallit, Aaja Chemnitz nassuiaavoq.

Naalagaaffiup aningaasaliissutigeriigaata ilai peqqinnissaqarfitta assersuutigalugu kræftertunut uummalluttunullu Danmarkimi napparsimmavinnut peqqissartikkiartortunut aningaasartuutigisaanut atorneqassasut pilersaarutaavoq.

- Nunatsinni napparsimmaviit scanneritaarnissannut aningaasaliissutissanik amerlanerusunik aamma ujartuisoqarsinnaavoq. Nunatsinnimi inuit nappaammik eqqugaasimasutut kingusissukkut paasineqartartut amerlapput. Tarnikkut nappaatilinnut immikkoortortaqarfik aamma pisariaqartitsivoq, aap tassa suliassavut nunatsinni inuiaqatigiit nukittunerulernissaannut iluaqutaasinnaallutillu pingaarutillit amerlapput, Aaja Chemnitz oqalugiarami oqarpoq.

Mette Frederiksen Folketingimi akunnerni arlalinni oqallinnerup naanissaata tungaanut aamma peqataavoq. Taanna naggasiinermini pingaarnertut sammisat pillugit oqaaseqaateqarpoq.

- Peqqinnissaqarfik pillugu oqaatsisi tusaavakka, ilarpassuilu isumaqataaffigalugit.

Marienborgimi ataatsimiinneq

Naalagaaffeqatigiinnermi “attaveqaatit” nukittorsarneqarnissaasa nunani tamalaani eqqissiviittoqangaatsiarnerani aamma ilungersuutigineqarnissaat neriuutigigitsik, Aaja Chemnitz Savalimmiuneersullu Anna Falkenbergip oqaatigaat.

- Tassami nunatta akornanni ilisarisimaqatigiinnerunissarput meerartatsinnut inuusuttortatsinnullu pingaaruteqarpoq, Aaja Chemnitz oqarpoq Marienborgimilu, tassa ministeriunernut najugaqarfiusartumi siornatulli ataatsimiittoqaqqinnissaa kaammattuutigalugu.

- Taamaaliornissaq pingaaruteqartoq takusinnaalluarpara. Aaqqissuisuusinnaavunga. Ataqqinaatitut isigalugu taamaaliorusussinnaakutsoorpunga. Kingullermimmi ataatsimiikkatta pissarsiaqaqaagut, kalaallillu ilinniartut arlallit taamanikkut aamma peqataapput. Aamma paasisaqarpunga. Taamaammat taamaalioqqissinnaakutsoorpugut, Mette Frederiksen oqarpoq.