Tasiilami nipilersornikkut pikialaartitsisoqartalissaaq

Oqaatigineqartaraluarpoq, sulilu nalornissutigineqartarpoq, maannali Tasiilami nipilersornermik pikialaartitsisarnissamik takorluugaq kiisami piviusunngoraluttuarpoq.

Illoqarfimmi innuttaasut allallu IKUMA Music Festivalimi tusarnaariat Rasmus Lyberth aamma Small Time Giants juulip 24-ani tusarnaassavaat.

- Kitaamiorpassuit Tasiilaq tikissimanngilaat, Tasiilamukartullu amerlanersaat suliartorlutik tikittarput. Tamanna ajortussaqanngikkaluarpoq, kisianni Tasiilamiinnissamut allamik tunngavissaqartikkusuppakka, suliniummik aallarniisoq Carl Florian Sørensen oqarpoq.

Danmarkimi maannakkut najugaqarpoq, illoqarfimmili tassani inunngorluni peroriartorpoq.

- Taamani Tasiilami ikinngutikka peqatigalugit nipilersortaqaagut. Meeraanitsinni nipilersornermik workshopertitsinissamik aaqqissuussisoqarsinnaanera eqqartortarnikuuarput, kingornalu tusarnaartitsisoqarsinnaanera qanoq torraatigissanersoq, oqaluttuarpoq.

- Tassa tamanna aallarniutaavoq, pilertortumillu ineriartupallappoq, tapersersuisuvummi amerlaqaat. Maannakkullu inuit appisimaarnissaannut aggersarsinnaanngorpagut.

Pikialaartitsinermik perngaammik aaqqissuussisoq

Carl Florian Sørensen pikialaartitsinissamik suliniuteqarnini siorna marsimi aallartippaa. Aningaasaliisussarsiorup saniatigut illoqarfimmi inuppassuit oqartussaasullu aamma suleqataanissaat isumagisussaavoq.

Oqartussat assigiinngitsut pikialaartitsinissaq pillugu nalunaarfiginiarlugit Tasiilaliarluni februaarimi aallarpoq.

- Aatsaavissuaq taama annertutigisumik suliaqarpunga, oqarpoq.

Carl Florian Sørensen siusinnerusukkut filmiliornermi, TV-mi radiumilu aallakaatitassianik assigiinngitsunik suliaqarnermini Tasiilamiittarpoq. Ilaatigut DR-ip piviusulersaarusiaani ‘Tsumu – Where Do You Go With Your Dreams’ kiisalu tusarnaagassiaq nangeqattaartoq ’Tilbage til Tasiilaq’ peqataaffigalugit.

Pikialaartitsinermilli aaqqissuussineq — maannamut suli — CV-ani allassimanngilaq.

Pikialaartitsinermik aaqqissuisoq pissangalluinnartoq Sermitsiamit oqaloqatigineqarpoq. Nutaarsiassap tamanut saqqummiunneqarnissaa sioqqullugu sorpassuit inissinneqaqqaartariaqarput – sulilu ulloq taanna angutserlugu annertuumik suliassaqarpoq.

Qujanartumik Carl Florian Sørensenip suliniummut nukissanik allanik ikiuuttussanik iluatsitsivoq. Ilaatigut inuit nipilersornermik pikialaartitsinermik aaqqissuussinermik misilittagaqareersut.

- Suna tamarmi ingerlalluarpoq, tapersersorneqarluaqaagullu, oqarpoq.

Pinngortitaq kisitsisillu alianartut kisiisa pinnagit

Nuannisaqatigiinnerup, issiaartarfiit nerrivittallit, nereqatigiinnerit, nipilersortartullu tusaamasaalluartut akunniliisarnerisa saniatigut, nipilersornermik pikialaartitsinerup ingerlanneqarnerani nipilersornermik workshoppertitsisoqassaaq.

Pikialaartitsinerup ullussaata tikikkiartorneqarnerani, illoqarfimmi meeqqat inuusuttullu atuarfiup nipilersortarfiani, nipilersornermik unnukkut ilinniartinneqartassasut Carl Florian Sørensen oqaluttuarpoq.

- Inuusuttut nipilersornermik ilinniartinneqartut, workshop naggaserlugu pikialaartitsinermi tusarnaartitsivimmiit appisimaarnissaat takorluugaavoq, Carl Florian Sørensen oqaluttuarpoq.

Nipilersornermik pikialaartitsinerup akeqanngitsumik peqataaffigineqarsinnaaneratut nipilersornermik workshop akeqanngitsumik aamma peqataaffigineqarsinnaasoq, taassuma naqissuserpaa.

Pikialaartitsinermik aaqqissuussineq iluatsilluassasoq, aappaagussamullu taamatut aaqqissuussisoqaqqissinnaanera, Carl Florian Sørensenip neriuutigaa.

- Pikialaartitsisoqartarnera siunissami ulluni arlalinni pisarnissaa angorusuppara, inuillu akissarsisalersinnaanerat kissaatigalugu. Maannamummi suleqataasut akissarsiaqarata kajumissutsitsinnik sulivugut, oqarpoq.

Pikialaartitsineq illoqarfimmut qanoq sunniuteqarsinnaasoraajuk?

- Pikialaartitsisoqarnerani illoqarfiup ilisarnaataata misigineqarsinnaanissaa, taamatullu ataatsimoorluni suleqatigiinnikkut suliniummik annertuumik kivitsisoqarsinnaanerata ilinniarfigineqarnissaa neriuutigaara, akivoq.

Pikialaartitsineq imminut tatiginerulernerup saniatigut illoqarfimmi ataqatigiinnerulertoqarnissaanut aqqutissiuussissasoq neriuutigaa. Aamma aaqqissuussap illoqarfiup tusaamaneqaataanut allannguisinnaanera.

- Isiginnittaatsip mumisinniarneqarnissaa, Tasiilaq orniginarsarlungu, takornariat arfernik takuniaasartut, suliartorlutillu tikittartut kisiisa pinnagit, nangipporlu:

- Aamma Tasiilap inissisimaffiata pitsaasup takutinnissaanut periarfissiineq eqqarsaataavoq.