EU 200 milliarder euro-nik silassorissuusiamut aningaasaliiniarpoq
EU-mi kommissioni 50 milliarder euronik silassorissuusianik inerisaanissamut aningaasaliisoqarnissaa anguniarneqarpoq, aningaasaliissutit sisamariaammik amerlineqassapput.
EU-p aningaasaliissuteqassaaq milliardilikkaanik euro-nik qarasaasiatigut silassorissutsimut.
Assi: Kacper Pempel/Reuters/Ritzau Scanpix
EU-mi kommissionip kissaatigaa Europami silassorissuusiamut (AI) aningaasaliinerit annertusarneqassasut.
EU-mi kommissionip siulittaasua Ursula von der Leyen tusagassiuutinut nalunaarummi taama oqarpoq.
- Silassorissuusiaq atorlugu peqqinnissaqarfik pitsanngorsarneqarsinnaavoq, ilisimatusarnermik nutaaliornermillu siuarsaasoqarsinnaavoq unammillersinnaassuseqarnerulersissinnaallutalu, von der Leyen oqarpoq.
EU-mi kommissionip siunnersuutigaa EU-p, tassa EU-mi nunat, 50 milliardit eurot aningaasaliissutigissagaat, sinnerilu „aningaasaliisartunit suliffissuaqarfinnillu“ pissarsiarineqassasut.
Aningaasaliissutissat 200 milliarder euro-nissaat anguniarneqarpoq. Tassa koruuninngorlugit 1500 milliardit koruunit.
- Nunat ilaasortavut suleqativullu peqatigalugit InvestAI aqqutigalugu Europami silassorissuusiaq atorlugu suliffeqarfissuarnut aningaasarpassuarnik katersuiniarpugut.
- Pisortat namminersortullu suleqatigiinnerisigut immikkut ittukkut ilisimatuut suliffeqarfiillu tamarmik — anginerpaat kisimik pinnatik — suleriutsit atorneqartut annertusassavagut, Europa nunatut silassorissuusiamik atuilluartutut ingerlalernissaa anguniarlugu, von der Leyen oqarpoq.
Suliniutip siunertaasa ilagaat Europami "silassorissuusiamik suliaqartut suliffeqarfissuit" 20 milliardit euronik aningaasaliiffigineqassasut. Tassa koruuninngorlugit 150 milliardit koruunit.
EU-mi kommissioni naapertorlugu suliffeqarfissuit taakku „Europami silassorissuusiaq atorlugu ilinniartitaanermik, inerisaanermik iluarsiissutissanillu ineriartorfiussapput“.
Taakku EU-p qarasaasiarsuarnik atuiffiunerpaanik attaveqaataanik tunngaveqartinneqassapput.
Von der Leyen Berlinimi marlunngornermi silassorissuusiaq pillugu ataatsimeersuarnermi peqataavoq, tassanilu USA-p vicepræsidentiata J.D. Vancep EU-p silassorissuusiamut „ernumavallaarnera“ aamma teknologiimut tunngatillugu „maleruagassaqarpallaarnera“ pillugu isornartorsiuinera itigartippaa. Vance naapertorlugu silassorissuusiap ineriartortinneqarnissaa ipitinneqarsinnaavoq.
- Tusakulavara EU kingusinaartoq, USA Kinalu siulliujuartut. Uanga isumaqataanngilanga. Silassorissuusiaq pillugu inerisaaneq suli uninngilaq.
- Suliffeqarfitsinni inuussutissarsiutinilu assigiinngitsuni silassorissuusiaq aatsaat atulersinneqartiterpoq. EU-p tamanna qitiutillugu suliniutigissavaa. Tamassumani siuttuussaagut, von der Leyen ataatsimeersuarnermi oqarpoq.
