EU Kalaallit Nunaannut milliardilinnik tapiissuteqaqqinniartoq
EU-p Kalaallit Nunaat piffissami 2028-miit 2034-mut 4 milliardit koruunit missaannik aningaasaliiffiginiarpaa. Komissioni taama siunnersuuteqarpoq.
EU-p Kalaallit Nunaatalu suleqatigiinnerat pitsanngorsarniarlugu EU Nuummi allaffeqarfimmik 2024-mi marsimi ammaavoq.
Assi: Leiff Josefsen
EU-mi kommissionip Kalaallit Nunaannut tapiissutit marloriaammik amerlanerulersinniarlugit maanna siunnersuutigaa. 2028-miit 2034-mut 530 millionit eurot, koruuninngorlugit 4 milliardit missaat, Kalaallit Nunaannut aningaasaliissutigineqarusupput.
2021-miit 2027-mut 1,7 milliardit koruunit missaanniittut aningaasaliissutigineqarput.
Aningaasanik amerlanerusunik tapiissuteqarneq EU-p nunasiaataasimasunut nunamut allamut atassuteqartumut tapiissutaasa marloriaatinngortinneqarnissaata pilersaarutaanut ilaavoq, tassani Kalaallit Nunaat tapiiffigineqarnerpaassalluni.
Danskit EU-kommissæriata Dan Jørgensenip EU-kommissionip siunnersuutaa naammagisimaarluinnarpaa.
- Nunarsuarmi eqqissiviilliorfiusumi inuuvugut. EU-p nunarsuaq tamakkerlugu akisussaaffimmik tigusivoq – Kalaallit Nunaannut attaveqarneq suleqateqarnerlu pitsanngortillugit, Sermitsiamut allakkatigut akissuteqarluni oqarpoq.
Ilinniartitaaneq, aatsitassat, digitalinngorsaaneq nukissiuutillu
Aningaasat Kalaallit Nunaata EU-llu suleqatigiinnerisa ineriartortinnissaanut atorneqassapput.
Kalaallit Nunaat EU-lu nukissiuutit, aatsitassat, digitalinngorsaaneq ilinniartitaanerlu pillugit suleqatigeereerput, aningaasaleeqqinnerlu taakkununnga pitsanngorsaataassaaq.
Nukissiuutinut tunngasut soorlu erngup nukinganik, anorip nukinganik aamma power-to-x-imik suleqatigiinnermut tunngasut.
- Aningaasaliissuteqarnikkut Kalaallit Nunaat aningaasaqarnermik ineriartortitsinissamut, ilinniartitaanermik digitaliseerinermillu pitsanngorsaanissamik, suliffinnik nutaanik pilersitsinissamik, mingutsitsinngitsumik nukissiornerup attaveqaqatigiinnerullu siuarsarnissaannut ineriartortitsinissamut periarfissaqalerpoq – Kalaallit Nunaannit tamarmik aalajangersarneqartunik, EU-kommissæri Dan Jørgensen oqarpoq.
Danmarki aamma tapiissuteqarneruniartoq
EU kisiartaalluni aningaasanik amerlanerusunik tapiissuteqanngilaq. Danskit naalakkersuisui Kalaallit Nunaannut aningaasanik amerlanerusunik tapiissuteqarniarlutik aamma neriorsuuteqarput.
Danskit naalakkersuisuisa Kalaallit Nunaanni suliniutinut ukiuni sisamani tulliuttuni katillugit 1,6 milliardit koruuninik atuiniarput.
EU-p aningaasanut missingersuutaanut tulliuttumut isumaqatiginninniarnerni EU-p Kommissioniata siunnersuutaa maanna ilanngunneqassaaq, tassa suli aalajangiisoqanngilaq.
Siunnersuut nunat EU-mi ilaasortanit Europallu Parlamentiani akuerineqaqqaassaaq. Kingorna ukiunut arlalinnut missingersuutit tulliuttut 2028-mi atuutilissapput.
