Naalakkersuisoq Qeqertani attaveqaatit pitsaanerulissanersut neriorsuinngitsoq
Qaanaap kangiatungaanittoq nunaqarfik, Qeqertat, mobilinut, tv-mut internetimullu attaveqanngilaq. Qeqertani najugallit 30-it missaanniittut Tusassip attaveqaatai atorlugit pitsaanerusunik atugaqalissanersut, Naalakkersuisup neriorsuutiginngilaa.
Attaveqaasersuutinut Naalakkersuisoq, Iddimanngiiu Jensen Bianco (IA).
Assi: Oscar Scott Carl
Qaanaap kangerluaniittoq nunaqarfik, Qeqertat, attaveqaatitigut Naalakkersuisunit maannakkorpiaq pitsanngorsaavigineqassanngilaq. Attaveqaasersuutinut Naalakkersuisoq, Iddimanngiiu Jensen Bianco (IA), Sermitsiamut allakkatigut akissuteqarpoq.
Sermitsiap nunaqarfimmi attaveqaateqarnikkut pissutsit maajip 13-anni allaaserai. Oqarasuaatit angallattakkat attaveqanngillat. Tusass internetimik neqerooruteqanngilaq. Tv attaveqanngilaq. Qeqertani attaveqaatit atorsinnaasutuat tassaapput KNR-radio aamma iridium. Tamanna Naalakkersuisup ernumanartutut isigaa.
- Inuiaqatigiinni digitaaliusuni innuttaasuussagaanni pisariaqartumik nunaqarfik nalunaarasuartaatitigut attaveqanngippat, ilaatigut nalunaarasuartaatitigut attaveqarnermut aamma isorliunerusuni Naalakkersuisutut ernumassutigaara, Iddimanngiiu Jensen Bianco allappoq.
Ernumasoq iliuuseqalinngitsorli
Naalakkersuisoq ernumagaluarluni tigussaasumik nutaamik iliuuseqarnianngilaq. Taassuma Naalakkersuisutut siulerisami, maanna Aningaasaqarnermut Akileraartarnermullu Naalakkersuisuusup, Aqqaluaq B. Egedep (IA), lnatsisartunut ilaasortamut, Isak Johannessenimut (N), ukioq januaarimi akissutaa innersuussutigaa.
- Tusass A/S naliliivoq, Qeqertanut attaveqaateqarnermut atortunik pilersitsinissaq 3-4 mio. koruuninik akeqassasoq. Ukiumut ingerlatsinermut aningaasartuutissatut naatsorsuutigineqartut 0,5 - 1 mio. koruunit missaannut missiliorneqarput.
- Tassalu Tusass A/S-ip Qeqertani nalunaarasuartaatitigut attaveqaqatigiinnermik pilersitsinissamut ingerlatsinissamullu aningaasartuutissai amerlangaatsiartussaapput, kiisalu isertitassat killeqarnissaat naatsorsuutigineqartariaqarluni, Aqqaluaq B. Egede ukioq manna januaarimi allappoq.
Aningaasartuutissat missiliorneqarnerat kisitsisitalerneqarpoq, taamaakkaluartoq isertitassat killeqartussatut taaneqartut kisitsisitaqanngillat. Nunaqarfik Qeqertat 30-it missaannik inoqarpoq.
Apersorneqarumanngitsoq
Sermitsiap Naalakkersuisoq akisussaasoq Qeqertani attaveqaatit pillugit suliaqarnermi apersorumagaluarpaa. Taannali apersorneqarusunngilaq. Taamaattumik periarfissatuanngortoq atorlugu Sermitsiaq naalakkersuisoqarfimmut apeqqutinik allaganngorlugit maajip 13-anni nassiussivoq. Apeqqutit Naalakkersuisup juunip aallaqqaataani akivai.
Sermitsiamit ilaatigut apeqqutigaarput Naalakkersuisoq qanoq isummernersoq Qeqertami interneteqannginneq kiisalu fjernsynikkut mobiliikkullu attaveqannginneq pillugu. Aamma apeqqutigaagut Naalakkersuisut qanoq iliussanersut pilersaarutillu suunersut. Tamatuma saniatigut paasiniarparput Naalakkersuisut Tusassimut attaveqaatitigut pitsanngorsaasoqarnissaanik piumasaqassanersut, suliassallu suussaneri apeqqutigalugit. Naggasiutigaluguttaaq apeqqutigaarput nunaqarfimmi starlinkip, inatsimmik unioqqutitsilluni atorneqarnera pillugu Naalakkersuisup qanoq oqaaseqarfigerusunneraa.
Starlink Qeqertani atugaasoq
Sermitsiap paasissutissaatai naapertorlugit, Qeqertani attaveqaatitigut atugassarititaasut taama inneranni, Tusassillu attaveqaatinik pitsaanerusunik neqerooruteqannginnerani, nunaqqatigiit internetimut atassuteqarusullutik attaveqaammik starlinkimik atuisarput.
Starlink tassaavoq qaammataasat atorlugit internetimut attaveqaat. Tusassip attaveqaatiginngisaanik atuineq nunatsinni inerteqqutaavoq. Ingerlatseqatigiiffimmi Namminersorlutik Oqartussat pigisaat kisermaassilluni ingerlatsisussaasoq inatsisitigut aalajangerneqarnikuuvoq. Taamaattumik starlinkimik inoqarfinni atuineq inatsisinut atuuttunut naapertuutinngilaq.
- Tusass A/S avaqqullugu Starlinkimik atuineq inerteqqutaavoq, Iddimanngiiu Jensen Bianco allappoq. Tamanna qanoq iliuuseqarfigissanerlugu naalakkersuisup itisilinngilaa.
Naalakkersuisoq: Misissuineq utaqqivarput
Attaveqaasersuutinut Naalakkersuisuusimasup Inatsisartunut ilaasortamut januaarimi akissuteqaataa naapertorlugu Qeqertani attaveqaasersuinissamut periarfissat misissuiffigineqarnissaat suliniutiginiarpaa. Misissuinerli tamanna suli piariinngitsoq, maanna Naalakkersuisuusoq allappoq.
- Misissuineq naammasseriarpat qanoq suliniuteqartoqassanersoq Naalakkersuisut isummersinnaassapput, Iddimanngiiu Jensen Bianco allappoq.
Misissuinerup qaqugu naammaassineqarnissaa taassuma ilisimatitsissutiginngilaa.
