Inatsisartuni partiit ilinniartitaaneq pillugu oqaaseqartartui, kangiamiut meerartaasa meeqqat atuarfianni oqallisaanerannut maanna akulerupput.
Sammisaq AG-p ilisimatusartunik, kangiamiunit atuartunit, ilinniartitsisut kattuffiannik IMAK-imik aamma
ilinniartitaanermut naalakkersuisumik Nivi Olsenimik apersuilluni qaammatini kingullerni allaaserisarpaa.
Inatsisartuni partiit ilinniartitaaneq pillugu oqaaseqartartui, kangiamiut meerartaasa meeqqat atuarfianni oqallisaanerannut maanna akulerupput.
Sammisaq AG-p ilisimatusartunik, kangiamiunit atuartunit, ilinniartitsisut kattuffiannik IMAK-imik aamma
ilinniartitaanermut naalakkersuisumik Nivi Olsenimik apersuilluni qaammatini kingullerni allaaserisarpaa.
Atuartut ilinniartitsisullu
ulluinnarni atugaat sammineqarput. Tassani meeqqat allamiut
tikerlaat oqaatsitigut naammattumik ikiorserneqaratik atuartitsivinnut
nalinginnaasunut inissinneqartarput, ilinniartitsisullu oqaatsit
assigiinngitsorpassuit atorlugit atuartitsinerup ingerlannissaa
unamminartoqartittarlugu.
Inuit
Ataqatigiinneersoq Nivi Efraimsen Heilmann aamma Naleqqameersoq Isak
Johannessen meeqqat atuarfiat, allatut oqaasilinnut allatullu kulturikkut tunuliaqutalinnik amerliartuinnartunut – ilaatigut kangiamiunik, ingammik Nuummi – atuartunut naammattumik piareersimanngitsoq isumaqarput.
Atuartut allamiut atualeqqaarneranni atuartitsisarnissaq, oqaatsitigut tapiiffigineqarnissamik
ilinniaqqinnissamillu pisariaqartitsisoqartoq taakku
marluullutik tikkuarpaat. Aaqqiissutissat piffissaq ungasinnerusoq eqqarsaatigalugu politikkikkut pingaarnersiuisoqarnissaannik pisariaqartitsiffiusut aamma oqaatigaat.
Naammagittarsinnaaneq
pinngitsoorneqarsinnaassanngilaq
Ineriartorneq pissutigalugu nutaamik
aaqqiissuteqartoqartariaqartoq oqartussat suliamillu ilisimasallit
suleqatigiinnerulertariaqartut, Nivi Efraimsen Heilmann Inuit
Ataqatigiinneersoq isumaqarpoq.
- Ilinniartitsisorpassuit
annertuumik tunniussaqareerput, aammali nassuerutigisariaqarparput
atuarfiit tamavimmik ineriartornermut pitsaanerpaamik
periarfissaqaratillu atortussaqanngimmata, oqarpoq.
Ilaatigut oqaatsit atorlugit
ilinniartitsinerup pitsanngorsarneqarnissaa, pitsaanerusumik
ilassinninnissaq ilinniartitsisullu oqaatsit arlariit atorlugit
atuartitsisut pikkorissartinneqarnerulernissaat pisariaqartut
tikkuarpaa.
Kommunit, atuarfiit,
ilinniartitsisut, IMAK, Ilinniartitaanermut Siunnersuisoqatigiit
Naalakkersuisullu suleqatiginerisigut aaqqiissutissat
ineriartortinneqartariaqartut, ilaatigut naqissuserpaa.
- Sumiiffimmiit
sumiiffimmut unammilligassat assigiinngiiaarsinnaapput,
oqarpoq
Naleqqami ilaasortap Isak
Johannessenip Inatsisartuni ilinniartitaanermut ataatsimiititaliami
suleqatini isumaqatigaa, meeqqat atuarfiat atuartunut
amerliartuinnartunut allatut oqaasilinnut kulturimillu
tunuliaqutalinnik naammattumik piareersimaffigineqanngitsut taanna
isumaqarpoq.
- Ilinniartitsisut amerlasuut
oqaatsinut tunngatillugu ilinniartitsinermullu tunngasunik
suliassarpassuaqarput naammattumik tapersersorneqarnatik, tamannalu
siunissaq ungasinnerusoq eqqarsaatigalugu attanneqarsinnaanngilaq,
oqarpoq.
Ilaatigut illoqarfinni annerusuni
inimi atuartitsivimmi atuartut amerligaluttuinnarneri
ajornartorsiutaasoq tikkuarpaa.
Pitsanngorsaanerit ilaat
ingerlaannaq aallartinneqarsinnaasut, allannguinerilli tunngaviusut
ukiuni arlalinni politikkikkut pingaarnersiuinikkut
aningaasaliinikkullu suliarineqartariaqassapput, partiit taakku
marluk isumaqarput.
Tapersiisoqarnissaa
isumaqatigiissutigaat - nunasisunik inuiaqatigiinnut
akulerutsitsinissamut isuma assigiinngissutigaat
Nivi Efraimsen Heilmannip Isak
Johannessenillu erseqqissarpaat ineriartorneq kalaallisut oqaatsivut
kulturerpullu innarlerneqassanngitsut.
Meeqqat tamarmik ineriartornissamut
naligiimmik atugassaqarlutik ilinniarnissamullu
periarfissaqartariaqarnerat, tamatumalu saniatigut meeqqat
atuarfianni kalaallisut oqalunneq qitiutittuartariaqartoq, Inuit
Ataqatigiinnit Nivi Efraimsen Heilmannip pingaartippaa.
Naleqqameersoq Isak Johannessen
toqqaannartumik oqaaseqarpoq, ilaatigut Danmarkimi misilittakkat
innersuussutigai, tassanimi atuartut kulturikkut oqaatsitigullu
allannguerujussuartoqarnerata kingunerisaanik unamminiarnartuusimasoq
isumaqarpoq.
Pingaaruteqartoq
atuartut Kalaallit Nunaannut tikittut kalaallit ataatsimoornerannut
ilanngunnissamut kalaallisullu ilinniarnissamut
periarfissinneqarnissaat, atuarfiit kulturikkut tunngaviat annaanagu, Naleqqami ilinniartitaanermut oqaaseqartartup oqaatigaa.
- Unamminiarnartut nutaat
iliuuseqarfigisinnaasariaqarpavut nammineq kinaassutsit
inuiaqatigiinnilu kalaallisut nukittorsarnissaanut akisussaaffik
annaanagit, oqarpoq.
Naak kangiamiut meerartai, meeqqat
atuarfianni atuartut pillugit politikkikkut illuatungeriit
isumaqatigiilluinnaraluartut, oqaaseqaatit
kusassaataannaassanngippata iliuuseqartoqartariaqarpoq.
Maannangaaq nuna tamakkerlugu
aaqqiissutissanik saqqummiussisoqanngilaq, taamaattumillu kommunit
atuarfiillu ataasiakkaat ilinniartitsisut atuartullu ulluinnarni
unamminiagaannut aaqqiissutissarsiuartariaqarput.
