Fencker parteerisimasaminut uterpoq

Kuno Fencker maanna aamma Naleqqamut ilaasortanngorpoq. Taanna ukiut tallimat matuma siornatigut Partii Naleraq ilaasortaaffigiunnaaraluarpaa, Siumumullu ilaasortanngorluni.

Naleraq nalunaaruteqarpoq partiimut ilaasortanngornermi saniatigut, Kuno Fencker Naleraq sinnerlugu marsip aqqarnani  Inatsisartunut qinersinissamut qinigassanngortittoq.

Fencker nunarsuarmi tamarmi tusagassiorfinnit allaaserineqangaatsiarpoq USA-mut kisimiilluni angalanermini kingorna. Angalanermini Kalaallit Nunaanni pissutsit politikkikkullu pissutsit ilaatigut oqaluuserai - Siumut ilaasortaanermi Siumullu inatsisartuni gruppeanni ilaasortaanermi nalaani.

Kisimiilluni angalanerup kingorna isornartorsiorneqangaatsiartoq

USA-mut angalanermi kingorna partiinit allanit, aammali parteeqatiminit, arlalitsigut isornartorsiorneqarpoq.

Siumup siulittaasua Erik Jensen Sermitsiamut oqarpoq, Kuno Fencker Siumumiit imaluunniit Inatsisartuniit oqaaseqartussatut akuersissummik pisimanani USA-mut angalanermini ilaatigut republikanerit politikerinik naapitsisimasoq.

Isornartorsiorneqangaatsiareernerup kingorna Kuno Fenckerip Siumumiit ilaasortaajunnaarnissani isumaliutersuutigaa, isumaqarami partiip namminersulivinnissamut sulinera kigaappallaartoq. Maanna aapparisani, Aki-Matilda Høegh-Dam malippaa Naleqqamilu ilaasortanngorluni.