Filmiliortarneq pillugu inatsit nutaaq: Ataatsimiititaliap allannguutit arlallit piumasarai
Kalaallit Nunaanni filmiliortarneq pillugu inatsit nutaaq arlalitsigut allanngortittariaqartoq Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami amerlanerussuteqartut isumaqarput, taakku inatsisissatut siunnersuutip Inatsisartuni aappassaaneerneqarnissaa sioqqullugu isumaliutissiissummik saqqummiussipput.
Filmiliortarneq pillugu inatsisissatut siunnersuut Inatsisartuni oktobarip 23-ani aappassaaneerneqassaaq.
Toqqorsivimmit assilisaq: Leiff Josefsen
Filmiliortarneq pillugu inatsit nutaaq, filmiliortariaaseq inuussutissarsiornikkut piorsarsimassutsikkullu tapersersorneqarnissaa siunertaralugu, aningaasalersorniarlugu Eqqumiitsuliornermik Aningaasaqarfiup tapiissutigisartagaanit 3,9 millionit koruunit nuunneqarnissaat Naalakkersuisut pilersaarutigaat.
Filmiliortarneq pillugu inatsit piviusunngortinniarlugu Eqqumiitsuliornermut Aningaasaateqarfiup tapiissutigisartagai ikilisinnaat inatsisissatut siunnersuut siullermeerneqarmat isornartorsiorneqarpoq.
Isumaliutissiissummi ataatsimiititaliap allagaani “Naalakkersuisut allannguutissatut siunnersuuteqassasut kaammattuuteqarfigalugit, taamaalilluni taakkua 3,9. mio. kr.
Eqqumiitsuliornermik Aningaasaateqarfimmiit filminstituttimut aningaasanut tapiissutissanut
nuunneqassanngillat aningaasallu allamiit nassaarineqassasut” allassimavoq.
Siunertamut paragraffi
Inatsisissatut siunnersuut arlalitsigut allanngortiterneqartariaqartoq isumaliutissiissummi allassimavoq.
Kalaallit Nunaanni Filminstitutip siunertaani immikkoortoq imatut imaqartoq “siuarsassallugu filmiliortarneq, filmertarnerup kulturia aamma
nunatsinni filmertarfeqarnermi kulturi,” allanngortinneqarnissaa ataatsimiititaliap kissaatigaa, taamaalilluni oqaaseq filmfestivalkulturimik taarserneqassalluni. Taamaalilluni “piffinni filmertarfeqanngitsuni festivalit ingerlanneqarsinnaapput” ataatsimiititaliaq tunngavilersuivoq.
Siulersuisunut ilaasortat ukiuni sisamani atorfeqartarnerat affaannanngortinneqassasoq ataatsimiititaliap aamma siunnersuutigaa.
- Ataatsimiititaliamit ima paasineqarpoq siulersuisuni ilaasortat filminik suliaqartartussat
eqqarsaatigalugit ukiuni marlunni ilaasortaasarneq pissusissamisoornerpaajussasoq,
taakkuami ilaasortaanerminni filminut tapiissutissanik qinnuteqarsinnaassanngillat
inuussutigalugillu. Ilaasortat filmiliornermik suliaqartartut ilaasortaajunnaaraangamik
aningaasanik tapiissutinik qinnuteqarnissaminnut periarfissagissaarnerussapput. Tamanna ima
isumaqassaaq inuit filmiliortartut filmiliortartuunertik inuussutigisinnaalissavaat Kalaallillu Nunaanni filminik siuarsaaqataasinnaalissallutik, ataatsimiititaliaq isumaliutissiissummi allappoq.
Najugaqarsimasussaatitaanermut piumasaqaat
Siulersuisunut ilaasortat minnerpaamik ukiuni tallimani najugaqavissuusimanissaat ataatsimiititaliap aamma isumaqarpoq.
- Kalaallinut ilinniagaqarneq assigisaaluunniit peqqutaalluni nunatta avataniittariaqarsimasunut
ukiuni tallimani najugaqarsimasussaatitaanermut piumasaqaat atuutsinneqannginnissaa
ataatsimiititaliamit pingaartinneqarpoq, ataatsimiititaliaq allappoq.
Inuit Ataqatigiit, Siumut aamma Naleraq ataatsimiititaliami ilaasortaapput. Najaaraq Møller siulittaasuuvoq. Inatsisissatut siunnersuut oktobarip 23-ani aappassaaneerneqarnissaa pilersaarutaavoq.
Isumaliutissiissut tamakkiisoq uani atuarneqarsinnaavoq.
