Folketingimi siulittaasoq Inatsisartut ammaanersiorneranni peqataasoq
Folketingimi siulittaasoq Inatsisartut ataatsimiinnerisa ammarneqarnerannut qaaqqusaavoq.
- Toqunera alianaqaaq, Søren Gade oqarpoq, taannalu ullumi kingusinnerusukkut Hans Enoksenimik eqqaaniaaneqarnissaanut peqataassaaq.
Assi: Oline Inuusuttoq Olsen
Folketingimi siulittaasoq Søren Gade attaveqatigiinnermut ataatsimiititaliap ataatsimiinnerata kingorna Inatsisartut 2025-mi ukiakkut ataatsimiinnerisa ammaanersiorneqarnerannut qaaqqusaavoq.
- Maaniinnera ataqqinaataangaarlunilu nuannaarutaaqaaq, siullermeerlungami ammaanersiornermut peqataavunga, Sermitsiamut oqarpoq nangillunilu:
- Kalaallit Nunaata Danmarkillu ataqqeqatigiillutik attaveqatigiinnerat nukittorsaataavoq. Attaveqatuguunnermut ataatsimiititaliaq ataatsimiimmat tamanna naqissuserparput.
Søren Gade aamma Hans Enoksenip eqqaaniarneqarnissaanut peqataassaaq, taannalu Søren Gadep 2004-mi Folketingimut qinigaaqqaarnerminiilli ilisarisimalerpaa. Taassumali Jonathan Motzfeldtip Naalakkersuisuni siulittaasuunerani naapeqqaarpaa.
Søren Gade Inatsisartut ataatsimiittarfianni.
Assi: Oline Inuusuttoq Olsen
Søren Gadep Qaanaamut angalanermini Hans Enoksen naapippaa, kingusinnerusukkullu Hans Enoksen Naalakkersuisunut siulittaasunngormat namminerlu illersornissamut ministerinngorami Kalaallit Nunaannut angalasarnermini arlaleriarluni naapittarpaa.
- Toqunera alianaqaaq, Søren Gade oqarpoq nangillunilu:
- Maanna aamma Hans Enoksenip, inuiaqatigiinnut kalaallinut pingaaruteqarluinnartup, inuulluaqqunissaanut qujaffiginissaanullu periarfissaqalerpunga. Akornatsinniikkunnaarnera inuppassuarnut artornarpoq.
Søren Gade nuliaminit Marianne Kirkimit ilagineqarpoq
