KL

DK

Folketingimit allannguisoqareersoq: Inuit ataqqineqarnissaat naligiinnerulernissarlu pineqarput

Folketingimi toqqaannartumik oqalutseqarsinnaanerup misilinneqarnissaa Folketingimut ilaasortap Aki-Matilda Høegh-Damip (S) nuannaarutigaa. Misiliummik tamatuminnga ataavartumik aaqqissuussisoqarnissaa taassumaa neriuutigaa.

- Tamanna Folketingimi qinersiviit tamakkerlugit peqataasinnaanerannik periarfissiineq alloriarneruvoq pingaarutilik, tassuunalu aamma Kunngeqarfimmi pisortatigoortumik oqaatsit tamaasa atorneqarsinnaalersinneqarput, Aki-Matilda Høegh-Dam taama oqaaseqarpoq.
Thomas Munk Veirum
Tusagassiortoq
Saqqummersinneqarpoq

Ataasinngormat ualikkut Folketingip Siulittaasoqarfiata pissutsit allanngortilluinnarpai marlunngornermi Mette Frederiksenimut apeqqarissaarnermi misiliummik toqqaannartumik oqalutseqalernissamik nalunaarnermigut.

Folketingimi siulittaasup Søren Gadep toqqaannartumik nutserisoqarnissaa akisuallaassanerarlugu siusinnerusukkut itigartitsissutigisimagaluarpaa.

Folketingimut ilaasortaq Aki-Matilda Høegh-Dam (S) 2023-mi upernaakkut folketingip ataatsimiittarfiani kalaallisut oqalugiarnermigut oqalutseqarneq pillugu oqallitsitsivoq, kingornalu Folketingimi toqqaannartumik nutserisoqartarnissaanik kissaateqarnini arlaleriarluni saqqummiuttarsimavaa.

Folketingimi siulersuisut misileerusulernerat politikerip nuannaarutigaa, oqalutseqarnermullu apeqqut Inuit ataqqineqarnissaannut naligiinnermullu tunngasoq oqaatigaa:

- Tamanna Folketingimi qinersiviit tamakkerlugit peqataasinnaanerannik periarfissiineq alloriarneruvoq pingaarutilik, tassuunalu aamma Kunngeqarfimmi pisortatigoortumik oqaatsit tamaasa atorneqarsinnaalersinneqarput. Uannut oqaatsit pineqaannanngillat, aammali ataqqinninneq inuiaqatigiinnullu uagutsinnut kunngeqarfimmi naligiinnerulernermut alloriarneq, tusagassiuutinut nalunaarummi Aki-Matilda Høegh-Dam taama oqaaseqarpoq.

Ataavartumik aaqqissuussisoqarnissaa neriuutigigaa

Nangilluni oqarpoq kalaallisut oqaatsit pisortatigoortumik oqaasiusut, Kunngeqarfimmilu kisiartaallutik nunap inoqqaavisa oqaasiusut:

- Oqaatsitsinnik akuersaarnissaq, nunap inoqqaavisut nunatsinni pisinnaatitaaffeqarnerput Danmarkimilu inuiattut ikinnerussuteqarluta inissisimanerput nunap inatsisartoqarfiatut (parlamentitut) pingaaruteqarluinnarpoq. Ukiut 300-nngoreernerani Folketingimi qulaatiinnarluta nunarput pillugu aalajangersaasareerlutik, toqqaannaq oqalutseqarsinnaaneq Folketingimi periarfissiissutaarngaarpoq, taamaalilluni oqallinnerit malinnaaffigineqarlutillu paasineqarsinnaalerneranik - nunatsinni Danmarkimilu - kinguneqarpoq. Oqaatsitsinnik piorsarsimassutsikkullu kinaassuseqarnitsinnut sorsuutiginninnitsinnut tamanna ersersitsineruvoq pingaarutilik, politikkeri oqarpoq.

Misiliummik tamatuminnga ataavartumik aaqqissuussisoqarnissaa taassuma neriuutigaa.

Folketingip nittartakkamini ilisimatitsissutigaa marlunngornermi apeqqarissaarneq nunatta nalunaaqutaa malillugu nal. 10.00 aallartissasoq, aaqqiissutissamillu pilersitsisoqarsimavoq, tassani oqalutsi inimi immikkut ittumi issiassalluni, Folketingillu TV-kanalia aqqutigalugu apeqqutinik malinnaaviginnissalluni.

Folketingip nittartagaani ataatsimiinneq isiginnaarneqarsinnaavoq, tassanilu qallunaatut oqaatsit oqalutseqarpaluttut kalaallisulluunniit tusarnaarnissaq toqqarneqarsinnaasoq, Folketingi ilisimatitsivoq.

inuit inuiaqatigiit folketinget aki-matilda høegh-dam mette frederiksen simultantolkning samfund

ATORFIIT Se alle jobs

Powered by Labrador CMS