SULIFFISSALEQINEQ IKIORSIISSUTILLU
Gabrielsen: Suliffissarsiortunut ikiorsiissutit pillugit inatsit akornuteqanngilaq
Suliffissarsiortunut taakkulu aningaasatigut ikiorserneqartarnerannut qanoq suleriaaseqarnissaq pillugu inatsit ajoquteqanngilaq, inatsilli qanoq paasineqarnersoq ajoquteqarpoq. Taamak isumaqarpoq Avannaata Kommuniani borgmesteri, Lars Erik Gabrielsen (S).
Avannaata Kommuniani borgmesteri, Lars Erik Gabrielsen (S) isumaqarpoq sulisut suliffimminnit angerlartitaasut isumannaatsumik atugaqarnissaat attatiinnarneqartariaqartoq, suliffissaaleqisulli, sulisinnaasut, innersuunneqartunik sulinissamut pisussaaffeqartut. Kisianni tamanna iluatsissappat, inuiaqatigiinni isumaginninnikkut aaqqissuusseqqinneq annertooq pisariaqartoq.
Assiliisoq: Oscar Scott Carl
Avannaata Kommuniani nunap sinnera assigalugu annertuumik sulisussaaleqisoqarpoq. Tamatuma malitsigisaanik tassani aamma tikisillugit suliartortitat avataaneersut amerliartorput, aamma innuttaasut sulisinnaasut akornanni suliffissaaleqisoqaraluartoq.
Gabrielsenip oqarnera naapertorlugu inatsisit akornuteqanngitsoq, iluamik atorneqannginnera pissutigalugu allanngortinneqarnissaa siuariarnerussanngitsoq:
- Suliffissarsiortunut ikiorsiissutit pillugit inatsit inunnik isumaginninnermi isumannaallisaaneq qulakkeerniarlugu pilersinneqarnikuuvoq, pingaartumik sulisut suliffimminnit angerlartitaasimasut ullormiit ullormut isertitaminnik annaasaqartartut eqqarsaatigalugit. Taakkuami angerlartitaasarput aningaasartuutaallu uninneq ajorput matussuserneqartariaqarlutillu, taamaammat suliffissarsiortunut ikiorsiissutit pillugit inatsit pingaarnertut sakkussaavoq innuttaasut taakku namminneq pisuussutiginagu inissisimalersimaneranni ikiorneqarsinnaaqqullugit.
- Avannaata Kommuniata kissaatigaa, inuit ikiorsiissutinik pisartagaqartut ajoquteqanngitsullu, suliassaqartillugu orniguttariaqartut sulillutillu. Tamanna silatusaarneruvoq peqqinnartoq inuiaqatigiillu aningaasaqarnerannut pitsaasoq. Taamaattumik Naalakkersuisut akisussaaffimmik tigusinissaannik inatsimmillu eqqortumik atortitsisoqarnissaanik qulakkeerinneqqullugit kaammattorpagut. Inatsimmik allannguinissaq atorfissaqartinngilarput, paasinissaa eqqortumillu atorneqarnissaa pisariaqartipparput, Lars Erik Gabrielsen oqarpoq.
Isumaginninnikkut pissutaasut qulaajarneqartariaqartut
Taamaattorli borgmesterip nassuerutigaa innuttaasoqartoq peqqissunik sulilersinnaasunillu, kisianni inuttut arlaatigut ajornartorsiuteqarnermik pissuteqartumik suliffissatut innersuussutigineqartunut piareersimanngitsunik:
- Taamaattumik Avannaata Kommuniani sulissutigalugu ingerlatilereerparput sulilersinnaasut suliffissaaleqisut sulinermik inuussutissarsiuteqarnermut utertinniarlugit piukkunnarsarneqarnissaat. Tamanna pitsaanerpaamik anguneqassappat, pissutaasut aamma qulaajarneqartariaqarput, paasineqartariaqartullu ilagaat sooq innuttaasut namminneq piumassutsiminnik annikinnerpaamik aningaasaqarnikkut inissisimanissartik toqqartarneraat, Avannaata Kommuniani borgmesteri Lars Erik Gabrielsen (S) oqarpoq.
Lars Erik Gabrielsenip ilanngullugu oqaatigaa kommunip innuttaasui nukinnik pisariaqartinneqartunik pillit suleqatiserineqassasut, innuttaasut timimikkut peqqissut sulilernissaminnullu piukkunnartut sulilerseqqinnissaat anguniarlugu sulissutiginninnermi.
- Pingaaruteqarpoq pissutsit qulaajarneqarnissaat, tassanilu inuit nammineerlutik pilersorsinnaanermik periarfissanik atuerusunnginnerat ilanngullugu.
- Taamatuttaaq pingaaruteqarpoq inersimasut katsorsarneqarnissaminnut piumassuseqalernissaat siuarsassallugu, tamannami aalajangiisuusinnaavoq inersimasut killiffimminnik nalilersuinissaannut aammalu misigissusilerinissaannut inuunermi killiffimmi tassani, tassa imminut pilersorsinnaanani killiffimmi uninngaannalersimanerminnut nassuiaatissarsiniassammata.
Lars Erik Gabrielsen aamma isumaqarpoq ajornartorsiut angusaqarfiusumik qaangerneqassappat, iliuutsit massakkumut tunngasut aammalu iliuutsit siunissamut tunngasut tamarmik pingaaruteqartut.
Ajornartorsiut pitsaasumik qaangersinnaassagutsigu, atuarfimmi meeqqat nammineerlutik pilersorsinnaanermik naleqartitsinerup pingaaruteqassusianik ilinniartinneqarnissaat aallartittariaqarparput, minnerunngitsumillu imminut pilersortunngornissamut aqqutissat suunersut. Taamaattumik pisariaqarpoq isumaginninnikkut annertuumik iluarsartuusseqqinnissaq, aamma siunertaralugu inooriaatsit pitsaanngitsut kingornunneqartarnerisa kipitinniarnissaa.
Inatsilli ajoquteqanngikkaluarluni putoqarpoq
- Inatsit immini ajunngilaq, kisianni aamma ajoraluartumik periarfissiivoq "dovne Robert"-itut ittunik pilersitsinissamut, tassa eqiasuttunngornissamut, tassami inatsimmi immini ajunngikkaluartumi qulakkeerneqarpoq, suliffissarsiortunut sulilerumanngitsunut ikiorsiissutit tamakkiisumik peerneqarsinnaanngitsut, taamaalillunilu innuttaasut innersuussutigineqartunik sulinissaminnut itigartitsisinnaallutik. Taamaattumik Naalakkersuisut ikiorsiissutit suli annertunerusumik annikillisaanatik, taarsiullugu killilersuiffigisaalernissamik periarfissiineq atorunnaarsinneqarsinnaavoq, naggataatigut suliffissarsiortunut ikiorsiissutit annikillisarnerannik kinguneqaannartarmat:
- Inatsisimmi § 1, imm. 1-iata erseqqissisippaa, taamaallaat nammineq pisuussutiginngisamik suliffissaaleqigaanni, suliffissarsiortunut ikiorsiissutinik pisoqarsinnaasoq. Suliffissaq innersuunneqartoq tunngavissaqarani itigartikkaanni, taava tassa nammineq pisuussutiginagu suliffissaaleqisutut taaneqarsinnaajunnaassaaq, taamalu ikiorsiissutinik pisinnaatitaaffeqarunnaassalluni.
Taamaakkaluartoq Gabrielsenip erseqqissaatigaa taamak sukaterineq immini naammanngitsoq, tassami suliffissaaleqisut suliffeqalernerminni pimoorussillutik sulisinnaalersinniarlugit suliniuteqarnermik tamanna tapertaqartariaqartoq isumaqarami.
