Gazamut Witkoffip tikeraarnerata kingorna USA neriorsuivoq nerisassanut pilersaarusiortoqassasoq
Trumpip aallartitaa nalunaaquttap akunnerini tallimani Gazastribemeeqqammerpoq. Frankrigilu siullermeerluni ikiuutissanik timmisartukkut nakkartitsivoq.
Ikiueqqaarnermi tunniussassat kigaallassaasikkat qulimiguulimmit nakkartinneqarput Gazamut qaartartumeerneqaqattaarsimaqisumut, tassanilu amerikamiut aallartitaat Steve Witkoff tallimanngornermi tikeraarpoq nalunaaquttap akunnerini tallimat missaanni. Asseq Israelip killeqarfianiit tallimanngornermi assilineqarsimavoq.
Assiliisoq: Jack Guez/Ritzau Scanpix
Amerikamiut aallartitaat Steve Witkoff tallimanngornermi Gazap killeqarfia tikeraarpaa, oktobarimi 2023-mi sorsunnerup aallartinneraniit taanna USA-p naalakkersuisuisa sinniisaattut siullersaalluni tikeraarpoq.
- Ullumi Gaza-miippugut nalunaaquttap akunneri tallimat sinnerlugit, Witkoff attaveqaqatigiittarfiup X-ip quppernerani allappoq.
Taassuma ilanngullugu oqaatigaa tikeraarnerup siunertarigaa "Gaza-mi innuttaasut nerisassanik nakorsaatinillu ikiorsiissutinik pilersorneqarnissaat pillugu pilersaarummik suliaaqataaneq".
Witkoffip ilaatigut naapippa oqallisaaqisoq Israelimiut-amerikamiut kattuffiat Gaza Humanitarian Foundation (GHF).
FN-ip GHF suleqatigiumanagu itigartitsivoq oqaatigalugu kattuffiup Gazap killeqarfiani ajornartorsiummut ilungersunartumut pisooqataasoq.
FN-ip oqarnera naapertorlugu maajip 27-anili inuit minnerpaamik 1.373-it toqutaasimapput, ikiuutissanik pissarsiniarnerminni.
- Toqutsinerit amerlanerpaartaat Israelip sakkutuuisa piliaraat, FN-ip palæstinamiut sumiiffiini allaffeqarfia nalunaarpoq, nutaarsiassaqartitsivik AFP naapertorlugu.
Inuit 859-it GHF-ip agguaassiviini toqutaasimapput, 514-illu allat FN-ip ikiuinissamik angallassisartuisa aqqutigisaanni toqutaasimallutik.
Inuit pisinnaatitaaffii pillugit suliniaqatigiiffik Human Rights Watch nalunaarusiamik tallimanngornermi saqqummiussami Israelip sakkutuui GHF-ip qitiusoqarfiini "aattaqaqisumik toqoraasimasutut" pisuutippai.
Witkoffip Rafahimi, Gazap kujataaniittumi, GHF-p ingerlatsiviini tikeraareersorlu, israeliamiut sakkutuuisa palæstinamiut pingasut GHF-p agguaaviisa ilaasa qanittuani toqutaapput.
Palæstinamiut nakorsaasa ilisimatitsinerat naapertorlugu Reutersimut tamanna paasissutissiissutigineqarpoq.
Witkoffip tikeraarsimasaani tamanna pisimanersoq ilisimatitsissutigineqanngilaq.
Gazami inuit kaattut ikiorniarlugit Frankrig silaannarmiit kigaallassaatit atorlugit ikiuutinik nakkaatitsisut ilagilerpaat.
Frankrigip tallimanngornermi timmisartumit ikiuutinik siullerpaamik nassiussaq ingerlatissimagaa, præsident Emmanuel Macronip nalunaarutigaa.
- Kisianni timmisartumit nakkartitsinerit naammanngillat. Israelip ikiuutinik ingerlatitseqqinnissamut tamakkiisumik periarfissiinissaq isumagisariaqarpaa kaannersuup navianartorsiornera pinngitsoorniarlugu, Macron X-imi allappoq.
Ulluni aggersuni nerisassat tonsit arlallit Gazap nunataanut kigaallassaatit atorlugit nakkartinneqassapput, Frankrigip illersornissaqarfia nunanullu allanut tunngasunut ministeriaqarfia AFP naapertorlugu nalunaarpoq.
