GNC erngup nukinganik nukissiorfimmut aqqusiussaaq
Greenland National Contractors Utoqqarmiut Kangerluarsunnguanni aqqusinniortussatut toqqarneqarpoq.
Taama isikkoqarsinnaavoq. Sanaartorneqartussap isikkussa NunaGreenimit nassiunneqarpoq.
NunaGreen Construction A/S Utoqqarmiut Kangerluarsunnguanni
erngup nukinganik innaallagissiorfiup allilerneqarnissaanut siullertut alloriarpoq.
Greenland National Contractors aqquserngup pioreersup nutarternissaanut tallineqarnissaanullu suliakkerneqarneranik tamanna pivoq. GNC pitsaanerpaamik neqerooruteqartoq NunaGreen tusagassiuutinut nalunaarummi ilisimatitsivoq. Aqqusernup pioreersup 14 km-iusup nutarterneqarnissaa kiisalu aqqusernup 8 km missaannik tallineqarnissaa periarfissaavoq.
- Entreprenørip najukkameersup suliassaq pingaaruteqartoq taanna
suliarisussanngormagu nuannaarutigisorujussuuarput. Tamatuma takutippaa
mingutsitsinngitsumut allanngoriartortitsineq najukkami aningaasarsiortitsisoq,
peqatigisaanillu suliaqarnissap aallartinnissaanut anguniakkani
killiffiulluni annertooq, NunaGreenimi pisortaaneq Aviaaja Karlshøj Knudsen oqarpoq.
Erngupo nukiganik nukissiorfiup allilerneqarnerani innaallagissiorfimmut nutaamut, sulluliamut pilersuinermilu aqqusersuutinut tunngassuteqartumut, aqqusineq pisariaqartinneqarpoq.
Nunani tamalaani suliffissuit pingasut piukkunnartussarsiuussinermi
toqqagaapput, taakkualu maannakkorpiaq neqerooruteqarnissaq sulissutigaat.
Suliassaq pingaarneq 2026-mi aallartissasoq NunaGreenip naatsorsuutigalugu allappoq.
- Neqeroortitsinerup annertuup
ingerlaneranut ingiaqatigitillugu aqqusernup suliarineqarnera
aallartissinnaagatsigu nuannaarutissaavoq. Tamatuma kingunerisaanik piffissaq
sanaartorfiusussaq pitsaanerpaamik atorluarsinnaavarput aammalu suliassaq
siumut ingerlatissinnaalerlugu, Aviaaja Karlshøj Knudsen naggasiivoq.
