Hashimik 4,8 kilomik eqqussuisimasutut ingerlaannaq eqqartuunneqartoq
Ikiaroornartumik eqqusseriaraluarneq pillugu inuk ataaseq ukiup aappaa avillugu pineqaatissinneqarsimasut inissiisarfianniittussanngortinneqarpoq. Suliat ikiaroornartunut tunngasut arlallit suli paasiniaaffigineqarput.
Containerimi hashi 4,8 kilo nassaarineqarpoq. Suliamut atatillugu inuk ataaseq nassuerpoq, ingerlaannarlu ukiup aappaa avillugu pineqaatissinneqarsimasunut inissiisarfimmiittussanngorlugu eqqartuunneqarluni.
Leiff Josefsen
Marlunngornermi maajip 14-iani inuk poortukkamik hashimik imaqartumik containerimiittumik aallertoq Nuummi politiit tigusaraat. Containerimi hashi 4,8 kilo nassaarineqarpoq.
- 2024-mi maajip 14-iani hashimik 4,8 kilonik oqimaassusilimmik inuk containerimut 20 fodsimut aallertoq tigusarineqarpoq. Ullualuit sioqqullugit taassuma containerip misissorneqarnerani hashimik imaqarsinnaasoq Nuummi ilanngaaserisut nalunaarutigaat, Kalaallit Nunaanni Politiit Sermitsiamut ilisimatitsipput.
Suliat suliarineqartut arlaqartut
Suliaq ingerlaannaq aalajangiiffigineqartoq politiit nalunaarput, unnerluutigineqartoq ukiup aappaa avillugu pineqaatissinneqarsimasunut inissiisarfimmiittussanngorlugu eqqartuunneqarluni, inatsisini aalajangikkanik atortitsiniaanermut tunngatillugu toqqaannartumik inissiisarfimmiittussanngortinneqarluni, politiit ilisimatitsipput.
Kalaallit Nunaanni ilanngaaserisut suleqatigalugit piffissami kingullermi ikiaroornartunik arsaarinnissuteqartoqarsimasoq, Kalaallit Nunaanni Politiit ilisimatitsipput. Ikiaroornartunik tuniniaasimasutut piginnittuusimasutullu unnerluutigineqartut arlallit taakkua ilagaat.
- Suliat taakkua ilaat suli paasiniaaffigineqarput, taamaattumik paasiniaanerit ingerlaneri pillugit politiit oqaaseqarsinnaanngillat, Kalaallit Nunaanni Politiit paasiniaanermut immikkoortortaqarfiani pisortaq Lars Bjerregaard Sermitsiamut oqarpoq.
