ICC-mi siulittaasoq FN-ip aatsitassat imaasiinnarluni pissarsiarineqarsinnaanngitsut pillugit panelianut ilaasortanngortoq
Sara Olsvig, Inuit Issittormiut Siunnersuisoqatigiivisa siulittaasuat, Dario Mejía Montalvo peqatigalugu Naalagaaffiit Peqatigiit aatsitassat
nioqqutissiornermi atorfissaqartinneqartut imaasiinnarlunili
pissarsiarineqarsinnaanngitsut pillugit panelianut ilaasortanngorput.
Foto: Udenrigsministeriet i Danmark / ICC
Panel on Critical Energy Transition Minerals nukissiuuteqarnikkut nikeriarnissamut aalajangiisuulluinnartussat aatsitassat piiarneqarneranni atorneqarnerannilu avatangiisinut, inuuniarnikkut aningaasarsiornikkullu malitsigisassaasa piareersimaffiginissaat siunertaralugu pilersinneqarpoq .
Paneli ukiormanna majimi pilersinneqarpoq, suliassarivaalu aatsitassat atorfissaqartinneqartut imaasiinnarluguli pissarsiarineqarsinnaanngitsut kiisalu nukissiuutinik atuinerup nikeriartinnissaanut innersuussutit nammineq piumassutsimik malinneqarsinnaasut suliarinissaat.
Sara Olsvig, ICC-mi siulittaasoq aamma Dario Mejía Montalvo, siusinnerusukkut Nunap Inoqqaavisa Atugaat Pillugit Isummersoqatigiiffimmi Nunap Inoqqaavi pillugit susassaqarfimmi siulittaasuusimasoq maanna innersuussuteqaqataasinnaanngorput:
- Anguniagarput ersarippoq, tassalu innersuussutit Naalagaaffiit Peqatigiit Nunap Inoqqaavisa Pisinnaatitaaffii pillugit aalajangersagaannut nunallu inoqqaavisa soqutigisaannut naapertuunnissaat.
- Aatsitassat nioqqutissiornermi atorfissaqartinneqartut imaasiinnarlugilli pissarsiarineqarsinnaanngitsut 54 procentii nunap inoqqaavisa nunaanniipput qanittuanniillutilluunniit, taamaattumik aatsitassat taakku piiarneqarnerat atorneqarnerllu kiisalu nunarsuatsinni nukissiuutinik atuinerup allannguiffiginiarnera nunap inoqaavinut taakkulu pisinnaatitaaffiinut toqqaannartumik sunniuteqarput, Sara Olsvig, ICC-mut tamarmut siulittaasoq oqarpoq.
Aallartitaq Nozipho Joyce Mxakato-Diseko aamma Ditte Juul Jørgensen Europakommissionip Nukissiuutinut Director-Generalia panelmi siuttuupput.
Københavnimi Naalagaaffiit Peqatigiit illorsuani panelip aappassaa ataatsimiinnera sapaatip akunnerani uani pivoq.
Innersuussutit
Panelimi suleqataapput ilinniagartuut, suliffissuaqarnermik ingerlatsisut, avatangiisinut suliniaqatigiiffiit naalakkersuinikkullu sinniisuutitat.
Sulinerat maajip ulluisa 22-anni aallartittoq malitseqassaaq innersuussutinik Naalagaaffiit Peqatigiit New Yorkimi september 2024 ataatsimeersualerpata saqqummiunneqartussanik.
Sara Olsvigip aamma Mejia Montalvop innersuussutigaat Panelimut siuttuusut naapissagaat nunap inoqqaavinut sinniisut aamma nunap inoqqaavi Naalagaaffiit Peqatigiinnit piginnaatititsissummik tunineqarsimasut.
Ataatsimiinnerit Panelip Københavnimi pereernerani Genevemi pissapput.
