ICC: Nunat inoqqaavi peqataanngitsuuppata Issittumi Siunnersuisoqatigiit piusimassanngikkaluartut

Kunngeqarfiup Danmarkip Issittumi Siunnersuisoqatigiinni siulittaasuuffeqarnermini anguniagai ullumi saqqummiunneqarput.

Saqqummiussinermut atatillugu ICC-p siulittaasua Sara Olsvig oqalugiarpoq.

Kunngeqarfiup Issittumi Siunnersuisoqatigiinni siulittaasuutitaqarnermini nunat inoqqaavisa peqataatitsisoqarnera ICC-mit assut nuannaarutigineqartoq oqaatigaa.

- Siulittaasuutitaqartussat pilersaarutaannut ICC-p immersuinermini apuussimasai amerlasuut takusinnaavagut. Kalaallit Nunaanni kiisalu Danmarkimi Savalimmiunilu naalakkersuisut qutsavigiumavagut Issittumi Nunat Inoqqaavisa ukkatarineqarnissaat qulakkeerniarsimammassuk aammalu ICC-p immersuutai ilassilluarneqarsimammata, Sara Olsvig tusagassiuutinut nalunaarummi allappoq.

Issittumi avatangiisinik illersuinissamut periusissiap 1993-imi suliarineqarnerani (AEPS) tamakkiisumik nunat inoqqaavisa peqataasinnaanerat qulakkeerniarlugu ICC-p sulisimanera Sara Olsvigip oqalugiarnermini eqqaavaa - Issittumi Siunnersuisooqatigiiliortoqarnissaanut allorfiusoq siulleq.

- Ataavartumik Peqataasartoqarneq toqqammavilerneqarpoq, Sara Olsvig oqalugiaammini oqarpoq.

AAMMA ATUARUK

Issittumi siunnersuisoqatigiit sulinissamut pilersaarutaat Vivian-ip saqqummiutissavaa

Naatsorsuutigineqarsimasoq

ICC-p allagaateqarfiani siorna misissuititsinermini Issittumi Siunnersuisoqatigiit pilersinnissaanut nalunaarutit aallaavigalugit allaaserinninnermini quppernerit 170-it misissorsimavai.

- Allagaatit taakkua atuarlugit tulluusimaarnerujussuaq oqartussaaqataasimanermillu misigisimatippaanga – naalagaaffiit arfineq pingasuusut suleqatigiilersissallugit suliap qanoq annertutigisimanera takussutissarsillugulu paasivara – taamalu ilinermikkut nunat inoqqaavisa toqqaannartumik aalajangeeqataasarnissamut pisinnaatitaaffeqarnerisa atuutsinnissaanut nukingertumik angujumallugu sulisoqarsimanerat takusinnaallugu.

Taamaattumillu Kunngeqarfiup Danmarkip Issittumi Siunnersuisoqatigiinni siulittaasuutitaqarnermini anguniagaasa atuarnerisigut ICC-mi tulluusimaarneq taanna aamma misigineqarpoq. Anguniakkanimi tallimani siullerni nunat inooqqaavi Issittumilu inuiaqatigiit pineqarmata.

Tamanna ICC-p nunat inoqqaavisa pisinnaatitaaffiinik, inissisimaffiannik Issittumi aamma Issittumi Siunnersuisoqatigiinni inissisimaffiannik akuersaarnertut isigaa.

- Piviusorsiortumik oqassaguma - naatsorsuutiginngilarput siulittaasuuffik siulersorneqartoq naalagaaffimmit innutaasunik siulersorneqartoq, Sara Olsvig oqarpoq oqalugiaammini.

Taanna innersuussivoq, tassaasoq Kalaallit Nunaat Danmarkilu pinnani, siulittaasuuffik Arktisk Rådimi ukiuni marlunni tulliuttuni.

Ukiuni pingasuni unammilligassat

Issittumi Siunnersuisoqatigiit pilersinneqarneranniit aappaagu ukiut 30-nngussapput.

Issittumi Siunnersuisoqatigiinni ukiuni kingullerni pingasuni unammilligassat Sara Olsvigip oqalugiarnermini aamma eqqaavai - Ruslandip Ukraine 2022-mili tiguarneranit. Siunnersuisoqatigiinni sulineq piffissap ilaani unitsikkallarneqarpoq. Unitsitsigallarneq maanna qaangiussimalerpoq sulinerlu nanginneqarluni.

- Sulilu unammillernartumiippugut – pitsaasorli taassaavoq tamatta suli peqataagatta – anisoqarnikuunngilarmi, Sara Olsvig oqarpoq nangillunilu: 

- Ilaannikkullu suleqatigissallugit ‘oqinnerusinnaasut’ kisiisa sammissallugit ajornannginnerusutut misinnarsinnaagaluartoq, tamatta nalunngilarput Issittumi Siunnersuisoqatigiit peqataasartut tamarmik peqataasarunik taamaallaat piussammat. Tamanna aamma isumaqarpoq Issittumi Siunnersuisoqatigiinni nunat inoqqaavi peqataanngikkaluarpata Issittumi Siunnersuisoqatigiit piusimassanngikkaluartut.

ICC-mit Issittumi Siunnersuisoqatigiit nunallu inoqqaavisa peqataanerannik nukittorsaanissamut alloriarnerit tullissaanni nangittumik peqatiginissaat qilanaaralugit oqalugiarnini naggaserpaa.