Icelandair Qaqortumut aasaanerani timmisartuussisalernissaminut piareertoq
Icelandair Kujataanut juunimi timmisartuussisaqqilerpat sapaatip-akunneranut sisamariarluni Qaqortumukartoqartassaaq.
Qaqortumi timmisartoqartalernissaanut piareersartoqarpoq, Icelandairilu juunimiit aamma timmisartuussisalissaaq.
Assi: Nina-Vivi Møller Andersen
Icelandair Qaqortumut aasaanerani timmisartuussisalernissaminut piareersarpoq. Keflavikkimiit 2026-mi juuni aallarnerfigalugu sapaatip akunneranut sisamariarlutik siumut utimullu timmisartuussisoqartassasoq, suliffeqarfik ilisimatitsivoq.
Aasaanerani timmisartuussinerit ataasinngornermi, marlunngornermi, sisamanngornermi arfininngornermilu pisassapput.
Icelandair septembarimi sapaatip-akunneranut marloriarluni, marlunngornermi arfininngornermilu, timmisartuussisassaaq.
Mittarfik tikinneqartartoq allanngoraluartoq Kujataata nunataa alutornartoq oqaluttuassaartaalu allannguuteqarunnanngitsut, Icelandair Facebookikkut saqqummiussamini neriorsuivoq.
Icelandair maannamut Narsarsuarmut timmisartuussisarsimavoq, Qaqortumili mittarfik ammarpat Narsarsuaq qulimiguulinnut mittarfinngussaaq.
Air Greenland Nuummiit Qaqortumut apriilip qiteqqunneraniit timmisartuussisalernissamut bilitsinik tuniniaalereerpoq.
Qaqortup mittarfiata pisortatigoortumik qaqugu ammarnissaa suli nalunaarutigineqanngilaq, Icelandairimmiilli apriilimi tamanna pissasoq uppernarsarneqarpoq.
