KL

DK

AQQUSINIKKUT ANGALLANNEQ

Ikiaroorlutik biilertunut akiuiniarnermi ikiaroornartutorsimanermut misissuissut atortuuvoq sunniuteqarluartoq

Inuit 229-t imigassartorsimallutik biilersimasutut 2023-mi tigusarineqarsimasut politiit ukiumoortumik kisitsisaataasa takutippaat. Tamatumunnga peqatigitillugu ikiaroornartunik attuumassuteqartunik inatsisitigut unioqqutitsinerit ukiuni kingullerni amerleriarujussuarsimapput. Taamaakkaluartoq Danmarkimi politiit pisarnerattut, Nunatsinni Politiit ikiaroornartutorsimanermut misissuissutinik atuinissaannut inatsisitigut tunngavissaqanngilaq

Ikiaroornartutorsimanermut misissuissummik ingerlaannartumik biilertup qisia ikiaroornartumik akoqarnersoq misissorneqarsinnaavoq.
Trine Juncher Jørgensen TUSAGASSIORTOQ / JOURNALIST
Offentliggjort

Nunatsinni aqqusinikkut angallannermut inatsimmik unioqqutitsinerit 2023-mi katillugit 1.122-upput. Imigassartorsimalluni biilernerit unioqqutitsinerit amerlanersaraat.

IKIAROORNARTUTORSIMANERMUT MISISSUISARNEQ

Politiit biilertoq ikiaroornartutorsimanersoq paasiniarlugu assigiinngitsunik marlunnik periaaseqartarput.

Siullertut ikiaroornartutorsimanermut misissuissut atorsinnaavaat, taannalu atorlugu biilertup qisiani ikiaroornartunik, soorlu heroinimik, morfinimik, amfetaminimik, hashimik, ecstasymik imaluunniit kokainimik takussutissaqarnersoq misissorneqarsinnaavoq.

 Aappassaatut ikiaroornartutorsimanermut takussutissaqarnersoq paasiniarlugu isit aalatillugit misissorneqarsinnaavoq. Ikiaroornartummi isinik nalinginnaasumit allaanerusumik qisuariartitsisarput.

Ikiaroornartutorsimanermut takussutissaasinnaapput:

- tappiutip nalinginnaasumit anginerunera mikineruneraluunniit

- tappiutip seqerfigineratigut arriinnerusumik milliartortarnera

- sanimut qiviarnermi isit uniffeqanngitsut.

Ikiaroornartutorsimanermut misissuissummi aamma isikkut misissuinermi biilertoq ikiaroornartutorsimalluni takussutissaqaruni ikiaroornartutorsimalluni biilersimasutut unnerluutigineqassaaq, tamatumalu kingorna aaversissaaq. Aaversinnikkut paasisat eqqartuussivimmi uppernarsaatitut atorneqassapput.

Inuit 229-t taamaalillutik aaversinnermikkut paasineqartutut promilleqarpallaarlutik biilersimasutut 2023-mi unnerluutigineqarput. Tamatuma akerlianik aamma ikiaroornersut uppernarsarneqarsinnaanngilaq, Kalaallit Nunaannimi politiit Danmarkimi politiit assiginagit, ikiaroornartutorsimanermut misissuissummik atuinissamut akuersissummik tunngavissaqannginnerat pissutigalugu.

Politiit taamaalillutik ikiaroorlutik biilertunut akiuiniarnerminni atortussamik sunniuteqarluartumik amigaateqartut Inuit Ataqatigiit sinnerlugit Folketingimut ilaasortap Aaja Chemnitzip oqaatigaa. Taamaammat ikiaroornartutorsimanermut misissuissummik atuisinnaalernissamut akuersissummik tungavissaqalernissaanut suliniuteqarneq sumut killinnersoq angallannermut ministerip Thomas Danielsenip (V) paasissutissiissutigisinnaaneraa apeqquteqarfigaa.

Ikiaroorluni biilernermut killissamik qaangerneqaqqusaanngitsumik killissaqartitsisoqanngitsoq

Ministeri suli akissuteqanngilaq, Kalaallit Nunaannili Politiit aqqusinermi angallattunut ikiaroornartutorsimanermut misissuissummik atuinissamut akuersissutaateqaratik uppernarsarpaat.

“Naak biilernermi qanoq imigassartorsimatigisinnaanermut qaangerneqaqqusaanngitsumik killissaqartitsisoqaraluartoq Danmarkimisut ikiaroorluni biilernermut killissamik qaangerneqaqqusaanngitsumik killissaqartitsisoqanngilaq. Taamaammat aqqusinermi angallannermut inatsit maanna atuuttoq naapertorlugu biilertoq biilimik pineqartumik isumannaatsumik ingerlatsisinnaanersoq uppernarsarneqartariaqarmat assersuutigalugu hashitorsimasumut biilernermut tunngatillugu uppernarsaatit tunngavigalugit suliap ingerlannissaa ajornakusoorpoq”.

Nakorsamit misissorneqarneq

Taamaammat politiit biilertup aava ikiaroornartumik akoqarsorigunikku, nakorsamit misissortittariaqarpaat.

"Biilertoq ikiaroornersoq aamma biilinik ingerlatsisinnaanersoq ilanngullugu nakorsaq nalunaarusiussaaq. Nalunaarusiaq tamanna suliami pineqartumi uppernarsaatitut atorsinnaassaaq.“

Taamaammat ikiaroornartutorsimalluni biilernermi killiliussamik eqqussisoqassappat, aqqusinermi angallannermut inatsit allanngortinneqartariaqarpoq, tamannalu Danmarkimi angallannermut ministereqarfimmit akisussaaffigineqarluni.

Nunatsinni politiit aqqusinermi angallattunut ikiaroornartutorsimanermut misissuissummik atuinissamut pisinnaatitaaffeqanngillat. Tamannalu suliamik ajornakusoornerulersitsisarpoq, tamatumunngami taarsiullugu aqqusinermi angallattut ikiaroornartutorsimasut nakorsamut misissortinneqartarput.

Allaaserisaq Motoori-mi saqqummersinneqarpoq. Ilassutitut aviisi Motoori saqqummersoq tamakkerlugu uani atuarsinnaavat.

samfund narkometer transportministeriet motoori inuiaqatigiit grønland færdselsloven promillekørsel

Atorfiit tamaasa takukkit

Powered by Labrador CMS