Kokain pillugu Nuummi eqqartuussivimmi eqqartuussinerup ulluni tallimani sivisussuseqartussap ulluat siulleq ingerlavoq. Maanna unnerluussisup apeqqutai unnerluutigineqartunit akiorneqarput. Tamanna pisussaaffiginngilaat, kisianni suliamut tunngatillugu tungiminnit saqqummiinissaminnut tunuarsimaanngillat.
N siulliulluni apeqqutit akivai. Taassuma 30 gram kokainimik tigummiaqarsimalluni nassuerutigaa.
Kokain pillugu Nuummi eqqartuussivimmi eqqartuussinerup ulluni tallimani sivisussuseqartussap ulluat siulleq ingerlavoq. Maanna unnerluussisup apeqqutai unnerluutigineqartunit akiorneqarput. Tamanna pisussaaffiginngilaat, kisianni suliamut tunngatillugu tungiminnit saqqummiinissaminnut tunuarsimaanngillat.
N siulliulluni apeqqutit akivai. Taassuma 30 gram kokainimik tigummiaqarsimalluni nassuerutigaa.
KOKAINIMIK EQQUSSERIARNEQ PILLUGU SULIAMI INUIT AKISUSSAASUTUT INISSISIMASUT
S 44-nik ukioqarpoq Odensemilu inunngorsimalluni. S-ip ukiuni qulini pineqaatissinneqarnissaa unnerluussisumit kissaatigineqarpoq. S unnerluutigineqarpoq kokainimik katillugit 488,5 gramimik cannabisimillu naatitsinermut peqataasimasutut unnerluutigineqarluni. Taanna pisuunnginnerarpoq.
N 37-nik ukioqarpoq Nuummilu inunngorsimalluni. N-ip ukiuni sisamani pineqaatissinneqarnissaa unnerluussisumit kissaatigineqarpoq. N unnerluutigineqarpoq 112 gramimik kokainimik tigummiaqarsimasutut, taannalu S-imit tuniniagaassatut pissarsiarisimassaagaa ilimagineqarluni. Unnerluutigineqartup taamaattoqannginnerarpaa, kisianni 30 gramimik nammineq atugassarisimanerakkaminik pisinini nassuerutigaa.
Ikiaroonartulerinermut tunngatillugu unnerluutigineqarnermik saniatigut angutit pineqartut tamarmik immikkut unnerluutigineqarputtaaq sioorasaarisimasutut, taamatuttaq N tarnikkut persuttaasimasutut unnerluutigineqarpoq. Unnerluussissutaasunut aamma taakkununnga pisuussuteqannginnerarput. Eqqartuussineq sioqqullugu tamarmik Nuummi pineqaatissinneqarsimasunut inissiisarfimmi tigummineqarput.
Taanna unnerluussisumut oqaluttuarpoq, S-imit pisiniarsimallugit. Tamanna immini soqutiginarpoq, tassami S-ip nammineq kokainimut attuumassuteqarani oqaatigimmagu. Ullaariap ingerlanerani ersarinnerulerpoq angutit taakku marluullutik isumaqatigiinngissuteqalersimasut assigiinngitsunimmi nassuiaammata.
N oqaluttuarpoq, angutip allap attaveqarfigisimagaani, S-imut akiitsoqarnerarluni. N nammineq S-mut akiitsoqannginnerarpoq.
N aamma erseqqissaavoq, kokain 30 gram nammineq atorfissaqartissimallugu inuunermi nalaatsinerlioqqanermini atugassatut. Allatut oqaatigalugu, nammineq oqarnera naapertorlugu kokain pisiarisimanngilaa anngiortumik tuniniagassatut.
Kokain ilisimassaqarfiginnginnerarpaa, taamaallaat naasut nalunnginnerarpai
Taava S tullinnguuppoq.
Tassunga tunngatillugu unnerluussisup ilaatigut allattuivik angutip taassuma Kangerlussuarmi juuni 2024-mi tigusarineqarneranut atatillugu nassaarineqarsimasoq immikkut qaqileriffigaa. S-ip uppernarsarpaa, taanna nammineq allattaaviutigalugu. Allattukkani N-ip atia eqqaaneqarpoq. Aamma kisitsisit arlalissuit allattaavimmi takussaapput. Tassani pineqarpoq akiligassat allattorsimaffiat, ilisimatinneqarpugut.
Uagutsinnut imaannaanngilaq imarisaat tamakkiisumik eqqortumik utertissallugu, suliap allagartaasa assinginik iserfigisinnaannginnatta. S-ip aamma nammineq ajornartorsiutigaa eqqaamassallugu, suna sunaasimanersoq allattukkani. Kisianni ilaasa akiligassat pillugit pineqarput, paasitinneqarpugut.
S aamma ilumuunnginneraavoq, allattukkani kisitsisit sakkortuunik unnerluutigineqarnerminut attuumassuteqannginnerarlugit.
- Kokainimik tuniniaanikuunngilanga, S naqissusiivoq.
Kingusinnerusukkut, S aperineqarami oqaaseq aalajangersimasoq kokainimut tunngatinneqartoq, “shufi”, oqaaseqarfigeqqullugu, akivoq:
- Tamanna akisinnaanngilara. Kokainimik atuineq ajorpunga, taannami uanga silarsuanniinngilaq.
Taamaattorli S uppernarsaavoq, naasut pillugit ilisimasaqarluni. Tamanna aamma ullumikkut pingaaruteqarpoq, tassami S aamma unnerluutigineqarpoq Nuummi sumiiffimmi aalajangersimasumi cannabisimik naatitsinermut peqataasimasutut. S oqaluttuarpoq, sumiiffimmi pineqartumi angut alla naasut CBD-nik taaneqartartunik naatitsinissamut nammineq siunnersorsimallugu. Taakku aanngajaarniutissatut naleqqutinngillat, kisianni nakorsaatitut piginnaasaqarput, taanna nangippoq.
Assit takutinneqarput Skoda Yeti apummik qallersimasoq. Unnerluussisup soqutiginninnera ersarippoq, S-ip biilimik taassuminnga angalaartarsimanera pineqarmat. Biilip arsaarinnissutigineqarnissaa unnerluussisup kissaatigaa, S unnerluutigineqartoq pisuutinneqarpat.
Unnerluutigineqartut marluullutik politiinit malitseqarlutik avissaaqqallutik silamut pujortariarlutik anipput.
