Ilaqutariit tamavimmik toqunneqarlutillu, aggorneqarlutillu nerineqartut

Spaniap avannarpasissortaani El Miradorip qaarusui Europami pisimasorpassuit ilagaat, qanganisarsiuut itsarsuaq siuaasatsinni pisimasunik paasisaqarfii. 

Siusinnerusukkut qaarusuit qanganisarsiornikkut nassaarfiusarsimapput, toqusoqartillugu eqqumiitsumik iliuuseqartarsimanermut takussutissaqarluni. Nassaalli kingulliit ilisimatusarnerillu ingammik amiilaarnarput. Inunnit aqqaniliusunit saarngit ersarissumik takutippaat ukiut 5.709-t aamma 5.573-it akornanni toqunneqarlutillu nerineqarsimasut. Nerisullu tassaanngillat amaqqut imaluunniit allarsuit. Qanganisarsiuut ilimagaat inuusimassasut. Allaat saarngit ilaanni inuit kigutaannik uunneqarsimanermullu takussutissaqarpoq. Nassaartoqarneratigut Europami naasorissaasut ujaraannarmik sakkoraqallarneraniit inuttuumasuunermik takusaqartoqarpoq, ilisimatusartut naapertorlugit. Immaqalu ilimagisatsinnit nalinginnaanerusimavoq.

- Oqaluttuarisaanermi siusissumi inuttuumasuusimanermik nassaat nutaat immikkut maluginiagassaapput, tassalu piffissami tassani taamaattoqartarsimaneranik annertunerusumik takussutissaqalermat, allaaserisaqaqataasoq Dr. Antonio Rodriguez-Hidalgo CSIC–Junta de Extremadura aamma IPHES-CERCA-meersoq Videnskab.dk-mut allappoq.

- Inuttuumasuuneq qaqutiguunngitsoq asulilu oqaluttuaannaanngitsoq paasineqalerpoq, sivisunerusumik attanneqarlunilu aaqqissuussamik ileqquusimasoq.

Rune Iversen Europami naasorissaasut ujaraannarmik sakkoqarfiisa nalaani pisunik qangarnisarsiuup ilisimatusarneq nutaaq nuannaarutigaa isumaqatigalugulu piffissamut tassunga atatillugu inuttuumasuuneq pillugu ilisimasavut amigaateqartupilussuusut.

Inuit kigutaasa ikii

Qanganisarsiuut arlaat oqaraangat inuttuumasoqarsimaneranik takussutissamik nassaarluni, tamanna apeqquserneqarsinnaanngitsumik uppernarsaatissaqartariaqarpoq, Rune Iversen nassuiaavoq.

- Ilaannikkut najugaqarfiusimasuni inuit saarngi nassaarineqartarput nerisat attakuinut igitat, tamannali sumik peqquteqarpa? Rune Iversen, Københavnip ilisimatusarfiani Saxo-institutimi lektoriusoq nassuiaavoq. Ilisimatusaammi peqataasimanngilaq.

Inuttuumasuusimanermut tunngatinnissaa uppernarsaatikippallaarpoq. Peqquterpassuusinnaapput inuit timaasa saarngisaluunniit toqup kingornagut eqqumiitsumik nassaarineqarnerannut. Ilisimatusaammili nutaamik atortut allarluinnaapput, Rune Iversen nassuiaavoq: Saanerni inuit kigutaasa ikii. Saarngit ujaqqamik saviliamit aggorneqarsimanerat. Inuit aggorneqarsimanerannut takussutissat uumasut aggorneqarnerannut assingusut. Takussutissaqarluni amiat timaannit nusunneqarsimasoq. Saarngit uunneqarsimasut. Tamakku tamarmik pisimallutik inuit toqoreernerisa kingornagut.

- Ilisimatusarneruvoq suliarilluagaasupilussuaq uppernarluinnartunillu takussutissalik. Inuttuumasoqarsimasoq uppernarsiniarukku taakku atortussat pigaat, Rune Iversen oqarpoq.

Nassuiaavoq qanganisarsiornikkut misissuinerni inuttuumasoqarsimaneranik takussutissat ersarinnerpaat ilagigaat saarngit napineqarsimasut pateqaratillu. Matumani ajornakusoortupilussuuvoq inuit taama pineqarsimanngitsut uppernarsassallugu. Tamanna aamma Spaniami qangarnisarsiuut nassaarisimavaat.

Inuttuumasuuneq arlalinnik peqquteqartoq

Spaniami qanganisarsiuut ilisimatusarnerminni allapput piffissami tassani inuttuumasuuneq marlunnik peqquteqarajuttartoq: kaannersuarmit imaluunniit ileqqulersuutinit. Taakkuli matumani tulluaqqissaanngillat.

Inuttuumasuulluni ilisinermik ileqqoqartoqarsimaneranik takussutissaqanngilaq. Tamanna amerlanertigut toqusoq aqutsisuusimasinnaasoq imaluunniit arlaanik nersortariaqartumik iliuuseqarsimasoq ataqqiniarlugu ingerlanneqartarpoq. Saarngilli nerineqareernermik kingorna iginneqarsimapput, taamaalilluni ileqqunut tunngasinnaanerat ilimanarpallaarani. Ileqqulersuutigalugu inuttuumasoqarsimappat qanganisarsiuut aamma Iberiap qeqertaasaani piffissami tassani assingusunik nassaartarsimassagaluarput. Ilisimatusartut aamma piffissami tassani inuit timaasa pisoqaassusilerfiani annertuumik kaannersuaqarsimasinnaaneranik takussutissarsinngillat.

- Ima pisoqarsimanissaa ilimagineruarput sakkortuumik aporaattoqarsimanissaa inuttuumasunngornermik kinguneqartumik, Dr. Antonio Rodriguez-Hidalgo allappoq.

Sorsuunnermi inuttuumasuunermik taaneqartarpoq siunertaagajullunilu inuujunnaarsitsinissaq eqqugaasut ataqqinassusiiarlugit, nassuiaavoq. Naak kaattoqarsinnaagaluartoq peqqarniitsumik pissaanermik atuinertut toqutaasunillu nikassaanertut takuneqassaaq. Aamma pisimasutut peqqarniitsutut takuneqarsinnaavoq, Antonio Rodriguez-Hidalgo nassuiaavoq, illuatungerisap taamaallaat toqutsinissani tulluarsorinagu. Peerneqavillutilli nerineqarnermikkut. Erseqqissarpaali ukiut 5000-it sinnerlugit matuma siorna pisimasoq, oqaluttuarisaanerullu siornagut pisimasumut peqqutissarsiniarnermi ilaatigut eqqoriaasariaqarluni.

Inuttuumasoqarsimaneq takunngitsoorneqarsimasoq imaluunniit ataasiartumik nalaatsornerinnakkut pisimasoq?

Rune Iversenip ilisimatusartut sorsunnermi inuttuumasoqarsimaneranik tunngavilersuinerat paasisinnaavaa. Ilimagaa aaqqiagiinnginnerit ilaanni taamanikkut illuatungerisamik nikassaaniarnermik kinguneqarsimasinnaasoq. Nassuiaavoq taamatut inunnik isiginnittaaseqartoqarneranik suli ilisimanngisavut amerlaqisut. Immaqalu paasinngisaannassavarput inuttuumasoqarsimanera qanoq atugaatigisimanersoq imaluunniit sooq taamanersuaq naasorissaasut ujaqqanik sakkoqarallarnerisa nalaani inuit ilaat taamaaliortarsimanersut. Kisiannili ilisimatusarnermi tassaasinnaammat sorsunnermi inuttuumaneq, ilisimatusartullu ilivernik assingusunik amerlanernik nassaarnatik, ilimagisinnaavaa tassaasinnaasoq inuttuumasuuneq qaqutigoortoq.

- Taamaattoqarsinnaaneranik isikkoqarpoq. Taamanikkut taamaaliornissaq aalajangerneqarsimasinnaavoq. Immaqali qaqutigorujussuaq annertuumiunngitsorlu iliuuserineqartarsimagunarluni. Qaqutigoorsimassaqaarli immaqalu annertuumik atugaanani, Rune Iversen oqarpoq.

Erseqqissarpaa Tysklandimi naasorissaasut ujaraannarnik sakkoqarfiisa nalaanit inuttuumanermit aamma assersuutissamik nassaartoqarsimasoq. Immaqa siunissami amerlanerusunik assersuutissaqassaaq, qanganisarsiuut saanernik qimatanik misissuinissaminnut atortorissaarnerulersimammata. Ilungersunartarsimavoq qanganisarsiuut inuttuumasoqarsimaneranik uppernarsaasinnaanerat qaqutigoormat. Maannakkulli Spaniami nassaat takussutissaqarluartut allaasinnaasorinngilai qaqutigoortumik peqqarniitsumik inuttuumasuunermeersut.