Ilaqutariit ullormik ataatsimik siusinaartumik timmisartortariaqartut: 10.000 koruunit angullugit akiliisariaqarput
Nuummit Nuummullu timmisartuussinerit tamarmik arfininngornerup unnuaani matuneqassapput, mittarfiup mittarfia iluarsaanneqassammat. Suliaq naammassippat mittarfik ataasinngornermi nammassineqartussatut naatsorsuutigineqarpoq. Allannguutit angalasunut arlalinnut eqquissapput, ilaatigut ilaqutariinnut Ludvigsenikkunnut, taakkumi naatsorsuutiginngisaminnik 10.000 koruunit angullugit aningaasartuuteqartariaqalissapput.
Nuummi mittarfik sisamanngornermi novembarip 28-ani ammarneqassaaq – tamannalu Kalaallit Nunaanni angalanermut tunngatillugu allannguissaaq.
Foto: Greenland Airports - Mittarfeqarfiit
OBS. Nutartigaq: Angalasunut eqqorneqartunut tamanut Air Greenland unnuiffissaannik nerisassaannillu isumaginnippoq.
Dorthe Ludvigsen ilaquttanilu Danmarkimi Nørre Snedemi sulinngiffeqarlutik angalapput, pilersaarutillu malillugit arfininngornermi septembarip 14-ani nunatsinnut angerlartussaagaluarlutik.
Mittarfilli arfininngornermi sapaammilu matoqqasussaammat ilaqutariit Air Greenlandimiit nalunaarfigineqarput angerlamut angalanissaat tallimanngornermi septembarip 13-annut allanngortinneqartoq - angalanissaminnut ulloq ataaseq sioqqullugu.
Allannguuteqartoqarnerani ilaqutariit aningaasartuuteqarnerulissapput. Aallarnissartik allanngortinneqartoq paasigamikku Kastrupimi unnuiffissartik allanngortissinnaanerlugu misissuipput, tamannalu pisinnaavoq. Kisianni 2.000 koruuninik akiliinerusariaqassallutik.
Nørre Snedemiit Kastrupimut aamma aallajaarniarunik 5.000 koruunit missaanik akiliisariaqassapput.
- SMS-ivugut Kastrupimiit septembarip 13-ani aallassasugut. Unnuiffissarput allanngortinniaraluarparput, kisianni akiliinerussaagut, aamma unnuakkut aallartariaqassagutta meeqqanut naleqqutinngilaq. Sulinngiffeqarnerput taamatut naggasertariaqalerlugu erloqinartorujussuuvoq, Dorthe Ludvigsen Sermitsiamut oqaluttuarpoq.
Angalasunut amerlasuunut aaqqiissutissarpassuit
Dorthe Ludvigsenip aamma paasissutissiissutigaa Kangerlussuarmiit Nuummukarnissaat pingasunngornermi septembarip 18-annut kinguartinneqartoq, taamaattumik Kangerlussuarmi hotelimi unnuiffissaqarnissaq nerisassaqarnissarlu aamma nammineq akilertussaassavaat.
- Feriarnissarput ukiumi ataatsimi pilersaarusiorparput aningaasaqarnerlu pilersaarusiorlugu. Maannakkullu naatsorsuutiginngisatsinnik aningaasartuuteqartariaqassalluta. Septembarip 16-anni modulikkaartumik ilinnialertussaagaluarpunga, tamannali piviusunngunngitsuulerpoq aatsaat septembarip 18-anni Nuummut tikittussaagatta, Dorthe Ludvigsen naggasiivoq.
Air Greenland isumaginnippoq
Air Greenland ilisimatitsivoq timmisartuussinerit taamaatiinneqaraangata Kangerlussuarmi unnuiffissanik nerisassanillu ilaasut tamarmik isumagineqartarnissaannik pisarnertut isumaginnillutik.
Air Greenland ilisimatitsivoq mittarfiup iluarsaanneqarnissaa pillugu pilersaarutit ilisimaneqanngitsut, timmisartuutileqatigiiffiulli ilaasunut pitsaanerpaamik aaqqiissutissarsiorniarluni suliniuteqartoq.
- Mittarfik Greenland Airportsimit iluarsaanneqassaaq, taamaattumik Air Greenland Greenland Airportsip nalunaarutaanut iliuuseqarnissaminut periarfissaqarpianngilaq, taamaammallu Air Greenlandip aalajangiisinnaannginnera tunngavigalugu pilersaarusiortariaqarluni.
