ATUARFIK KILAASEERAQ
Ilinniartitsisunik amigaateqarnermi aaqqiissutissat arlallit misissorneqassapput
Maniitsumi ilinniartitsisussaaleqinerujussuarmut alimasissumik atuartitsineq aaqqiissutissanut ilaanersoq, kommunalbestyrelsip misissortinniarpaa. Ilinniartitsisut soraarninngorsimasut najukkameersut imaluunniit inuit ilinniarsimanngitsut piginnaasallit atorneqarsinnaanersut misissorneqassaaq, kiisalu nunatsinnit tamanit aamma Danmarkimit ilinniartitsisunik sulisussarsiortoqarsinnaanersoq.
Atuarfik Kilaaseeraq ilinniartitsisut sulisoriinnarnissaannik annertuumik ajornartorsiuteqarpoq.
Leiff Josefsen
Qeqqata Kommuniani
kommunalbestyrelsimut ilaasortap Karl Lyberthip (PN) kissaatigaa
kommunalbestyrelsimut ilaasortat tamarmik Maniitsumi atuarfiup
ajornartorsiutaasa iluarsinissaannut suleqatigiissasut,
taamaattumillu kommunalbestyrelsip poorski sioqqullugu
ataatsimiinnermini atuarfiup ajornartorsiutai oqaluuserai.
Atuarfik Kilaaseeraq ilinniartitsisullu
atugaat pitsanngorsarneqaraluartut suli annertuumik
aaqqinneqartariaqartunik ajornartorsiuteqarpoq:
Marluk
atorfinitsinneqartut tallimalli soraartut
Atuarfik Kilaaseeraq maannakkorpiaq
ilinniartitsisunik aqqaneq-marlunnik amigaateqartoq, aqutsisoqarfik
ilisimatitsivoq.
- Atuarfik Kilaaseeqqami
ilinniartitsisunik maannamut 12-nik amigaateqarpugut. Ukioq
atuarfiusoq 2023/2024 aallartinnerani ilinniartitsisut nutaat marluk
atorfinipput, allartinneraniillu maannamut ilinniartitsisut tallimat
soraarlutik aallarput.
Nunatsinni tamani ilinniartitsisut
amigaataammata pissutsit ajornerulersut, aqutsisoqarfik
ilisimatitsivoq.
- Taamaattumik piffissaq qaninnerusoq
eqqarsaatigalugu Atuarfik Kilaaseeqqami ilinniartitsisut amigaataasut
tamakkerlugit nunatta iluaniit pissarsiariniarneri
ajornakusuussangatinneqarpoq.
Atuartut
ilinniartitsisullu tamarmik atuarfimmit nuupput
Aqutsisoqarfik naapertorlugu klassit
amerlanersaanni nalinginnaasumik atuartitsisoqarpoq, trininili
marlunni naammaginartumik atuartitsisoqarsimanngilaq, qaammatini
arlalinni ilinniartitsisoqannginnera pissutigalugu:
- Qujanartumilli atuartitsissutini
amigaateqarfitsinni arlalinni maanna ilinniartitsisuunngikkaluartunik
piginnaasaqartunik aaliagersimasunik sulisoqarpoq naak amigaatit
tamakkinngikkaluartut. Atuarfiullu pisortaagallartup
tullersortigigallagaa aamma atuartitsilissalluni matussusiiniarluta,
Qeqqata Kommuniani aqutsisoqarfik allappoq.
Ilinniartitsisut amigaataanerisa
saniatigut atuarfimmi pissutsit peqqinnanngitsutut nalilerneqarmata,
atuartut ilinniartitsisullu siammarsimanerat ajornartorsiutaavoq:
- Atuarfiusoq 2023/2024 aallartimmat
atuartut ilinniartitsisullu atuarfimmut uterput, aasaanerani atuarfik
iluarsartuunneqarnerisa kingorna. Ukiariartornerani inuummarlunnerit
aallarteqqipput tamatumalu kingunerivaa atuartut ilinniartitsisullu
novemberimiit maannamut tulleriiaallutik nutsernerat. Massakkut
atuartut ilinniartitsisullu tamakkerlutik atuarfimmiit nutsereerput
trinnikkaarlutik, ukiullu pingasut sisamat taamatut
inissisimasussaallutik atuarfik piareernissaata tungaanut.
Alimasissumik
atuartitsineq ilinniartitsisullu soraarnerit
Ataatsimiinnermi aalajangiunneqarpoq,
kommunalbestyrelsip alimasissumik atuartitsisinnaaneq
misissorneqassasoq, aamma ilinniartitsisunik amigaateqarneq pillugu
Imakimut saaffiginnittoqassasoq. Aammattaaq Atuarfik Kilaaseeqqap
nutarsarneqarnerani immikkut ajunngitsorsiaqarluni neqeroorutit
(åremål) ilinniartitsisunut tamanut atuutsikkallarneqarsinnaanerat
misissorneqassaaq.
Ilinniartitsisut soraarnerit
nunaqqataasulluunniit ilinniartitsisutut ilinniarsimanngikkaluartut
arlaannik pikkoriffeqartut atorneqarsinnaanerat aamma
misissorneqassasoq kissaatigineqarpoq.
Ilinniartitsisunik amigaateqarnerup
iluarsineqarnissaanut kommunalbestyrelsimut ilaasortat tamarmik
qanoq siunnersuutissaqarnersut borgmesterip aperai.
Karl Lyberthip oqaatigisaatut
aaqqiissutissatut periarfissat tamakkerlugit misissorneqarnissaat
kommunalbestyrelsimut ilaasortat tamarmik isumaqataaffigaat.