Ilinniartut ikileriartut
Siorna ilinniartut ukiumut siulianut sanilliullugit 2023-mi 6 procentinik ikileriarput.
Ilinniartut 26 procentii sanaartornermik suliaqartuupput.
Leiff Josefsen
Ukiumut ilinniartut 2023-mi ikileriarput, aamma ukioqqortusiartorput.
Tamanna Naatsorsueqqissaartarfiup naatsorsuinerata nutaap takutippaa.
2023-mi ukiumut ilinniartut 700-simasut naatsorsueqqissaartarfik nalunaarpoq.
- Ukiup siulianut sanilliullugu 6 procentinik appariarsimavoq, 2013-imullu sanilliullugu 250-inik ikileriarsimapput, Naatsorsueqqissaartarfik allappoq, ilinniartullu ikiliartornerpaanerat 2015-ip tungaanut pisimasoq erseqqissaatigalugu (takussutissiaq ataaniittoq takuuk).
Ilinniartut ukiui eqqarsaatigalugit, 2013-mi ilinniartut 25-t ataallugit ukiullit 57 procentiusimapput. 2023-mi 41 procentiinnanngorsimapput.
Ilinniartut amerlanerpaat sanaartornermi 26 procentiupput, tulliullutik 21 %-iusut niuertunik pilersuineq atugassanillu nioqquteqarneq, aamma 18 procentiusut pisortat ingerlatsiviini kiffartuussivinnilu allaffissornermi ilinniartut.
Ukiumut ilinniartuunermi qaammatini 12-ini ilinniartuuteqarneq tunngavigineqarpoq. Assersuutigalugu ilinniartoq ataaseq qaammatini 12-ini ilinniartuusimaneranik imaluunniit ilinniartut marluk tamarmik immikkut qaammatini arfinilinni ilinniartuusimanerannik isumaqarluni.
Grafik: Kalaallit Nunaanni Naatsorsueqqissaartarfik
Ukioq manna upernaakkut ataatsimiinnermi Inatsisartut inuussutissarsiornermik ilinniarfiit aaqqissuuteqqinneqarnissaat akuersissutigaat, ilinniartunullu inissat pilersinneqartut naammaginanngittuunerat tamatumunnga nassuiaatinut ilaavoq.
Inuussutissarsiortut isornartorsiuineq ilumuunnginnerarpaat, ilaatigut ilinniarnertuunngorniarfinni ilinnialerusuttartut amerliartornerat innersuussutigalugu, aamma ilinniartut ilinniarnerminnik naammassinninnissamut periarfissakippallaartut taamaammallu ilinniakkaminnik unitsitsisartut inuussutissarsiortut maluginiartarpaat.
