Nuummi Kongevejimi inissiat pingasut ilisimaneqarluartut Namminersorlutik Oqartussat kollegialiortitsinerisa aappaanni inissaqartitsiniarlutik maanna isaterneqarput.
Tassaapput Millionærbarakki, blokki aappalaartoq aamma blokki tungujortoq 76-inik initallit, kollegiallu sisamat 224-nik siniffillit tassani sananeqassapput.
Nuummi Kongevejimi inissiat pingasut ilisimaneqarluartut Namminersorlutik Oqartussat kollegialiortitsinerisa aappaanni inissaqartitsiniarlutik maanna isaterneqarput.
ILINNIARTUNUT INISSIAT ASSIGIINNGITSUT SISAMAT
Namminersorlutik Oqartussat sanaartortitsineranni „Kollegiat nalinginnaasut“-mik qulequtaqartumi illorsuit assigiinnngitsut sisamaapput.
Dormitory inuusuttuaqqanut 16-iniit 19-inut ukiulinnut, angerlarsimaffimminnit nooqqammisunut immaqalu ungasissumit tikissimasunut, pisatsersugaassaaq.
Sanaartornerup immikkoortuata aappaani Qaqortumi Dormitory-mik 36-nik siniffilimmik sanaartortoqassaaq (sanaartortoq: Permagreen Grønland).
Inissiaqatigiinneq Flatshare tassaavoq ilinniartut 18-ileereersimasut nammineersinnaalereersut ineqatigiiffissaat.
Sanaartornerit taakku immikkoortup aappaani sananeqassanngillat.
Inissiat Apartmentit kisimiittunut, aappariinnut ilaqutariinnullu mikisunut naleqqussagaapput.
Sanaartornerup immikkoortuata aappaani Apartmentit 14-inik siniffillit Ilulissani (KJ Greenland), Aasianni (KJ Greenland) Sisimiunilu (BJ Entreprise) sanaartorneqassapput.
Bolig+ aamma Bolig++ ilinniartunut angajulliunerusunut ilaquateriinnut meerartalinnut inissaqarnerusunik pisariaqartitsisunut inissiaassapput. Bolig+ inissiaavoq minnerumaartoq pingasunik initalik; Bolig++ inissiaavoq minnerumaartoq sisamanik initalik
Sanaartornerup immikkoortuata aappaani Sisimiuni (BJ Entreprise) illut marluk Bolig+-imik taaneqartut katillugit 64-inik siniffillit sanaartorneqassapput.
Taamaalilluni maannakkut immikkoortup aappaani siniffiit 142-t siorna sinerissami aallartinneqartut Nuummilu 224-t aallartinneqarput. Siniffissat katillugit 366-iupput.
kurt@sermitsiaq.gl
Tassaapput Millionærbarakki, blokki aappalaartoq aamma blokki tungujortoq 76-inik initallit, kollegiallu sisamat 224-nik siniffillit tassani sananeqassapput.
Inissiarsuit sisamaat, Aqqusinersuarmi blokkitoqaq aappalaartoq, sanasut ineqarfiattut atorneqassaaq. Inissiarsuaq taanna inuerutereersimasoq kollegialiornerup immikkoortuata pingajuani isaterneqassaaq, sanaartornissaallu 2025-p ingerlanerani suliariumannittussarsiuunneqassasoq naatsorsuutigineqarpoq.
Taamaalillutik Kongevejimi Aqqusinersuarmilu inissiat sisamat INI-p inissiaatileqatigiiffianit peerneqarput, soorluttaaq Blok 1, biilinut inissanngortinneqartoq, aamma Noorlernut, sinerissami politikkerinut inissialiorfiusoq, peerneqartut.
Nuummi inissiat attartortittakkat 148-t ukiuni kingullerni matuneqarsimasut INI-p ilisimatitsissutigaa.
Sinerissamiittut piareerput — Nuuk kinguaattooqqavoq
Ilinniartut ineqarfissaasa sananeqarnerisa immikkoortuata aappaa Ilulissani, Aasianni, Sisimiuni Qaqortumilu sanaartornerup aallartinneraniit ukiumik ataatsimik kingusinaarluni Nuummi aallartinneqarpoq.
Namminersorlutik Oqartussat sanaartortitsisutullu suliffeqarfiup MT Højgaard Grønland ApS-ip 2023-mi akit pillugit isumaqatigiinnginnerat kinguaattoornermut pissutaavoq. (MT Højgaardip kollegialiortitsinermi immikkoortoq siulleq Kujallerpaani Nuummiittumi GTO-p inissiaqarfitoqaani suliaraa).
Sanaartornermut suliffeqarfiup AK Byggeteknikkip blokki tungujortoq isaterlugu aggustip 22-ani
aallartippoq.
Assi: Leiff Josefsen
Ingerlatseqatigiiffiup neqeroorutaa kvadratmeterimut 54.500 koruuninik naleqarpoq, inissiarsuarnik isaterineq ilanngullugu. Ingammik isaterinermi akigititaq isumaqatigiinngissutaavoq, suliariumannittussarsiuussinerlu taamaatiinnarneqarluni. Namminersorlutik Oqartussat sanaartornissamut pilersaarut nutaaq pillugu ukioq manna suliariumannittussarsiuussineq nutaaq ingerlanneqarmat suliffeqarfik akikinnerpaamik neqerooruteqartoq isumaqatigiinniarfigaat. Ajugaasup, illoqarfimmi sanaartornermik suliffeqarfiup AK Byggeteknik ApS-ip isaterineq sanaartornerlu suliarissavai. Isaterinermi suliassamut aki nutaaq siorna MT Højgaardip neqeroorutaanit pingajorarterutaannaasoq Ineqarnermut Attaveqarnermullu Naalakkersuisoqarfik ilisimatitsivoq. Aki AK Byggeteknikimik isumaqatigiissutigineqartoq taamaalilluni Namminersorlutik Oqartussat isaterinermi suliaannut allanut assinguvoq.
Ilinniartut ineqarfissai nutaat Kongevejimiittut 2027-p tungaanut suliarineqassapput.
Sineriammi kollegiat ukiumik ataatsimik sioqqutsillutik sanaartorneqarlutillu 2025-p tungaanut suliarineqassapput.
Illut ikinnerusut – siniffiit amerlanerusut
Sanaartornerup immikkoortuata aappaani pilersaarutigineqartumit maannakkut sanaartorneq allanngortinneqarsimavoq, ilaatigut aningaasat naammatsinniarlugit pisariaqartitsinerullu allanngorneranut naleqqussarniarlugit.
Aallaqqaammut kollegiat tallimat sanaartorneqarnissaat neqeroorutigineqarpoq — sisamat Kongevejimi tallimaallu Kujallerpaap isuani.
Sanaartornissamut suliarinnittussarsiuusseqqinnermi Kujallerpaani illuliaq atorunnaarsinneqarpoq, taamaammallu sanaartorneq taamaallaat Kongevejimi ingerlanneqassaaq. Sinittarfiit ikilinissaat pinngitsoortinniarlugu sanaartornermi nutaami illut sisamaasut ilaat marluk quleriinnik ilaneqarput. Inissiat katillugit tallimat ikileriarlutik 52-iussapput. Illut marluk „apartment“-itut ittut „inimik“ taarserneqarput. (paasissutissat ungalusaq aamma takuuk, aaqq.).
Inissiap „apartmentip“ aamma „ineqarfiup“ assigiinngissutaat inissiap sananeqarnerani erserpoq. „Apartment“-imi ilinniartut marluk najugaqarsinnaapput, „apartment“-imilu ilinniartoq ataaseq meeralik najugaqarsinnaavoq. „Apartment“-imik „bolig“-imik taarserneqartillugu ilinniartut ineqarsinnaasut ikilisaapput, najugaqartulli tamarmik, meeqqat ilanngullugit, amerlanerujussuanngussallutik.
Sanaartornerup allanngortinneqarnerani atuartunut meerartalinnut inissiat pingaarnerutinneqarmata Namminersorlutik Oqartussat pisariaqartitanik misissuineri nutartikkat, kollegianut allaffik ataatsimoorussaq KAF suleqatigalugu suliarineqarsimasut, tunngavigineqarput.
