Ilisimatusarfimmi tikeraatut ilinniartuusartut nunanit allaneersut amerliartuinnartut

Ilisimatusarfimmi semesterimi matumani ilinniartut aqqanillit Finlandimeersut, Danmarkimeersut, Frankrigimeersut, Kinameersut Japanimeersullu ilinniartuupput. Taakku saniatigut tikeraatut ilinniartut 16-it sapaatip akunnerini arlalinni Ilisimatusarfimmiissimapput, suliaminnut atatillugu paasissutissanik assigiinngitsunik katersiartorlutik. Ilisimatusarfimmi Nunanut tamalaanut Allaffeqarfimmi pisortaq Per Arnfjord taama oqaluttuarpoq.

– Nunanit allaneersut Ilisimatusarfimmi tikeraatut ilinniartut 2016-imiilli katillugit 643-uupput sulilu amerliartorlutik, Per Arnfjord oqarpoq, taassumalu uppernarsarpaa nunanit allaneersut amerliartuinnartut Kalaallit Nunaanni ilinniagaqarsinnaaneq paasilersimagaat.

Nuummi angerlarsimasutut misigisimasoq

Amerlanersaat semesterimi ataatsimi Ilisimatusarfimmi ilinniartarput, ikittuinnaalli sivisunerusumik ilinniarniarlutik aalajangertarlutik. Taakku ilagaat Tysklandimeersoq Norja Walther, 2022-mi Nunatsinnukaqqaartoq.

– Nuummut tikinninnit sapaatip akunnera ataaseq qaangiuttoq angajoqqaakka sianerfigaakka oqarfigalugillu maaniiginnarniarlunga. Nuummi angerlarsimasutut misigisimasorujussuugama sulilu taama misigisimallunga. Tysklandimut uternissara pilersaarutiginngilara, Norja Walther oqarpoq, taanna Europa-Universität Flensburgimi ilinniarsimagaluarpoq, Ilisimatusarfimmili arlaleriarluni pikkorissaqataalluni, bacheloritut allaaserisassaminik allaaserisaqarluni kingornalu inuiaqatigiilerinermi kandidatinngorniarnissaminik qinnuteqarluni.

– Nuummiinnera Kalaallit Nunaannilu illoqarfinni allaniinnera nuannaraakka, inuiaqatigiit ikittunnguugamik uummaarissuullutillu, aamma pinngortitamiinneq nuannaraara. Nuummi nalinginnaasumillu Kalaallit Nunaanni qaqqanut immamullu atalluinnarneq immikkut pisinnaatitaaffiuvoq angisooq.

– Ajoraluartumik kalaallisut oqalussinnaanngilanga, qallunaatulli ilinniarneq siulliuppara, ilinniarnera pissutigalugu tamanna pisariaqarmat. Tunumulli allamulluunniit siunissami nuunnissara pilersaarutigaara, kalaallisullu oqaatsit ilinniarnissaat pilersaarutigaara, tassami Kalaallit Nunaanniiginnarnissara sulilernissaralu pilersaarutigigakkit, Norja Walther oqarpoq.

Ilinniarnermi avatangiisit

Inuiaqatigiilerinermi inuiaqatigiit avatangiisivut aallaavigineqartarput, Norja Waltherillu oqarneratut Ilisimatusarfimmi ilinniarnerup inuiaqatigiillu qanittumiittut imminnut attuumassuteqarnerat pitsaalluinnarpoq.

- Ilinniarnitsinni ilikkakkavut inuiaqatigiinni ilisarnartuupput. Ilinniarnermi ilikkakkavut inuiaqatigiinni atorluarneqarsinnaapput, toqqaannartumik attuumassuteqaramik soqutiginarlutillu, soorlu Tysklandimi ilinniarfimmi misigisimasannit allaanerusumik.

Naleqqussarsinnaaneq periarfissallu

Ilisimatusarfimmi ilinniartut 750-it missaanniipput. Københavnip Universitetiani 40.000-ingajaat ilinniartuupput. Ilisimatusarfimmilu ilinniartut ukiui universitetinit allanit ilinniartunit assigiinngissuteqarnerupput. Norja Waltherip tamanna iluaraa.

– Universiteti mikisuugami naleqqussarsinnaassuseqartorujussuuvoq, misigisassanillu immikkuullarissunik misigisaqarnissannut periarfissarpassuaqarluni. Assersuutigalugu aggustimi umiarsuarmut ilisimasassarsiortumut Nuummiit Canadami Cambridge Bay-imut angalasussanut ilaassaanga. Aamma ilinniaqaqatima assigiinngissuteqarnerat nuannaraara. Ilinniaqatinni eqimattani maanna nukarlersaavunga. Ilinniaqatima ilarpassui sulinermik misilittagaqarput meeraqarlutillu, tamannalu soqutiginartunik oqaloqatigiinnermut ilanngussisitsisarpoq, tamannalu peqataaffiginngitsoorusunnavianngilara.

Ilinniarneq pillugu sammisaq iserfissaq aqqutigalugu akeqanngitsumik atuaruk UANI