Ilisimatusartoq meeqqat atuarfiannik pitsannguinissamut pingasunik siunnersuivoq

Kommunimut qinersinissamut tunngatillugu Sermitsiap ilisimatusartoq Kalaallit Nunatsinni meeqqat atuarfiannik ilisimasaqarluartoq unammilligassat suut pingaarnerpaajunerannik aperaa.

Lars Demant-Poort Ilisimatusarfimmi Ilinniartitsinermik Ilisimatusarfimmi lektoriuvoq, politikerinullu nunatsinni kommunalbestyrelsini tallimani ingittussanut pingasunik siunneruivoq:

• Ulluunerani paaqqinniffini meeqqanut pissutsinik pitsaanerusunik perorsaanikkullu ineriartornerit ingerlassigit.
• Atuarfimmut inatsit eqaatsoq meeqqat atuarnerannik pitsaasumik pilersitsinissamut atorsigit, tassanilu atuarfimmi ukiuni siullerni meeqqat tamarmik atuarsinnaalerlutillu allassinnaalersimanissaat aallunneqarli.
• Nunatsinni ilinniartitsisunut sulinermi ataatsimoorfinnik pitsaanerusunik pilersitsisoqarli, taamaalilluni ilinniartitsisut atuartitsinermik isumassarsinarnerusumik suliaqarnissamik, ullormik atuarfimmik pitsaanerusumik angusanillu pitsaanerusunik inerneqartumik pitsaanerpaanik periarfissinneqarsinnaaqqullugit.

Ukiut pingasut siulliit pingaarnerpaajupput

Ilinniartitaanermut tunngatillugu inuiaqatigiit unammilligassaat qinigaaffimmi ataatsimi ukiunik sisamanik sivisussueqartumi aaqqinneqarsinnaannginnerat, Lars Demant-Poortip erseqqissaatigaa.

- Ilungersorluni sivisuumik sulisoqartariaqarpoq. Ilinniaritaanermut immikkoortumi aaqqissutit sukkasuut siumugasaanngillat, ingammik Kalaallit Nunaanni, naliliut taama nipeqarpoq, politikerilli suliassaqarput.

Ulluuneranik paaqqinniffinnut immikkoortoq, kommunit aamma ingerlatissallugu akisussaaffigisaat, Lars Demant-Poortip siulliullugu taavaa. Immikkoortoq tamanna ukiorpassuarni pingaarnerutinneqanngilaq.

- Tamatuma meeqqat atuarfinni ingerlaqqittussat amerlasuutigut meeraaqqerivinni meeqqerivinnilu naammattumik perorsaanermik imaqartumik ulluinnaqannginnerat kinguneraa.

- Inuup kialuunniit inuunerani ukiut marlunnit pingasunut pingaarnerpaajunerat, ilisimatusarnermit ilisimavarput, Lars Demant-Poort oqarpoq, taassumalu atuarfiit iluatsissappata ulluunerani paaqqinniffiit qanoq isumaqartiginerisa paasineqarnerunissaat ilanngullugu ujartorpaa.

Eqqarsariartaasittoqqat qimassigit atuarfimmilu ulloq pitsaanerusoq pilersissiuk

Tamatuma saniatigut eqqarsariartaasitoqqat qimanneqarnissaat annertunerusumillu inatsimmi periarfissat pioreersut atorluarneqarnerunissaat ilisimatusartup siunnersuutigaa.

Nunani allani amerlasuuni, soorlu Norgimi Danmarkimilu ukiut atuartitsiviusut tamaasa fagit tamarmik nalunaaquttap akunnerini aalajangersimasuni atuartitsissutigineqartartussaapput. Kalaallit Nunaanni taamaattoqanngilaq.

Atuarfiit namminneerlutik meeqqat pisariaqartitaat aallaavigalugit fagit sorliit sammineqarnerunissaat pingaarnersiortarpaat. Ullumikkulli tamanna qaqutiguinnaq pisarpoq:

- Atuarfiit amerlanerit ileqqortik malillugu ingerlapput. Tassa fagit assigiit ukiut tamarluinnaasa pingaarnerutinneqartarput, tamatumani atuartut allanik pisariaqartitsigaluarnerat apeqqutaatinnagu, taanna oqarpoq imalu itisiliilluni:

- Meeraq assersuutigalugu trin 1-mi sapaatip akunneranut qanoq amerlatigusunik faginik atuarfissaqarnera qiviaraanni (1., 2. aamma 3. klassi) taava assigiinngippallaanik atuartussaanera oqaatigissallugu ussernartorsiornarsinnaavoq.

- Meqqat sapaatip akunneranut fagini assigiinngitsuni 13 14-illuunniit akornanni atuartinneqartarnera nalinginnaasuuvoq, tamannalu fagini ataasiakkaani itinerusumik samminninniapiloortitsisarpoq.

Meeqqat atuarsinnaanermik, allassinnaanermik kisitsisinnaanermillu ilinniartissigit

Atuarfiit atuarfinnilu siulersuisut nammineerlutik atuartut atuartinneqarnerannut sinaakkutinik aalajangersaasinnaanerat, assersuutigaalugu tunngavisunik piginnaasanik soorlu atuarnermik, allannermik kisitsinermillu meeqqanik annertunerusumik tunngavisumik piginnaasanik pitsaanerusumik atuartitsisoqarnissaanik aalajangiinissamut, atuarfimmut inatsisip pitsaaqutaanut ilaalluinnartoq, Lars Demant-Poort eqikkaavoq.

Tamanna aamma atuarnermik atuartitsinermik nutaamik, atuarfinni ataasiakkaani qanoq isariqartitsisoqareneranik aallaaveqartumik ineriartornermik ammaassisinnaavoq.

- Taava ukiut siulliit meeqqat tamarmik 2. Klassip naanerani atuarsinnaanermik allassinnaanermillu ilikkarsimanissaat pingaarnerutinneqarsinnaavoq. Qanorluunniit saatikkaluarutsigu atuarsinnaaneq allassinnaanerlu faginut allanut tamanut sakkussaapput.

- Maannakkutulli itsillugu meeqqat piffinni amerlanerni 1. klassimiilli faginik tamanik atuartinneqalereertarput, Lars Demant-Port oqarpoq.

Ilinniartitsisut ataatsimoorfinnik pitsaanerusunik tunineqarlik

Siunnersuut kingulleq ilisimatusartup saqqummiussaa ilinniartitsisunut tunngassuteqarpoq.

Tamanna qitiulluinnartuuvoq, matumanilu Lars Demant-Poortip fagini ataatsimoorfittut pitsaanerusutut taaneqartut pilersinneqarnissaat pivaa – tamanna meeqqanut, fagini angusanut minnerunngitsumillu ilinniartitsisunik atorfeqaannartitsinermut tunngatillugu:

- Naammattunik ilinniartitsisussaqanngilagut, taamaammat pitsanngoriarfeqanngitsumik inissisimavugut, Demant-Poort ilinniartitsisunut tunngatillugu oqarpoq.

Meeqqanut iluaqutsiisumik ilinniartitsisut sapinngisaq tamaat ilinniarnerminni pingaarnertut fagiminnik ingerlatsisariaqartut taanna oqarpoq.

Ullumikkut ilinniartitsisut meeqqat atuarfianni trinini pingasuuni ataatsimi ilinniartitsivissatut ilinniarsimanngisaminni ilinniartitsisussatut sulisinneqartarput; aamma illoqarfinni atuarfinni angisuuni, assigiinngitsunik sammisassatut ilinniarsimasunik peqarluaraluartuniluunniit.