Iliuusissatut pilersaarutip isorliunersuni suliniutit nukittorsassagai

Nunatsinni isorliunerusuni suliniutit annertusakkat atugarissaarnerulersitsissasut, ineqarnermut, attaveqarnermut isorliunerusunullu Naalakkersuisoqarfik nalunaarpoq.

– Isorliunerusunut iliuusissatut pilersaarutikkut atugarissaarnermik sukumiisumik pitsannguinissamik pilersitsinissaq kissaatigaarput – inissiat pitsaanerusut, ataatsimoornerit nukittunerusut, ilinniarnissamullu suliffeqarnissamullu periarfissat nutaat. Inoqarfinni minnerusuni innuttaasut ulluinnarni pitsanngortoqarneranik malugisaqarnissaat anguniagaraarput, taamaalilluta inuiaqatigiit oqimaaqatigiinnerusut, kikkut tamarmik – sumiluunniit najugaqaraluarunik – toqqissisimanermik, inuunerinnermik siunissamilu upperinninnermik malugisaqarsinnaaqqullugit, naalakkersusioq Aqqaluaq B. Egede oqarpoq.

Naalakkersuisut naalakkersuisoqarfiit akimorlugit suliniaqatigiinnik iliuusissatut pilersaarummik suliaqartussamik pilersitsipput. Sulineq anguniakkanik tallimanik aallaaveqassaaq:

1. Akuunerulersitsineq piffinnilu ataatsimiititaliani innuttaasunilu sunniuteqarneq.

2. Allaffissorneq oqinnerusoq killilersuutillu ikinnerusut.

3. Ataatsimoorfinnik, nammineq piumassutsimik ingerlatsinermik ataatsimuussusermillu ikorfartuineq.

4. Inuuniarnermik atukkanik pitsanngorsaaneq innuttaasullu tunngaviusumik pisariaqartitaannik naammassinninneq.

5. Ineriartornermut, inuussutissarsiornermik nutaaliornernullu tunngavissiineq.

Kommunit, Inatsisartut piffinnilu inuiaqatigiit taamatullu aamma namminersorlutik oqartussat suliffeqarfiutaat sulinermut peqataatinneqassapput, taamaalilluni aaqqiissutit piffinni pisariaqartitanik aallaaveqaqqullugit, misilittakkallu attuumassutillit tamaasa atorluarneqaqqullugit, naalakkersuisoqarfik erseqqissaavoq.