Illersornissaqarfik septembarimi 2025-mi takussaanerussaaq

Piffissami kingullermi Kalaallit Nunaanni piffinni arlalinni sakkutuut takussaanerupput, tamannalu septembarimi nangittumik ingerlanneqassaaq. Illersornissaqarfiup septembarimi sungiusarnermik Arctic Lightimik ingerlatsinermigut, sungiusartarnini annertusassavai.

Arctic Light uteqattaartumik upalungaarsimanikkut ajunaarnersuarnillu sungiusarnerusartoq, Naalakkersuisut oqaatigaat. ajunaarnersuarnik assigisaanillu pisoqartillugu inuiaqatigiit ikorfartortarnissaat tassani pineqarpoq.

Ukioq manna ilaatigut Nuummi Kangerlussuarmilu sungiusarnermi atortuutit tulliuttut ilaatinneqassapput:

· Fregatimik inissiineq

· EH-101-helikopterinik marlunnik inissiineq

· F-16 timmisartutigut ilapittuineq

· Nunamik paarsinermik ilapittuineq

· Immikkut sungiusarsimasunik ilapittuineq

Piffinni najugaqartut akuutinnissaat piffinnilu pissutsit eqqumaffiginissaat qulakkeerniarlugu Naalakkersuisut Illersornissaqarfillu suliniutinut qanimut suleqatigiittut, Naalakkerusisut oqaatigaat.

– Illersornissaqarfiup sungiusarnerisa amerlasuut ingerlanneqartarnerisa Illersornissaqarfiup Kalaallit Nunaanni takussaanerulersippaa. Piviusoq nutaaq tamanna sungiutissavarput. Taamaammat innuttaasut akuutinnissaat pingaaruteqarpoq, taamaaliornikkut Illersornissaqarfiup sungiusarniarluni piginnaasanillu sanarfiniarluni maaniinneranik, Naalakkersuisullu suliniutinut akuutinneqarnerannik kikkut tamarmik ilisimatinneqaqqullugit. Sungiusarnerit Illersornissaqarfiup isumagisassaminik naammassinnissinnaaneranut pingaaruteqartuusut, nunanut allanut ilisimatusarnermullu naalakkersuisoq Vivian Motzfeldt (S) oqarpoq.

Piffimmi innuttaasut akuutinissaat qulakkeerniarlugu Nuummi septembarip arfineq pingajuanni paasissutissiisumik ataatsimiititsisoqassaaq. Kingusinnerusukkut Kangerlussuarmi Sisimiunilu ataatsimiititsisoqassaaq.