Illersornissaqarfimmiit politikimut

Aputsiaq Egedep Narsami meeraalluni sakkutuut umiarsuaat qasertut avaqquttut takukulasarpai, taakkununnga lu ilaajumalluni siusissukkut aalajangerpoq. 

Sakkutuuni imarsiortuni sulineq 

Takorluukkani piviusunngortinniarlugu sakkutuunngorniarpoq sakkutuunilu imarsiortuni naalagaaranngorlunilu sergentinngorpoq. Kingorna aalisarnermi nakkutilliinermi ikiortitut ilinniarpoq, kingornalu sinersortaatini aalisariutinilu naalakkatut ilinniarluni. Kingullertut suleqatigiinnut aqutsisutut 2021-mi ilinniagaqarpoq. 

– Sakkutuuni imarsiortuni sulininni nuannersorpassuarnik misigisaqarpunga. Kalaallit Nunaata sineriaa qaqqallu ilisimasaqarfigillualerpakka, ilinniagaqarnissamut periarfissarpassuaqalerlungalu ullormut sulianik assigiinngiiaartunik suliaqarfiusumik suliffeqalerpunga, Aputsiaq Egede oqaluttuarpoq, taannali ukiuni 16-ini sakkutuujusimareerluni 2024-mi oktobarimi Illersornissaqarfimmit soraarniarluni aalajangerpoq. Ukiuni kingullerni marlunni ilaatigut Kangerlussuarmi issittumi tunngaviusumik ilinniarfimmik nutaamik aallartitseqataallunilu ineriartortitseqataavoq, tassanilu aamma ilitsersuisuuvoq. Aputsiaq Egede illoqarfimmi immikkuullarissumi suliffittaarpoq, tassa Narsami, tassanilu peroriartorfiginikuusamini inuussutissarsiutigalugu piniartutut umiatsiaararsortutullu sulilersinnaalerpoq.

Ullumikkut nuliani Nukannguaq Petrussen Egede panitsillu Noelle pingasunik ukiulik ilagalugit nunarsuaq tassanngaanniit isiginnaartarpaa.

Politikkikkut anguniagaqarniarneq 

Siumut sinnerlugu kommunimut qinigassanngortinniarlunga aalajangernera pisariunngilaq: 

– Inuiaqatigiit ineriartornerat pillugu isummertuaannarnikuuvunga, ilaqutariiullutalu politikki oqaloqatigiissutigikulasarparput. Siumuujuaannarnikuuvunga, taamaammat partii taanna sinnerlugu qinigassanngortissasunga pissusissamisoorpoq. Qanoq pisoqassanersoq pissanganassaaq. Soorunami Siumut Kujallermi qinersinermi ajunngitsumik angusaqassasoq neriuutigaara, Aputsiaq Egede, inuussutissarsiornerup qanoq ineriartortinneqarnissaanut ersarissunik isummertartoq, oqarpoq. 

– Kujataani inuussutissarsiornikkut ineriartortitsinissaq amigaataasoq isumaqarpunga, assersuutigalugu aalisarnernermi, ullumikkut taamaallaat ningittagarsorluni aalisartoqartarpoq, aalisarfissarpassuaqaranilu. Taamaammat najukkami tunisisisussaatitaaneq qaffakkusullugu aalisarnerillu allat ammarneqartillugit aalisarneq siuarsarusuppara. Immaqa Naalakkersuisut suleqatigalugit kujataani raajalerivimmik pilersitsisoqarsinnaavoq? Narsami imeqarferujussuaqarpugut, taannalu aalisakkanik qalerualinnillu minguiaanermut atorneqarsinnaavoq, kisianni raajalerivik nutaaq Narsami inissisimasariaqanngilaq. Aamma illoqarfiit ilaanni allani inissisimasinnaavoq, Aputsiaq Egede oqarpoq. 

Kommuuni isertitaqarnerusoq 

Aalisarnermut tunngasut ineriartortinneqarpata kommuni aningaasanik pisariaqartitsisoq isertitaqarnerulissaaq.

– Ineriartornerup kingunerisaanik aningaasaqarneq pitsaanerulertarpoq, Aputsiaq Egede oqarpoq nangillunilu:

– Aningaasaqarneq Kujataani pingaaruteqarluinnarpoq, kommunilu assigiinngitsutigut, ilaatigut takornariaqarnikkut, isertitaqarnissaa anguniarlugu ilungersorluni suliniutigineqartariaqarpoq.

– Kujataa takornariarpassuaqalernissaanut piareersarneqassaaq. Takornariat maanga tikiukkusupput. Qallunaatsiaat illorsuakui maaniipput, kangerlunni umiatsiamik angallassisoqarsinnaavoq, Sermersuarmut angallassisoqarsinnaavoq allarpassuillu. Narsamili takornarianut paasissutissiivimmik amigaatigaarpugut, tamannalu takornariat kissaataannik sulissutiginnissinnaaniassagatta takornariaqarnerlu ineriartortittuarsinnaaniassagatsigu pisariaqartipparput. 

Aputsiaq Egede ilaatigut Narsap timersortarfiani qineqqusaarnermi oqallinnernut arlalinnut peqataasimavoq. Kujallermi kommunimut qinersinermi Siumut sinnerlugu qinigassanngortittut katillugit 18-iupput. Kujalleq 6.145-nik innuttaqartoq Naatsorsueqqissaartarfik 2024 naapertorlugu nunami kommunit minnerpaartaraat.