Illersornissamut ministeriaqarfik ulluni aggersuni „Suliffissuit pillugit ulloqartitsinernik“ taaneqartartumik aaqqissuusseqqippoq, tassani Danmarkimi, Kalaallit Nunaanni Savalimmiuni nunanilu allani illersornissamut tunngatillugu suliffissuit kunngeqarfimmi illersornissamut qanoq iliuuseqarsinnaanerminnik saqqummiussinissaminnut periarfissaqassapput.
Arctic Import, Nuna Law, Arctic Law aamma Air Greenland peqatigalugit Sulisitsisut saqqummersitsinermi peqataassapput, Sulisitsisuni pisortaq Christian Keldsen ilisimatitsivoq. – Dansk Industri peqatigalugu Issittup tupiani peqataanissarput anguniagaraarput, taanna Sermitsiaq.AG-mut oqarpoq.
- Tamatumunnga ilaatigut nioqqutissianik illersuinissamik isiginnittaaseqarpugut, ilaatigut siumut isigisumik isiginnittaaseqarluta. Issittumik soqutiginnikkaanni Kalaallit Nunaanni Sulisitsisunik aamma Kalaallit Nunaannik avaqqutsilluni ingerlasoqarsinnaannginneranik isumaqarnerput siullermut taaneqartumut pissutaavoq, tamannalu peqataanitsinni takutittariaqarparput. Siumut isigisumik isiginnittaaserput tassaavoq uagutsinnik, suliffeqarfiutitsinnik minnerunngitsumillu Kalaallit Nunaannik nittarsaassinissaq. – Illersornissamut isumaqatigiissut, Issittumi piginnaasanik annertusaanissamik isumaqatigiissut il.il. isumatsialaapput, kisianni suli nassuiarluarneqarsimanngillat, taamaattumik tamatta inissisimaffipput inissinniarsaraarput, imarisaalu paasinerugutsigit piariissaagut, Christian Keldsen Sermitsiaq.AG-mut oqarpoq.
Issittoq sammineqarpoq
Grønlands Erhverv er med på forsvarsmessen for at promovere os, vores virksomheder og ikke mindst Grønland, siger Christian Keldsen.
SermitsiaqAG toqqorsivik
Illersornissamut ministeriaqarfiup suliffissuit pillugit ulloqartitsinerani Ballerupimi pisussami, Issittoq avataarsualu pillugit Dansk Forsvarsindustri saqqummiissapput.
- Illersornissaq pillugu saqqummersitsinermi tamatumani peqataavugut, Dansk Forsvarsindustrimi pisortaq Joachim Finkielman oqarpoq, Dansk Industrilu ukioq manna Issittoq avataarsualu samminiarlugit aalajangersimasoq ilisimatitsilluni.
- Issittumut soorunami aamma Kalaallit Nunaannut tunngasut arlallit sammineqarput, taanna oqarpoq.
Issittumi piginnaasanik annertusaanissamik isumaqatigiissutip atuutilersinneqarnissaa Issittoq pillugu sammisat ilagaat, illersornissamullu politikkerit piukkunnartut aperineqarput — taava susoqassava?
Issittoq isumannaatsoq pillugu Danmark qanoq suleqataava?
Danmarkimi illersornissamut politikkimi Issittoq qanoq pingaarnersiuunneqarpa?
Aamma qallunaat issittumilu suliffissuaqarfiit qanoq tapersersuippat?
Saqqummersitsinermi peqataasut Issittoq pillugu oqallinnermi inatsisartunut ilaasortat naapissinnaavaat, aamma danskit Issittumi illersornissamut ineriartortitsinerat teknologiillu sorliit suliassaqarfimmi ineriartortinneqarnersut politikkikkut eqqarsaatit tusarsinnaavaat, sammisassani allassimavoq.
Naatsorsuutit Kalaallilli suliffeqarfiutaat mikisut illersornissaqarfimmi suliassaqarnissamut periarfissaqarpat?
- Kalaallit suliffeqarfiutaannik taakkualu Kalaallit Nunaanni qanoq iliuuseqarsinnaanerannik Illersornissaqarfiup ilisimatinnissaa pingaaruteqarsoraarput, Dansk Industrip pisortaa oqarpoq.
- Kalaallit suliffeqarfiutaat neqerooruteqarsinnaaqqullugit neqerooruteqartitsisarnissaq pingaaruteqarpoq. Aamma kalaallit suliffeqarfiutaasa ataatsimoornissaannik ataatsimoorlutillu neqerooruteqarsinnaanissaannik kaammattorpavut, aamma qallunaat suliffeqarfiutaat annerit Kalaallit Nunaanni illersornissamut suliassanut tunngatillugu kalaallinik suleqateqarnissaannik aamma sanaartukkat ilaannik suliassinneqartartunik atuinissaannik kaammattorpavut, Joachim Finkielman oqarpoq.
Siorna Kalaallit Nunaanni suliffeqarfiit suleqatissarsiortut Christian Keldsenip ilisimatitsissutigaa.
– Ukioq mannali peqataatitatta suliassanut tunngassuteqarnerusunik suliaqarnissaat naatsorsuutigaara. Niuertoqassappat siunnersuisartut inissaqartuaannarput, Air Greenlandilu marloqiusamik atuinissamut eqqarsaammut pingaaruteqarluinnarpoq, taanna isumaqarpoq.
Sakkutooqarnikkut atortut sakkutuujunngitsunit aamma atorneqarsinnaanerinik marloqiusamik atuinissamut eqqarsaat isumaqarpoq, taamaalilluni sakkussiaqalerneq pineqarani inuiaqatigiit ineriartornerat pineqarmat.
- Arctic Import suliffeqarfiuvoq assigiinngitsorpassuarnik nioqqutissanik nassiussuiffiullunilu periarfissaqarluartoq, taamaattumillu Atlantikup Avannaani illersornissamut isumaqatigiissummi pisariaqartitatta ilaannut tunisassiortussatut naatsorsuuteqarfigaarput, Christian Keldsen oqarpoq. – Suliassat aalajangersimasut eqqarsaatigalugit isumaqatigiissuteqartoqartarnera nittarsaassinerni taamaattuni qaqutigoortuuvoq, siornali attaveqatigiilluarneq pilersinneqarpoq, isumaqarpungalu tamanna kingusinnerusukkut suliassiissutigineqartunik kinguneqarsimasoq, Christian Keldsen oqarpoq.
Suliffissuaqarfinnik oqaloqateqarneq Skandinaviami illersornissaq pillugu suliffeqarfissuit pillugit nittarsaassinerit annersaraat, taannalu Ballerup Super Arenami aggustip 21-ani 22-anilu ingerlanneqassaaq, tassanilu sammineqartussani Issittoq ilaannaraat.
Nunanit allanit Danmarkimillu suliffeqarfiit 700-t missaanniittut, Kalaallit Nunaannit suliffeqarfiit Savalimmiunilu suliffeqarfiit arfineq-marluk/arfineq-pingasut ilanngullugit, kiisalu peqataaniarlutik nalunaarsimasut 12.000-t, suliffeqarfiit allat ilanngullugit, nalunaarsimapput.
Illersornissamut ministeriaqarfiup atortussanik pisiortornermullu aqutsisoqarfia (FMI) ukioq manna aqqaneq-aappassaa taamatut aaqqissuussivoq, tassani illersornissamut tunngatillugu suliffissuaqartut FMI-mit aallartitanik, Illersornissamut qullersaqarfimmit oqartussaasunillu allanik naapitsisinnaapput, tassanilu teknologiikkut periarfissat suliffissuaqartut tapersersuiffigisinnaasaat pillugit oqaloqateqarlutillu isumassarsisinnaapput.
Taamaasilluni DALO Industry Days-inik taaneqartartut illersornissamut ministeriaqarfiup ”Inuussutissarsiornermut ammasumik” periusissiaanut ilaapput pingaarutillit, danskit illersornissamut suliffissuaqarfiinut naalakkersuisut periusissiaannut atatillugu illersornissamut ministeriaqarfiup suliffissuaqarfiillu akornanni oqaloqatigiinnermik nukittorsaasoq, aamma danskit suliffeqarfiutaasa siuarsarneqarnerannut tapersiisoq – pingaartumik illersornissamut aamma silaannakkut timmisartuussinermut tunngasunut.
Illersornissaqarfiup suliffissuaqarfiillu suleqatigiinnissamut periarfissat pillugit oqaloqatigiilluarnissaasa saniatigut, FMI-p suliffissuaqarfiit pillugit ulloqartitsinerini suliffeqarfiit suliniutigisinnaasaminnik nutaaliaminnillu takutitsinissaminnut periarfissaqarput.
Ilisimasanik avitseqatigiinneq tamanna siunissaq ungasinnerusoq eqqarsaatigalugu illersornissaqarfiup sakkussaminik pisinissamut pilersaarusiornissaannut pingaaruteqarpoq, aammali illersornissaqarfiup nunani allani tunisassiaminik nittarsaassinissaanut periarfissaalluarpoq, illersornissamut ministeriaqarfiup nittartagaani allassimavoq.
