Illersuisoq Meinel: - Neriuppugut Justitsminsterip aalajangiinissaa qanittumi pissasoq

Maanna qaammatit pingasut sinnerlugit qaangiupput, arfernik illersuiniartartoq Paul Watson tigusarineqarmalli, tigusarinninnermi kingorna pineqaatissinneqarsimasunut isertitsivimmi Nuummiittumi paarnaarussaaqqavoq.

Kalaallit Nunaanni Politiit, Justitsministeriamit qinnuigineqarnikuuvoq tunniussisoqarsinnaaneranut atatillugu misissuissasut, suliakkiullu naammassivaat septembarip 29-ani.

Maanna misissuinerup naammassineraniit qaammatinngulerpoq, sulilu Watson Japanimut tunniunneqassanersoq tunniunneqassannginnersorluunniit Justitsministeriamit aalajangiineq suli pinngilaq.

Ullumikkut ullaap tungaani Kalaallit Nunaanni Eqqartuussiviup unnerluussisussaatitaasut innersuussutaat malillugu Watson-ip tigummigallagaanerata sivitsoqqinneqarnissaa aalajangiuppaa, taamaalilluni Watson pineqaatissinneqarsimasunut inissiisarfimmut uterteqqinneqarsimalereerpoq sapaatip akunneri pingasut suli paarnaarussaaqqasussanngorluni.

Illersuisoq Meinel: - Neriuppugut justitsministeriamit suliaq sukkasuumik ingerlanneqassasoq

Illersuisoq Finn Meinel, Watsonip illersuisui sinnerlugit, ullaap tungaani illersuisuusoq, piumasaqarpoq Watson aniguisinneqassasoq.

Watsonip illersuisuisalu akornanni suliap ingerlanneqarneranut pakatsisimaartoqartoq malunnarpoq, tamatumami malitsigisaanik illersuisup Meinelip oqaatsit sakkukinngitsut atorlugit saqqummiussineranik nassataqarpoq, aammalu unnerluussisussaatitaasut sinnerlugit pisortap Mariam Khalilip saqqummiussaanut sakkukinngitsumik akiuilluni.

Eqqartuussivimmi ataatsimiinnerup kingorna Sermitsiamit illersuisoq Finn Meinel oqaloqatigaarput:

- Suli pakatsinartuarsinnarpoq, sulimi uppernarsaatinik takutitsisinnaatitaanngilagut, isumaqarpugummi saqqummiukkusukkaluakkagut eqqartuussivimmi suliap nali pingaaruteqartut. Kisianni Kalaallit Nunaanni Eqqartuussivimmit oqaatigineqarpoq, justitsministeria aalajangeereerpat, taava uppernarsaatit aatsaat misissorneqarsinnaalissasut, taamaammat pakatsinarpoq Paul Watsonimut aamma uagutsinnut illersuisunut, uppernarsaatinik aamma ullumikkut saqqummiussisinnaatitaannginnatta.

- Ullumi tusarparput suliaq maanna Inatsisinik Atuutsitsinermut Ministereqarfimmut nassiunneqarsimasoq, taamaattumik Inatsisinik Atuutsitsinermut Ministereqarfimmit sukkanerusumik suliarineqarnissaa neriuutigaarput, taamaalilluni Paul Watson tigummigallarneqarnerminit aniguisinnaaqqullugu, illersuisoq Finn Meinel oqarpoq.

Aamma eqqartuussivimmeereerup kingorna Kalaallit Nunaanni Politiit unnerluussisussaatitaasa pisortaat Mariam Khalil oqaloqatigaarput. Taanna apersorneqarnissaminut peqataasinnaannginnerarpoq, kisianni innersuussivoq folketingip Inatsisit atuutsinneqarnerannut ataatsimiititaliaata justitsminister Peter Hummelgaardimut ammasumik siunersiuineranut, septembarip 12-anni 2024-mi ingerlanneqartumut.

Højesteretimut suliassanngortitsineq attanneqaannassaaq suliaq qanorluunniit inerneqaraluarpat

Paul Watson-ip Højesteretimi eqqartuussivimmi sulineq  pillugu saqqummiussinnaaneranut akuerineqarnikuuvoq, tamanna aalajangiusimaneqaannassava unitsinneqassavaluunniit Watson aniguisitaassagaluarpat?

- Naalagaaffiup eqqartuussiviisa qullersaanut naammagittaalliuuteqarneq ingerlaannassaaq, sulimi pingaaruteqarpoq, justitsministeri Watsonip tunniunneqarnissaanik imaluunniit tunniunneqannginnissaanik qanorluunniit aalajangiissagaluarpat.

- Højesteretimi eqqartuussivimmi suliap ingerlanneqarnerani ilaatigut uppernarsaatissanik saqqummiussinissamut periarfissarititaasut amigaataanerannik aallaaveqarpoq. Illersuisutut assut pakatsinarpoq uppernarsaatit pigisat saqqummiunneqarsinnaannginnerat, aammalu unnerluussisussaatitaasut saqqummiussinerattut pissutsit isumarput malillugu inngimmata. Tamanna inuiaqatigiittut inatsisinit illersugaasutut inissisimanitsinni naapertuutinngilaq. Taamaattumik naammagisimaarnarpoq Højesteret maanna naliliisussanngormat tunniussisoqarnissaanik aammalu eqqartuussisarnermut inatsisit naapertorlugit ingerlatsisoqarsimanersoq.

Kalaallit Nunaanni Eqqartuussisuuneqarfimmut ullaaq manna aalajangiinerup ingerlateqqinneqarnissaa aamma aalajangiunneqarpoq, tassunga tunngatillugu Meinel erseqqissaavoq nunatta eqqartuussisuuneqarfiata nalilertariaqaraa unnerluussissutaasumut sanilliullugu Watsonip paarnaarussivimmiitinneqarnera naapertuunnersoq, tassami Watsonip aalajangiusimammagu unnerluuussissutaasunut nammineq pisuussuteqarani.

- Unnerluussutigineqartutut iliorsimagaluarpalluunniit, aammalu  pineqaatissinneqassagaluarpat, maannamut mattusimaneqarneratut sivisutiginavianngikkaluartoq isumaqarpugut, taamaattumik  Kalaallit Nunaanni eqqartuussisuuneqarfiup nalilertuartariaqarpaa pinerluutigineqarsimasutut unnerluussutaasumut sanilliullugu mattusimaneqarnera naapertuunnersoq, Finn Meinelip, Paul Watsonip illersuisuata erseqqissaatigaa.

Watson: Ilaquttakka pisoq pissutaalluni atugarliorput

Paul Watsonip illersuisui ingerlaavartumik eqqartuussivimmi ataatsimiinnerit assigiinngitsut ingerlaneranni uppernarsaatissanik saqqummiusserusuttarput, taakku isumaat naapertorlugu Japanimiut oqartussaasuinit pisuutitaaneranut pissutissaqanngitsoq uppernarsaataasinnaasunik peqarneraramik. Piffissallu ingerlanerani iluatsitsillutik uppernarsaatit killilikkat aamma videoliat saqqummiuttarpaat. Kisianni taakkunannga ataaserluunniit nunatsinni eqqartuussiveqarfiup iperaanissamik pissutissaqartilersimanngilaa.

Ullumikkut ullaap tungaani eqqartuussivimmi ataatsimiinnermi, illersuisup aamma unnerluussisup Paul Watsonimut apeqquteqarnissamut periarfissinneqarput, kisianni illersuisoq kisimi periarfissamik atuivoq.

2010-mi pisumut tunngatillugu apeqqutit pineqarput, tamannalu nunarsuaq tamakkerlugu ujaarineqalerneranik tigusarineqarnissaanillu piumasaqarnermik pilersitsinikuuvoq Watsonillu ullumikkut qanoq atugaqarneranut aallaaviulluni.

Unnerluussutaasunut tunngatillugu Watson oqaluttuarpoq Japanimi arfanniartartut umiarsuaataannit qulimiguulik pisunut malinnaasoq imermik tarajulimmik serpartarneqarsimasoq.

Maannakkut inissisimanerminut tunngatillugu Paul Watson oqaluttuarpoq Frankrigimi ilaquttani sapaatip akunneranut minutsini qulini facetime aqqutigalugu oqaloqatigisinnaatitaagini. Oqaluttuarpoq nukangasunik marlunnik meerartaqarluni, taakkulu assut paasiuminaatsikkaat susoqarnersoq aammalu nuliani annertuumik eqqugaasimanerarpaa annertuumillu pisut pissutaallutik uippakajaarnermik aqqusaagaqarnerarlugu.