Illoqarfimmi takornariaqarfiusumi akunnittarfinnik amigaateqartoqassasoq nalilerneqartoq

Ilulissani mittarfissuartaassaq Greenland Airports naapertorlugu 2026-mi ammarnissaminut piariissaaq.

Visit Greenlandip timmisartut illoqarfimmut toqqaannartumik timmisartuussisinnaanngornerisa kingunerisaanik takornariat naatsorsuutigisamik amerlippata akunnittarfeqassuseq qanoq inissisimanersoq sukumiisumik misissorpaa.

Visit Greenlandip ilaatigut 2026-mi nunanit allanit unnuisoqarnissaanut periarfissat misissorsimavai, taakkualu 2023-mut sanilliullugu 150 procentimik amerlanerussallutillu ataatsimi 2023-mut sanilliullugit 100 procentimik amerlanerussapput. 

Init 190-it pallillugit amigaatigineqarsinnaasut

- Ilulissani 2026-miilli ingammik juulimi aggustimilu ininik amigaateqartoqassasoq misilittakkat takutippaat, Visit Greenlandip Explore North Greenland suleqatigalugu misissuinerani tamanna inerniliunneqarpoq.

Takornariat unnuiffissanik 150 procentimik amerlanerusunik piumasaqarnerat piviusunngorpat 2026-miilli Ilulissani aggustimi septembarimilu unnuiffissat 190-it amigaatigineqassasut erseqqissarneqarpoq. 

Visit Greenland naapertorlugu 150 procentimik amerleriarneq piffissami tassani Air Greenlandip timmisartuanut inissaliissutigineqartut annertoqatigaat.

Visit Greenlandip siunissamut qiviarnerani ajornartorsiut annertusiartorpoq:

- Ilimagisami A-mi ukiumut 5 procentimik siuariartortoqarpat piffissami 2026-2031-mi inissat 565-it sananeqanngippata 2031-mi inissat 399-it amigaatigineqassapput. Ilimagisami B-mi ukiumut 10 procentimik siuariartortoqarpat 2031-mi inissat 651-it amigaatigineqassapput - Ilimagisamilu C-mi ukiumut 15 procentimik siuariartortoqarpat 2026-mi inissat 954-it amigaatigineqassapput, taama naliliisoqarpoq.

Asulersuaq neriniartarfiliartut

Takornariat amerlanerpaaffianni unammillernartoqareersoq Visit Greenlandip misissuinerata aamma takutippaa. Tamanna assersuutigalugu illoqarfiup neriniartarfiini, takornarianik kiffartuussinermi pingaaruteqartuni atuuppoq:

- Ilulissani neriniartarfinnik apersuinerit takutippaat aasaanerani neriniartarfiit ulikkaaqqajaasartut - allaallu piumaneqarpallaartartut - ima amerlatigisut takornariat (Ilulissanilu najugallit) neriartoraluartut asulersuaq orniguttartut. Aamma neriniartarfiit ilarpassui igasunik cafénilu sulisussanik pissarsiniarnerminni ajornartorsiuteqartarput, Visit Greenland misissuinermini allappoq.

"Kinguarsaataasinnaasut pilertinnagit unnuisarfinnik neriniartarfinnillu annertusaanissaq erngertumik pisariaqartoq, sulisussanillu pisariaqartunik qulakkeerinissaq pisariaqartoq“ Visit Greenlandimi pisortaq Anne Nivíka Grødem naliliivoq.

Pisortap oqartussaasut, aningaasaliisartut, ingerlatsisut aallarnisaasullu misissuineq tunngavigalugu Kalaallit Nunaanni takornariartitsinermik suliaqartunut aalajangiisaqqullugit aningaasaliisaqqullugillu kajumissaarpai.