Illussanik titartakkat kusanarput. Illorujussuit kusanartut. Pilersaarutigineqartorli nuannarineqarpallaanngilaq. Sanilinngortussalli ilarpassuisa Nuummi akimarpasissunik nutaanik illuliornissanik pilersaarutit nuannarinngilaat.
Akerlilersuinerit ima annertutigisimapput, kommunip paasissutissiilluni ataatsimiinnernut peqataasarnini maanna allanngortissimallugu. Suliamut nassuiaammi Sanaartornermut Ingerlatsivimmit Aningaasaqarnermut Ataatsimiititaliami kommunalbestyrelsimi ilaasortanut nassiunneqarsimasumi tamanna erserpoq.
Illussanik titartakkat kusanarput. Illorujussuit kusanartut. Pilersaarutigineqartorli nuannarineqarpallaanngilaq. Sanilinngortussalli ilarpassuisa Nuummi akimarpasissunik nutaanik illuliornissanik pilersaarutit nuannarinngilaat.
Akerlilersuinerit ima annertutigisimapput, kommunip paasissutissiilluni ataatsimiinnernut peqataasarnini maanna allanngortissimallugu. Suliamut nassuiaammi Sanaartornermut Ingerlatsivimmit Aningaasaqarnermut Ataatsimiititaliami kommunalbestyrelsimi ilaasortanut nassiunneqarsimasumi tamanna erserpoq.
- Tusarniaanerup nalaani Hotel Hans Egedemi innuttaasunik 30-nik paasissutissiilluni ataatsimiisitsineq ingerlanneqarpoq. Suliniut ingerlatsiviullu ataatsimiititsinermi aaqqissuussisimanera sakkortuumik isornartorsiorneqarput. Isornartorsiuineq pissutigalugu ingerlatsivik suliniutinut qinnuteqaatinut atatillugu paasissutissiilluni siunissami ataatsimiitisarnianngilaq, naak tamanna ingerlatsiviup peqataatitsinerunissamik sulineranut naapertuulluinnaraluartoq, ingerlatsivik politikerinut allappoq.
AG-p Ingerlatsinermut Sanaartornermullu pisortaq Søren Pedersen sianerfigaa, sunarpiaq pineqarnersoq tusarusullugu.
- Uanga nammineq ataatsimiinnermut peqataanngilanga, paasivarali sulisutta ataatsimiinneq nuanniitsutut misigisimagaat, Søren Pedersen akivoq.
Taassuma nassuiaatigaa suliniummik piginnittoq paasissutissiinissamik akisussaaffeqartoq, kommunili kiffartuussisutut akunnittarfimmi peqataasoq.
- Innuttaasulli naammagittaalliornerat pissusissamisuuginnarpoq?
- Ataatsimiinneq tusarniaanermut ataatsimiititsinerunngilaq, aamma kommunip suliniutiginngilaa, Søren Pedersen akivoq nangillunilu: - Siunnersuutip teknikikkut qanoq suliarineqarnissaa pillugu paasissutissiiniarluta najuuppugut. Paasissutissiilluni ataatsimiititsinerit nalinginnaasumik ingerlalluartarput, siunissamili qaninnermi ataatsimiinnernut peqataaniarnata allattuiniaannarluta najuuttarniarpugut. Ataatsimiititsinerni taamaattuni inissisimaffipput siunissami nalilersortuassavarput, nangilluni oqarpoq.
Akisuunik pigisaqarusussuseq?
EMJ-Atcon Greenland A/S Niels Hammekenip aqqutaata isuani illuliornissanut qinnuteqartuuvoq. Suliaq sivisuumik suliarineqarsimavoq, tusarniaanermilu 13-it akissuteqarsimallutik atsiornernillu katersisoqarsimalluni qulequtaralugu »Niels Hammekenip aqqutaani illunik angisuunik sanaartornerit unitsinneqarlik«. 55-it atsiorsimapput.
Tusarniaanermut akissutini sammineqarnersaapput illoqannginnersatut naleqartitat, ilaatigut uumasut, sanaartornerullu nalaani biilinik oqimaatsunik angallanneq annertusissasoq, Nuullu suli tattoqisaaffiunerulernissaa ernummatigineqarluni.
- Pilersaarut akisuunik pigisaqarusussuseqarnerinnaavoq, innuttaasullu atugarissaartut amerlanngitsut kisimik qitiutinneqarlutik, ”innuttaasut nalinginnaasut” isiginiarneqarnatik, innuttaasut ilaat tusarniaanermi taama akissuteqarpoq.
Allat oqaatigaat, ”illut angisuut akisoorsuit kommunip pilersaarutaanut allanut naapertuutinngitsut”.
- Ilaqutariit qulit illussaqarnissaannik sanaartorneq Nuummi inissaaleqinermut iluaqusiinavianngilaq, illummi akii innuttaasut agguaqatigiissillugu isertitaannit qaffasinnerujussuussammata, taama allattoqarpoq.
Namminersorlutik Oqartussat aamma illunik taama angitigisunik sanaartortoqarnissaa eqqarsarnartoqartippaat.
- Illut agguaqatigiissillugu angissusiat affaannanngortinneqarpat, nunaminertami tassani illut minnerpaamik marloriaammik amerlanerulersinnaapput, Ineqarnermut Attaveqaqatigiinnermullu Naalakkersuisoqarfik tusarniaanermut akissummini taama allappoq.
Illunut assigiinngitsunut tamanut inissaqartoq
AG-p ingerlatsivimmi pisortaq Søren Pedersen aperaa, kommunip – tusarniaanermi akissutini arlalinni erseqqissarneqartutut – pisussaaffiginnginneraa qulakkiissallugu, Nuummi illoqannginnersat illunik mikinerusunik sanaartorfiginissaat?
- Inissiat assigiinngitsut tamarmik illoqarfimmi inissaqartinneqarsinnaassapput, sanaartornerit assigiinngitsut: inissiarsuit nutaat, illut uiguleriiaat illullu anginerusut, akivoq.
- Suliniut taanna suliniutinut allanut naleqqiullugu akerlilersorneqarnerua?
- Misilittakkavut naapertorlugit sumiiffiit aalajangersimasut najukkamut qanittumiittut eqqorneqaraangata misigissutsit qaffakaatinneqartarput. Tamanna illoqarfimmi sumiiffinni allani aamma misigisarparput, Søren Pedersen akivoq erseqqissarlugulu sanaartornerit ilaanni qaqutigoortuunngitsumik, kommunillu suliassani qulakkeerniarlugu suliniutit inatsisinut piumasaqaatinullu naapertuuttuunerat erseqqissaraangagu aalassassimaartoqartartoq.
Amerlanerussuteqartut akuersisut
EMJ Atcon Greenland A/S-imi pisortap Nikolaj Sørensenip oqaatigaa, suliffeqarfik pitsaanerpaamik siunertaqarluni pilersaarusiorsimasoq.
- Sanilerineqartussanit allanilluunniit naammagittaalliuutigineqartut qanoq oqaaseqarfigisinnaavigit?
- Suliniutini taamaattuni soqutigisat sunniuteqartuaannarput. Suliffeqarfipput inissianik sanaartortussatut pilersitaagami, aamma illoqannginnersanik sanaartorfiusinnaasunik peqarpallaannginnami, oqarpoq.
- Sanaartornerup nalaani assartuinerujussuuup ernummatigineqarnera qanoq oqaaseqarfigisinnaaviuk?
– Sanaartornitsinnut aqqummik allamik pilersitsisinnaavugut. Aammami sissap qulaatigut aqqummik pilersitsisoqarnissaa pilersaarutigineqartunut ilaavoq, taamaalilluni illoqarfimmi innuttaasut suli sumiiffimmut tamaanga angalaarsinnaaniassammata. Innuttaasullumi ilaannut ajornannginnerumik tikinneqarsinnaassalluni pisuinnarnummi aqquteqartussaammat. Nikolaj Sørensen akivoq.
Pilersaarummut qinnuteqaat sapaatip akunneri marlussuit matuma siornagut kommunalbestyrelsip Aningaasaqarnermut Ataatsimiititaliaanit akuerineqarpoq, sapaatillu akunnerani kingullermi kommunalbestyrelsimi tamarmiusumit oqaluuserineqarluni. Imaqarniliaq naapertorlugu innersuussut – ingerlatsivimmit nangaassuteqarfigineqaraluartoq – politikikkut amerlanerussuteqartunit IA-mit Demokraatinillu akuerineqarpoq. Siumut Nalerarlu akerliupput.
Siumut ikinnerussuteqarluni ima oqaaseqaateqarpoq:
- Qinnuteqaat inissaaleqinerup akiornissaanut iluaqutaasussaanngimmat, inunnullu inissiani najugaqareersunut tunngammat, aasaaneranilu tamaani pinngortitamik atuisut tassaammata angalanissamut periarfissaqanngitsut pinngortitamillu atuisinnaajunnaartussat, itigartipparput, Siumut allappoq.
Sanaartornermut Avatangiisinullu pisortaq Søren Pedersen ilisimatitsivoq, suliaq suli naammassineqanngitsoq. Maanna kommunimut pilersaarummut tapiliussaq suliarineqassaaq, taannalu aamma tusarniaassutigineqassalluni. suliaq aatsaat aasaru inaarutaasumik naammassineqassasoq naliliisoqarpoq.
