INATSISARTUT
Iluanaaruteqartarneq pillugu inatsisissatut siunnersuut Naalakkersuisunit naaperiarneqarpoq
Inatsisartuni ilaasortap Doris Jakobsen Jensen (S) iluanaaruteqartarneq pillugu inatsisissatut siunnersuutaa ullumi sisamanngornermi siullermeerneqassaaq. Naalakkersuisut allannguutissatut siunnersuummik saqqummiussipput, tassanilu Inatsisartunut ilaasortap siunnersuutaa ilaannakortumik naaperiarneqarpoq.
Doris Jakobsen Jensen (S) isumaqarpoq piffissanngortoq inatsisinik suliaqartoqarnissaa siunertaralugu pissusissamisuunngitsumik iluanaaruteqartoqartarneranik nakkutiginninnerup annertusineqarnissaa, taamaammallu siunnersuuteqarpoq niuertarfinni iluanaaruteqartarneq pillugu inatsisissatut siunnersuummik
Naalakkersuisut suliaqaqqullugit peqquneqassasut.
Assi (arkiv): Leiff Josefsen
Inatsisartuni ilaasortaq, Doris Jakobsen Jensen (S) eqqumiiginnippoq sooq Kalaallit Nunaanni Kalaallit Nunaanni akit qaffakkiartuaannarnersut Naalakkersuisut akinik apparsimaarinnissutissanik suliniuteqartaraluartut:
- Innuttaasut asuliinnaanngitsoq aningaasaqarniarnermikkut unammillerneqaqqapput,
tamatumanilu isertitakinnerusut kisimik eqqugaannatik aamma akunnattumik isertitallit
ilanngullutik eqqugaapput. Tamannalu pivoq naak Naalakkersuisut Inatsisartullu akinik
apparsaaniarlutik iliuuseqaraluartut, tassami ataatsimut isigalugu sunniutaat
annikitsuinnaanngikkaangamik sunniuteqanngivissortarput.
- Nunatsinni nioqqutissat akii apparsarniarlugit iliuusissat assigiinngitsuusinnaapput,
assersuutigalugu Danmarkip avataanut akikinnerusumik niueqateqarneq
aqqutissiuunneqarnerusinnaavoq, isumaqatigiissutit atuuttut eqaallisaaffigineqarsinnaapput
imaluunniit pisiniarfiit iluanaarniarsinnaanerat nutaamik inatsisiliuunneqarsinnaavoq, ilaatigut siunnersuummini taama nassuiaateqarpoq, aamma apeqqutigaa sooq Kalaallit Nunaanni ulluinnarni pisiassat akii qaffasissuunersut:
- Akit qaffasinnerinut ajornanngitsumik Europami sorsunneq pisuutinneqarsinnaavoq kisianni
assersuutigalugu Danmarki nioqqutissanik pisiniarfigisartagarput nioqqutissat akiisigut
annikitsuinnarmik agguaqatigiissillugu eqqugaanikuuvoq, taamaattumik tamanna annerusumik
tikkuarneqarsinnaanngilaq.
Naalakkersuisut tunngaviusumik isumaqataapput misissueqqaarusuppulli
Naalakkersuisut siunnersuuteqarnermi isumaliutigineqartut paasilluarsinnaanerarpaat, ataavartumillu namminneq assinganik
isumaliuteqartarnerarlutik.
- Taamaattumik ajornartorsiutaasoq inuiaqatigiinnut attuumassuteqartuassasoq
naatsorsuutigineqartariaqarmat Naalakkersuisut siunnersuutigaat, nutaamik inatsisiliortoqarnissaanik
isummertoqartinnagu maani unammilleqatigiinnermut, niuernermut, iluanaaruteqartarnermullu
tunngasut annerusumik ersarissarneqassasut.
- Tamanna pillugu Naalakkersuisut tulliuttutut
allannguutissatut siunnersuuteqarput:
Atuisunut akigititat naleqqutinngitsumik qaffannginnissaasa qulakkeerneqarnissaanut
periaatsinik assigiinngitsunik erseqqissaasumik, matumani iluanaaruteqartarneq pillugu
inatsisiusinnaasup nassuiarneqarnissaa ilanngullugu, Naalakkersuisut nalunaarusiamik
suliaqaqqullugit peqquneqarnissaannik Inatsisartut aalajangiiffigisassaattut siunnersuut.
Nassuiaat kingusinnerpaamik UKA25-mi Inatsisartunut saqqummiunneqassaaq, Naalakkersuisut naaperiaapput.
Tamanna isumaqarpoq Inatsisartut nutaat aalajangiisuujumaartut siunnersuut ingerlaannassanersoq.
Aammattaaq Naalakkersuisut akissuteqaamminni ilanngullugu innersuussutigaat misissuineq atuisoqarnermut unammilleqatigiinnermullu aqutsisoqarfiup 2023-mi
Kalaallit Nunaanni niuernermi akigitinneqartut pillugit misissuinerat, tassani inerniliunneqarpoq ulluinnarni nioqqutissanik pisiniarfiit pissusissamisuunngitsumik sinnilimmillu iluanaaruteqanngitsut.
Siunnersuummut aappassaaneerneq februaarip 12-ani 2025-mut ullulerneqarpoq.
