Ilulissat illoqarfiit annersaata tullinngoriaannaasoq – Inissaaleqinerli aarlerinartorsiortitsivoq
Ilulissat nutaamik mittarfittaartussaammat ineriartorfioqaaq, tamannalu pissutigalugu illoqarfik nunatsinni illoqarfiit annersaata tullinngoratarsinnaalluni. Ineriartornermili unammilligassarpassuaqartoq, borgmesteri Palle Jeremiassen oqarpoq. Ineqarniarneq illoqarfiup ineriartorneranut unammilligassaassaaq, illoqarfimmi 2026-p tungaanut sulisunik nutaanik 1.000-t tikillugit pisariaqartinneqassapput.
Foto: Avannaata Kommunia / Rambøll
Ilulissani innuttaasut ukiuni tallimani kingullerni amerliartupiloorput. Naatsorsueqqissaartarfiup kisitsisaatai kingulliit naapertorlugit illoqarfimmi innuttaasut 409-nik amerleriarsimapput, Sisimiunilu innuttaasut piffissami tamatumani 92-inik ikileriarsimallutik.
Sisimiut maanna nunatsinni illoqarfiit annersaata tulliulluni 5.400-it missaani innuttaqarpoq. Ukiulli ingerlaneranni allanngorsinnaavoq. Ineriartornerummi takutippaa Ilulissani maanna inuttaasut 5.000-it missaaniittut.
Ilulissalli ineriartornera ineqarniarnikkut unammillertitsisoq, Avannaata Kommuniani borgmesteri, Palle Jeremiassen isumaqarpoq.
Ilulissani mittarfik nutaaq 2026-imi ammarpat takornarialerinerillu amerlippata Ilulissani innuttaasut amerlerniarnissaat naatsorsuutigineqarpoq. Illoqarfiup ineriartornissaa borgmesterip isumalluarfigigaluaraa, ineqarniarneq ajornartosiutaasinaasoq iliuuseqarfigineqartariaqartorlu borgmesterip nassuerutigaa.
Utaqqisut 1.000-it.
- Maanna Ilulissani inissianut utaqqisut 1.000-it missaaniipput, tamanna unammillernartuuvoq, Palle Jeremiassen Sermitsianut oqarpoq nangillunilu:
- Maannakkut maanna sulisussat 350-it amigaatigaagut, mittarfissarli nutaaq ammarpat, mittarfinni hotellini allanilu sulisinnaasut 1.000-it missaaniittut pisariaqartilertussaavagut.
Borgmesterili isumalluarpoq, kommunilu inissialiortiternissamut ulapittussanngorpoq.
- Inissialiortitertussaassaagut, unammillernassaaq. Kisianni isumalluarpunga aamma upperaara iluatsissasoq.
Siunissami inissiat nutaat 770-it
Avannaata Kommuniata Ilulissanut eqiterussinissamut pilersaarutaani atuarneqarsinnaavoq illoqarfiup immikkoortuini pioreersuni inissianik nutaanik 770-inik sanaartornissamut periarfissaqartoq:
- Ilulissani mittarfiup allineranut takkutilersumut illoqarfimmut siunertanut sumiiffiit nutaat atugassiarinissaat pisariaqartinneqarpoq, taamaalillunilu Ilulissanut piffissamut ungasissumut illoqarfiullu ineriartortitaaneranik qularnaarisoqarluni. Taamaattumik suliarisaq manna aallartisarneqarpoq, taamaalilluni illoqarfimmiittunut ilungersuutigisassanut, periarfissanut aamma piukkunnaataasunut isummertoqarsinnaassammat.
Mittarfiup allineratigut illoqarfik inissisimaffinni arlalinni malunnartumik allisussaassasoq aamma allassimavoq, soorlu nunaminertanut tunngasutigut, innuttaasunut tunngasutigut, aningaasaqarnikkut assigiinngisitaassutsinullu tunngasutigut.
- Illoqarfiup sinnera anersaarfissartalerniarlugu illoqarfiup sanaartorfiginissaanut eqiterussiviginissaanullu periarfissamik nalunaartoqarnissaq pingaartuuvoq. Quppernerni tulliuttuni inaarutaasutut ilusilersornerinik aalajangerneqartunik inissianik 770-it missaannik tamaani illoqarfioreersumik sanaartugaqarfiunissamut periarfissat nalunaarsugaapput.
