Erinarsortut appikkaangata

Ilaanniuna soorlu naalakkersuinermik ingerlatsisut sunik tamanik aqutsisunngortuusisartut. Qujanaqaarliuna inuaqatigiinni allanik pingaarutilinnik eqimattatut, ikinngutigiittut inuttullu ataasiakkaatut sammisassaqartaratta, pingaartitatsinnik.

Taanna innuttaasutut peqatigiissinnaanerput, naalakkersuinermut tunngasut akuliutinngikkaluarlugit, inuit ulluinnarni inuunerannut pingaaruteqaqisoq isumaqartitsisorlu – isumalerujussuusinnaasoq.

Tassani nammineq kajumissutsimik peqatigiinneq nuannisarfiusinnaavoq ingerlalluarlunilu, peqatigiinneq nuanneraangat.

Iluanaarput timersoqatigiiffinni, kattuffinni, qalipaaqatigiittartuni peqatigiittartut imaluunniit erinarsoqatigiinni erinagissuni erinarsortuarsinnartut. Peqatigiiffippassuaqarpormi kajumissutsimik ingerlanneqartunik, peqataaffigisinnaasannik akisussaaqataaleruillu sammisassanut sinaakkusersueqataaffigisinnaasannik.

Erinarsullammaat

Taakku nersortariaqarput sapaatip akunneri tamaasa aamma ukiumiit ukiumut peqatigiinnissamut, suleqatigiinnermut kajumeqatigiinnermullu tunngavissiisartut. Eqqarsaatigilaaruk nunarsuaq imaluunniit illoqarfik inooqataaffigisat uumassuseqanngitsoq: meeqqanik arsamik pinnguartoqanngitsoq, atornikoorniarfeqanngitsoq iserfigisinnaasamik. Assersuutigalugit.

Erinarsoqatigiit-uku maanna taamaatissimasut Nordisk Koncertkor, nersornialaarusukkikka, 2006-imiilli arnat angutillu peqatigiillutik Nuummi erinarsoqatigiiffigisimasaat. Maanna erinarsoqatigiit allamik atserneqarlutik angutit erinarsoqatigiiffigilersimavaat.

Nordisk Koncertkor pilersinneqarsimavoq erinarsoqatigiissuarnik tikeraartitsinissamik eqqarsaqatigiittunit. ”Soormi nipilersornermik nuannarisallit taamatut tusarnaartitsinernit misigisaqassanngillat?”. Unamminartortaraa taamatut nipilersoqatigiissuarnik tusarnaartitsisissagaanni, erinniarsuarnik kisimiillutik erinarsortartulinnik aamma erinarsoqatigiissuarnit ingiallorteqartussanik, taakku inuppassuunissaat. Taakkumi Europamit tikisissagaanni sulingaatsiartoqartussaammat, paasinarsivorli erinarsoqatigiit peqataasussat Nuummi najugaqarpata, taava nipilersortartut kisimiillutillu erinarsortussat ”kisiisa” angalatillugillu ineqartinneqarsinnaassasut.

Sequnngiullugu tusarnaarneq

Unamminartortaata apparaa erinarsoqatigiit erinagissarluarneqarsinnaanissaat. Naammanngilarmi kisimiillutik tusarnaartitsisartut nipilersoqatigiissuillu pikkorissut appisikkaanni, ingiallortissaalli iggiingappata. Iluatsipporli, taamanikkut Bente Colding-Jørgensen Ilinniarfissuarmi ilinniartitsisuummat. Taanna erinarsoqatigiinnut aqutsisunngorpoq ukiorpaalussuarnilu tusarnaartitsinerit arlalippassuit aqutsisuuffigisimallugit.

Katuap inersuani qulliit sakkukilligaangata inimilu pissanganeq malunniukkaangat ingilluartitaariarluni appittunik alutornavissunik tusarnaartarneq naliitsuuvoq, soorlu Mozartsip Requiemmia, Kroningsmesse, Vivaldillu tusarnaagissiaa Dixit Dominus kiisalu Gounodip tusarnaagassiaa Ceciliamesse. Inersuarmi erinnat allarluinnaat appikkaangatigit sequnngiullugu, nipit allanngorartut iluarisimaarnartulli tusarnaarlugit nuannertarsimaqisoq.

Katuami, oqaluffinni, GU-p inersuani Ilinniarfissuullu Nalliuttorsiortarfiani tusarnaartitsisunut najuuttarsimanarpoq aamma erinarsoqatigiit Nanooq, Angu, Josef Josefsen, Jim Milne allarpassuillu peqatigalugit tusarnaartitsigaangata.

Tamakkuupput inuuninni misigisama pingaartut ilaat. Nalunngeqaaralu erinarsoqatigiit namminneq nuannaarutigisaminnik pissarsilluartarsimaqisut.

Aamma peqatigiiffinni allani ilaasortat suliatik iluatsikkaangata pissarsilluartutut misigisimasarput.

Nuannequtigiinnartarpaalu inunnik allanik, suliassanik nutaanik pimoorussassanillu nutaanik peqatigiinnerit nassataqartarneri.

Erinarsoqatigiit tusarnaartitsisut suli tusarnaarsinnaavatit immiussatut, ilaatigut Youtubemi nassaarisinnaagakkit Gounadip Ceciliamesse atoraat imaluunniit Nanooq aamma Angu tusarnaartitseqatigigaat.