Immikkut ilisimasalik Killavaat Alannguat pillugu: Aatsitassaqarfik nunarsuarmi pitsaanerpaanut ilaasoq

Australiamiut aatsitassarsiortitseqatigiiffiata Tanbreezip Killavaat Alannguanni aatsitassanik peqassuseq 2001-mili misissorpaa.

2020-mi aatsitassanut qaqutigoortunut qalluinissamut akuersissummik tunineqarput, qanittumilu ingerlatseqatigiiffik aatsitassarsiortitseqatigiiffimmik Australiamiunik Amerikamiunillu pigineqartumik Critical metals Corpimik Tanbreezimik tigusiartuaarsinnaanermik 1,5 millkiardit koruunillu angullugit suliniummut aningaasaliinissamik isumaqatigiissuteqarpoq.

Tamannalu qaqugu aatsitassaanik qalluinerup aallartissinnaaneranik sunillu pisariaqartitsisoqarneranik eqqarsalersitsivoq.

Kajungerisanut saffiugassat

Killavaat Alannguat nunarsuatsinni aatsitassanik qaqutigoortunik peqarfinni annerpaanut ilaanerat ilisimatusartut isumaqatigiissutigaat.

– Nunatta kujataani Gardarip nunataa minnerunngitsumillu Ilímaussap qaqqai aatsitassanik qaqutigoortunik peqarfissuupput, tassaniippullu piffiit aatsitassaqarfiit Kuannersuit Killavaat Alannguallu, Geusimi Videncenter for Mineralske Råstoffer og Materialer pisortaq Jakob Kløve Keiding oqarpoq, nangipporlu: – Aatsitassat qaqutigoortut immikkut qaqutigoortuunngilaat, peqarfittut ilisimaneqartut ukiunut 200-nut naammattunik aatsitassaqarput. Taamaakkaluartorli Kalaallit Nunaanni peqassuseq, ingammillu Killavaat Alannguanni peqassuseq soqutiginaatilerujussuupput. Aatsitassat tamaaniittut akuitsuuallaanngillat, peqassutsilli annertunerujussua pissutigalugu nunarsuarmi aatsitassaqarfinnut annerpaanut ilaavoq. Killavaat Alannguanni iluaqutissat aappaat tassaavoq saffiugassat katitigaanerat.

– Neodymium, praseodymium dysprosiumilu anorisaatinik innaallagissiuutini biilinilu innaallagiatortuni kajungerisanik sanaartornermi immikkut pingaaruteqarput, taakkunanngalu Kuannersuarni ingammillu Killavaallu Alannguanni aatsitassat annertuumik akoqarput.

Kina nalitusiartortitsinerpaavoq

Kuannersuit Killavaallu Alannguat qaqqaqarfimmi ataatsimi pilerput, piffissanili assigiinngitsuni, tamannalu aatsitassanik qaqutigoortunik peqassutsimut sunniuteqarpoq. – Ilaatigut qanoq akuitsiginerannut, ilaatigullu allanik sunik akoqarnerannut sunniuteqarpoq, tamannalu Kuannersuarni uranimik akoqarpallaartumi ilungersuanartorsiortitsivoq. Tamanna tamanna Killavaat Alannguanni ajornartorsiutigineqanngilaq, tassanimi aatsitassaq eudialyt, uranimik annikitsumik akulik siumugassaavoq, Jakob Kløve Keiding oqaluttuarpoq.

Aatsitassani qaqutigoortuni unammilligassaq annertooq tassaavoq akuiaaneq. – Tamanna Kinap annertuumik ilisimasaqarfigaa, teknikimuuinnaq tunngatinnagu, aammali periutsini aalajangersimasuni akuerissutinut patentinullu tunngatillugu, kiisalu aatsitassarsiornermit pisisartumut nalitusiartortitsineq tamakkerlugu. Taakku aatsitassarsiorfiit 60 procentii pigereerpaat, nalitusiartortitsinermilu ingerlaqqikkutta niuerutigineqartut 80-90 procentii tigummivaat, Jakob Kløve Keiding oqarpoq.

Unammillerneq

Europami suliniutit assingusut arlallit ingerlanneqarput. Norgemi aatsitassarsiortitseqatigiiffik Rare Earth Norway carbonatiteqarfimmik annertuumik Fenimi nassaarpoq. Sverigemi aatsitassarsiortitseqatigiiffik naalagaaffimmit pigineqartoq LKAB saviminissanik tunisassiornerminni aatsitassanik qaqutigoortunik saniatigut pilersitanik niuerfimmut aamma eqqusserusupput. Jakob Kløve Keidingili naapertorlugu ataatsikkut suliniutinut arlaqarnerusunut inissaqarluarpoq.

– Suliniutit pingasut tamarmik aallartissinnaanerat takorloorluarneqarsinnaavoq, tamatumanili soorunami akuisa katitersimanerat kiisalu aatsitassanik qaqutigoortunik aalajangersimasunik piumanninneq nalitusiartortitsinerullu qanoq isikkoqarumaarnera apeqqutaavoq.

Critical Metals Corp – Australiamiut Amerikamiullu ingerlatseqatigiiffiat

Sapaatip akunnerani kingullermi Critical Metals Corp Amerikamiut aatsitassarsiortitseqatigiiffigaat aallaaseraarput. Matumanili Australiamiut Amerikamiullu ingerlatseqatigiiffissuat, Australiamiut ingerlatseqatigiiffiannit European Lithiumimit Amerikamilu aallaaveqartumik Sizzle Acquisition Corp-imit pilersinneqarpoq. European Lithium Sizzlemi 83 procentimik piginneqatigiissutinik pigisaqarpoq.

Critical Metals Corp taakku ingerlatseqatigiiffiata qanoq aaqqissuussaaneranik aperaarput, taakkuli saaffiginnissuterput akinngilaat.

Ingerlatseqatigiiffimmik Kinamut tunisineq

Critical Metals Corpimi pisortaaneq siulersuisunilu siulittaasoq tassaavoq Australiamiu Antony William Paul Sage – imaluunniit Tony Sage. Taanna Perthimi Australiamiut aatsitassarsiornermik ingerlatsinerannut 1997-mili akuuvoq, taamanikkullu siunnersuisarfik Okewood Pty Ltd, Australiami nunanilu allani aatsitassarsiornermik ujarlernermillu ingerlatsivinnik aningaasalersuisarlunilu ingerlatsisartoq pilersippaa. CV-a malillugu suliniutinik soorlu 2008-mi Australiap avannamut kitaani magnetitimik suliniummik qaammatit 18-it sioqqullugu AUD 10 millionilikkaminik Mount Anketellimik Kinamiunut Metallurgical Corporationimut AUD 400 millionilersillugu tunisinermini milliuunilikkaanik iluanaartoarpoq.

Akileraarusersuinermik suliat

Tony Sage ukiut ingerlaneranni ingerlatseqatigiiffinnut arlalinnut siulersuisuni siulittaasuullunilu pisortaasarpoq, ullumikkullu Critical Metals Corpip saniatigut Cyclone Metalsimut, CuFE Ltd-mut European Lithiumimullu suli siulersuisuni siulittaasuulluni. Australiamiut tusagassiorfiat ”The West Australian” naapertorlugu Tony Sage ukiorpassuarni peqquserluuteqarsimasinnaaneq akileraarutinullu akiliinaveersaarsimasinnaaneq pillugu akileraartarnermi oqartussanit misissugaavoq, ilaatigullu piffissami 2006-13 akileraarutinut tunngasunut akiligassinneqarsimalluni.