Oqaluttuatoqqat aallaavigalugit silarsuaaraliortut – inuussutissarsiutillu nutaap pilersinnissaa takorluugaraat

Ikinngutigiit Qunaaq Møller aamma Pani Enequist ukiut qulit aqqanillillu akornanni matuma siorna nalunngisareeqqaaleramik qarasaasiatigut pinnguaat Assassin’s Creed nuannaralugu paasivaat.

- Pinnguaatip kulturinik assigiinngitsorpassuarnik imaqarnera nuannaraara, Pani Enequist oqarpoq.

Saniani Qunaaq Møller isumaqataalluni anngaavoq.

Qarasaasiakkut pinnguaatit nuannarineqarluartut nersornaaserneqartartullu alutoringaaramigit, kalaallit oqaluttuatoqaannik upperisatoqaannillu aallaaveqartunik qarasaasiakkut pinnguaasiornissamik isumassarsivoq.

Qarasaasiakkut pinnguaat pissanganartoq Qaamaneq, Qunaaq Møllerip, Pani Enequistip Inuaversemilu sulisut allat peqatigalugit siorna suliaralugu aallartippaat.

- Pinnguaammi angakkoq inuusuttoq tupilannit saassunneqarnermini nipini, inoqutini asasanilu annaavai, Qunaaq Møller nassuiaavoq.

Angakkoq inuusuttoq saassunneqarnermini ilumigut qaamanermik ikittoqarpoq, silarsuarlu taamaattussaannartut isigisani angakkunit peqquserluttunit aserorneqarsimasoq paasivaa.

Nunarsuarmi pissutsit oqimaaqatigiileqqinnissai anguniarlugu, ikiortini marluk peqatigalugit angalalluni aallartippoq.

- Aqqutaani Sassuma Arnaa, Aningaaq Maliinalu pillugit oqaluttuatoqqat Asiarlu naapinneqassapput.

Qaamaneq qarasaasiami pinnguaataannaanngilaq.

- Qarasaasiatigut pinnguaataannaanani, piorsarsimassutsikkut kingornutatsinnik digitaliseeriineruvoq, Qunaaq Møller oqarpoq.

Inuussutissarsiornikkut nutaarluinnarmik aamma periarfissaqalersitsisinnaasoq, suliffinnik pilersitsisinnaasoq, piorsassimassutsimik suliaqarnermik siuarsaaqataasinnaasoq nunattalu karsianut aningaasarpassuarnik isaatitsisinnaasoq taanna isumaqarpoq.

Kalaallit Nunaanni qarasaasiatigut pinnguaasiortarneq ‘suli pilersinneqanngilaq’

AAMMA ATUARUK

Kalaallit Nunaanni qarasaasiakkut pinnguaat siulleq

Qarasaasiatigut pinnguaatinik suliaqartut Inuaverse, aqqanilinnik sulisoqartoq, Kalaallit Nunaanni taamattunik suliaqartuni kisiartaanngillat.

Filmiliortartoq Marc Fussing Rosbach qarasaasiatigut pinnguaammik ilusilersuilluni siorna oqaluttuarpoq, tassanilu qarasaasiamik pinnguaammik atuisut silarsuaq ammasoq Kalaallit Nunaatalu nunataanik aallaaveqarluni pilersitaq misissorsinnaassavaat.

Kalaallit Nunaannili qarasaasiakkut pinnguaatinik tunisassiorneq pillugu oqaluttuaq tamaanga killeqarallarpoq.

Meeqqat, inuusuttut inersimasullu amerlasuut qarasaasiakkut pinnguaatinik nuannarisaqaraluartut, Kalaallit Nunaanni qarasaasiakkut pinnguaatit tunisassiarineqarnissaasa soqutigineqarnerat annikittoq Qunaaq Møller Pani Enequistillu oqatigaat.

- Iluamik suli pilersinneqanngilaq, Pani Enequist oqarpoq.

Taamaakkaluartoq soqutiginninneq annikitsumik qaffakkiartortoq malugisinnaavaat.

- Niuerutigineqarnerata ineriartornera, pinnguaatillu nuannarineqariartornerat eqqarsaatigalugit siuariartorneq arriippallaarpoq, Qunaaq Møller oqarpoq.

DR-ip radiokkut aallakaatitassiaani ´K-Live´-mi qallunaap pinnguaatinik ilisimatusartup, nunarsuaq tamakkerlugu pinnguaatinik tunisassiorneq 175 milliardit dollarinik naleqartoq – 1,25 billionit koruuninut naleqqiunneqarsinnaasut, qaammammi kingullermi oqaluttuaraa.

Filmiliornerup silarsuaani 2025-mi isertinneqartunit marloriaatai sinnerlugit amerlanerusut, aallakaatitassiami eqqaaneqarpoq.

- Annertoorujussuarmik niuerfiuvoq, Qunaaq Møller oqarpoq.

Kalaallit Nunaanni qarasaasiatigut pinnguaatinik niuernerup soqutigineqarnera kigaatsunnguamik annertusiartorpoq.

Esports timersuutini arsaannermut, assammillu arsarnermut allanullu naleqqersuunneqarsinnaanera Inatsisartuni ilaasortat maajip 26-ani akuersissutigaat.

Taamaalillutik e-sportimik peqatigiiffiit timersoqatigiiffiit allat assigalugit Naalakkersuisunit tapiiffigineqarsinnaalerput.

Tamatuma saniatigut Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik Kalaallit Nunaani inuusuttunut Gaming Discord-serveri (nittartakkatigut inuit attaveqaqatigiittarfiat aaqq.) nutaaq ukiup aallartilaarnerani ammaappaa.

Inuusuttut sinerissamiittut serverip taaguutaa, Greenland Gaming, aqqutigalugu nittartakkatigut naapissinnaapput, qarasaasiatigullu pinnguaatini ulluinnarni pisartut pillugit oqaloqatigiissinnaallutik, Naalakkersuisoqarfik februaarimi tusagassiuutitigut nalunaarummi allappoq.

Aningaasaliinissamulli piumassuseq annikippoq.

- Kalaallit Nunaanniit aningaasaliiffiginiarneqarneq unammillernartuuvoq, nunatsinnimi qarasaasiatigut pinnguaat sanarusukkaluaratsigut tamanna ajuusaarnarpoq, Qunaaq Møller oqarpoq.

Kalaallit Nunaanni Eqqumiitsuliornermik Aningaasaateqarfik Qunaaq Møllerimut qaammatini arfineq-marlunni sulinissaanut tapiisuteqarpoq – tamatumali saniatigut suleqatigisai nalinginnaasumik suliffimmi saniatigut, qarasaasiatigut pinnguaat aningaasarsiutiginagu namminneq kajumissutsiminnik, suliarisarpaat.

Qunaaq Møller naapertorlugu Kalaallit Nunaanni politikerit, qarasaasiatigut pinnguaatinik niueqatigiinnermik suli misissorneqarsimanngitsumik tapersersuinissaq pingaartinnerusariaqarpaat.

- Ingammik Kalaallit Nunaanni taama pikkorissoqartigitillugu, oqarpoq.

Pani Enequist isumaqataavoq.

- Nunami maani isiginnaartitsisartunik atorsinnaasatsinnik — eqqumiitsuliortunik, nipilersortartunik — peqarpugut. Qarasaasiatigut pinnguaatinik ineriartortitsineq eqqumiitsuliortut – piorsarsimassutsimik suliaqartut tamaasa aqqusaartussaavai, naqissusiivoq.

- Pikkorissoorpassuaqarfiuvoq

Qunaaq Møller, Pani Enequist pinnguaatinillu ineriartortitsisut allat Inuaversemeersut Sverigemi Malmømut maajip naanerani angalapput.

Qarasaasiakkut pinnguaatit pillugit ataatsimeersuarneq Nordic Game 2026, nunanit avannarlerneersut nunanilu allaneersut 3000-init amerlanerusunit peqataaffigineqarpoq.

Inuaversep Malmømiinneranut ataatsimeersuarnermi aaqqissuisunit angalanermi aningaasartuutit akilerneqarput. Inuaversep suleqatai, aningaasaliisartut nutaat, pinnguaatinik saqqummersitsisut pinnguaatinillu ineriartortitsisut maajip 26-aniit 29-anut angalanerminni naapillugit ataatsimooqatigaat.

Peqataaneq assigiinngitsorpassuartigut misigisaqarfiullunilu tupinnartoqarpoq.

- Nuannaarlutalu nukissaqarluarpugut, Pani Enequist oqarpoq nangillunilu:

- Inunnik ulikkaavippoq!

Inuppassuaqaraluartoq, avatangiisillu pikialaarfiugaluaqisut , inuit soqutigisaqaqatigisat akornanniinneq, tassa qarasaasiatigut pinnguaatinik soqutigisaqartut akornaniinneq, oqiliallannarpoq.

- Nassuiaasariaqanngilagut. Suna anguniagarineripput, sunalu siunertarineripput paasisinnaalluarpaat, Pani Enequist oqarpoq

- Misigisaq allaalluinnarpoq, pikkorissutut (nørd) tipeqarpoq, Qunaaq Møller ilassusiivoq nangillunilu:

- Soorunami niuerniarlutik peqataasut amerlaqaat, aammali amerlasuut suliat nuannaralugit suliaqarusunnermigut peqataapput.

Inuaversemi sulisut suliffimmi sammisartik pillugu annerusumillu ilisimasaqarfiginerulerusullugu angalapput. Inuit suliniummut peqataarusuttut attaveqarfigilernissaannut periarfissaqalernissartik aamma neriuutigaat.

Tamannalumi iluatsippaat. Ilaatigut nipilersuusiortartoq, qarasaasiatigut pinnguaatip nipilersuusiornissaanik ikiuukkusuttoq oqaloqatigaat.

Taava danskeq isiginnaartitsisartoq Magnus Bruun – ilaatigut Assassin’s Creed-imi inuttaasut pingaarnerit ilaannut oqaluttuusoq – naapippaat.

- Assorsuaq soqutiginnippoq, Qunaaq Møller oqaluttuarpoq.

Nersornaatisinissamik takorluugaq

Ataatsimeersuarnermi Nordic Game Awards nersornaasiutigineqartarpoq, nunanit avannarlerneersut qarasaasiatigut pinnguaasiaat malunginiarneqarluartumik angusaqarluarsimasut ukiut tamaasa nersornaasiissutigineqartarpoq.

ARC Raiders, qarasaasiatigut pinnguaat arlalinnit pinnguaqatigiiffiusinnaasoq svenskinit sananeqartoq, ukioq manna ajugaasuuvoq.

Qarasaasiatigut pinnguaammik Kalaallit Nunaanneersumik nersornaasiisoqarsinnaanera ilimagaasiuk?

- The Game Awardsimi qarasaasiatigut pinnguaatinut ukiumut nersornaasiunneqartartoq pissarsiarinissaa anguniagaraarput, Qunaaq Møller akunnattoorani akivoq.

The Game Awards ukioq 2014 aallarnerfigalugu ukiut tamaasa, qarasaasiakkut pinnguaatinik suliaqartut Oscariat, ingerlanneqartarpoq.

Nersornaammik tamatuminnga pissarsinissamik takorluugaqarneq piviusorsiortuunngitsutut oqaatigineqarsinnaanngitsoq, Qunaaq Møller isumaqarpoq.

Qarasaasiatigut pinnguaatinik ineriartortitsineq inunnik tuusintilikkaanik suliarineqartaraluartoq, suliffeqarfinnit minnerusunit nersornaat aamma pissarsiarineqarsinnaasoq taassuma naqissuserpaa.

Assersuutigalugu qarasaasiatigut pinnguaasiornermik suliffeqarfik frankrigimeersoq Sandfall Interactives siorna taama angusaqarpoq, tassanilu inerisaasut 30-t missaanniittut qarasaasiatigut pinnguaat Clair Obscur: Expedition 33 saqqummersippaat, tamatumalu kingorna 482-inik assigiinngitsunik nersornaaserneqarlutik.

Ilaatigut The Game Awards 2025-mi qarasaasiatigut pinnguaasiornermik ukiumut nersornaasiunneqartartumut toqqarneqarsimapput.

Qunaaq Møllerip, Pani Enequistip Inuaversellu tamanna anguniarlugu takorluugaraat.

- Isumaliuutiga tassaavoq siunissamut ungasissumut tunaartaqartuarsinnaasariaqarneq. Anguniakkammi tunaartaa eqqoqqissaanngikkaluarlugu angusaqarsinnaaneq imminermini naammappoq, Qunaaq Møller qungujulalluni oqarpoq.

Nersornaammik pissarsinissamut takorluugaqarnerup piviusunngortinneqarnissaanut anguniakkap, anguneqarnissaa eqqarsaatigalugu suli suliassarpassuaqarpoq. Qarasaasiatigummi pinnguaasiaq inaarneqaqqaartariaqarpoq, tamannalu ukiut arfinillit ingerlaneranni naammassineqarnissaa pilersaarutaavoq.

- Aningaasalersorneqarnerali apeqqutaalluinnassaaq. Aningaasalerneqarpammi anguniagaq ukiumik ataatsimik immaqaluunniit marlunnik sivikinnerusumik naammassineqarsinnaanera anguneqarsinnaalissagaluarpoq, Qunaaq Møller oqarpoq.

Tamassuamalu angunissaa tikitserlugu Qaamaneq kajumissutsimik suliniutaassaaq.

Sverigemi Nordic Game ataatsimeersuarnerani annertuumik soqutiginnittoqaraluartoq, Kalaallit Nunaanniit tapersersorneqarnissaq amigaataavoq.

Taamaattumik Inuaverse aamma EU-mut suliniummut tapiissutinik qinnuteqarsimavoq. Kulturikkut kingornussassanik inunnut nuannaarutaasinnaasunik qarasaasiatigut pinnguaatinik ineriartortitsinerup saniatigut, Kalaallit Nunaanni qarasaasiatigut pinnguaatinik tunisassiornerup aallartinnissaanut pisariaqartunik attaveqaatit pilersinnissaat, Qunaaq Møllerip Pani Enequistillu neriuutigaat.

- Inuit amerlanerusut inuussutissarsiummut tassunga peqataatinneqalernissaat, qarasaasiatigullu pinnguaasiornermik ilinniartinneqartalernissaat angorusupparput, Pani Enequist oqarpoq nangillunilu:

- Aamma inuusuttorpassuaqarpoq suffeqanngitsunik. Inuusuttut amerlasuut tamatumunnga qammarsaavigisinnaagutsigit, annertunerusumik inerisaanermut peqataatitsilernissaq aamma takorluugaavoq.