Ullut pingasut ingerlaneranni Afghanistani pillugu nalunaarusiamik kinaassutsimik isertuussisumut akerliusumik siunnersuut 10.000-init taperserneqarpoq

Ullut pingasut missaannaanni Afgahnistanimik nalunaarummik taaneqartumi kinassutsimik isertuussinissamut akerliusumik innuttaasut siunnersuutaat 10.000-ngajannit atsiorneqarpoq. 

Tamanna Folketingip nittartakkakkut quppernerani atuarneqarsinnaavoq. 

Siunnersuut Folketingip nittartagaani 10. juni tamanut saqqummiunneqartoq naapertorlugu, Dansk Institut for Internationale Studier (Diis) ilisimatusartut Danmarkip sakkutooqarnikkut inuinnartigullu piffissami 2001-mit 2021-mut iliuusaat pillugit oqaatigisanik paasissutissanillu tamakkiisunik saqqummiussinissamut periarfissaqartariaqarput. 

Siunnersuummulli paasissutissat Nunanut allanut ministereqarfimmit isumannaallisaanikkut akuerineqartut kisimik pineqarput. 

Folketingip Diis Danmarkip Afghanistanimi sakkutooqarnikkut inuinnartigoortumillu iliuusai pillugit oqaluttuarisaanikkut nalunaarusiornissamik qinnuigaa. 

Maajimi politikerit Afghanistanimi nalunaarusiami aterminnik isertuussisinnaanissaat Folketingimit periarfissanngortinneqarpoq, ilisimatusartummi Det Udenrigspolitiske Nævnimi oqaatigisaannik issuaanissamut akuersissummik piniaqqaartussanngortinneqarput. 

Nunanut allanut ministeri Lars Løkke Rasmussen (M) ministeriunerusimasorlu Poul Nyrup Rasmussen (S) ilisimatusartunit apersorneqarnissaminnik itigartitsipput. Tamanna Politikenimi Berlingskemilu oqaatigineqarpoq. 

Løkkep itigartitsinini atuakkani, oqalugiarnerni apersorneqarnernilu siusinnerusukkut suliniarneq pillugu amerlasuunik oqaatigisaqareernerminik tunngavilersorpaa. 

Lars Løkke Rasmussen Det Udenrigspolitiske Nævnimi matoqqasumik ataatsimiinnermi issuarneqarnissaminik akuersisoq, Altingip maajimi allaaseraa. 

Helle Thorning-Schmidt, 2011-mit 2015-mut ministeriunerusoq ilisimatusartut saaffiginnissutaannut qisuariaateqanngilaq.  

Arfininngormalli ”tamatigut sooq Afghanistanimiinnerluta ammasumik  saqqummiutaripput” Politikinimut oqaluttuaraa. 

- Isummakka annittareerpakka, Helle Thorning-Schmidt oqarpoq. 

Morten Kromann, Afghanistaniliartinneqarsimasoq, maannalu Københavnip Byretiani dommerfuldmægtigiusoq, Danmarks Veteraner og Veteranstøttemilu ilaasortaq innuttaasut siunnersuutaannik siunnersuuteqartuuvoq. 

Ukiuni 20-ni Afghanistanimi sorsunnermi sakkutuut danskit 44-t toqutaapput, sorsunnerlu Talibanikkut pissaanermik tiguseqqinnerannik inerneqarpoq. 

Politikerit imminerminik danskillu sakkutuuinik allanik aallartitsisut aalajangikkaminnut akisussaaffimmik tigusisariaqarnerat, Morten Kromannip Politikenimi erseqqissaatigaa. Taamaammallu aqqi nalunaarummi takuneqarsinnaasariaqarput. 

Innuttaasut siunnersuutaat Folketingimi suliarineqassappat atsiornernik ikinnerpaanik 50.000-nik tunuliaqutserneqartussaavoq. 

/ritzau/